"მხიარული კადრია - რომ ნახულობენ, ეცინებათ..." - რას ჰყვება ჟურნალისტი, რომელმაც საქართველო-პორტუგალიის მატჩიდან ცნობილი კადრის ტატუ გაიკეთა

სხეულზე ბევრი ტატუ აქვს, თუმცა რამდენიმე კვირის წინ ფეხზე გაკეთებულმა მისმა ბოლო ტატუმ სოციალური ქსელი მოიცვა.

საქართველო-პორტუგალიის გასაოცარი საფეხბურთო მატჩის შემდეგ, მწერალმა და ჟურნალისტმა დათო სამნიაშვილმა, მეორე დღესვე, ფეხზე სწორედ ის გასაოცარი კადრი ამოიტვიფრა, რომელშიც კართან წაქცეული რონალდუ და მომღიმარი ლოჩოშვილი არიან აღბეჭდილი.

• ისე მოხდა, რომ გასულ კვირას დათო სამნიაშვილს ერთ-ერთ შეკრებაზე შემთხვევით შევხვდი. მის ახალ ტატუსა და ფეხბურთზე საუბარს ვერაფრით ავცდით, რასაც ახლა შემოგთავაზებთ.

დათო სამნიაშვილი:

- ჩემს ახალ ტატუს განსაკუთრებულად არ ვუყურებ, რადგან უკვე ბევრი ტატუ მაქვს. ზოგადად, რაც ჩემთვის ახლოს არის ხოლმე და სიმბოლური დანიშნულება აქვს, ყოველთვის იმას ვიკეთებ. ამჯერადაც ასე მოხდა, რადგან ეგ ეპიზოდი მაგ თამაშიდან ყველაზე ემოციური მომენტი იყო. თვითონ თამაში დამოუკიდებელი საქართველოს ისტორიაში ყველაზე მნიშვნელოვანი აღმოჩნდა. მეორე დღესვე წავედი და ფეხზე ეგ ტატუ გავიკეთე.

- ჩვენს კართან წაქცეული როლანდუ, ამ თამაშში დამარცხებული მსოფლიო დონის ფეხბურთელი - მართლა საოცარი კადრია...

- ჩემთვის უფრო მხიარული კადრია - რონალდუს ისტერიული სახე და ლოჩოშვილის ღიმილთან ერთად, აქნეული ხელი... ტატუ სულ 30-40 წუთში ფოტოს მიხედვით შეიქმნა.

- როგორია ხალხის რეაქცია?

- არაფერი ისეთი, რომ ნახულობენ, ეცინებათ... მომავალში ვფიქრობ, რომ სხვადასხვა ტატუთი მთელი სხეული შემევსება. 2 წელიწადია, ყოველთვე ახალს ვიკეთებ, უკვე 20-მე ტატუ მაქვს.

- ამას რაღაც ფაქტები, ემოციები იწვევს, ხომ?

- სამეცნიერო ფანტასტიკის ჟანრში ვწერ, მწერალი ვარ, ჩემი საქმიანობა ეგ არის. ამიტომ ამ სფეროში - სამეცნიერო ფანტასტიკასთან რაც არის, მე მომწონს და ჩემთვის რაც აქტუალურია, ვიკეთებ. თუმცა ტატუ აქამდე სპორტზე, ფეხბურთზე არასდროს გამიკეთებია, რადგან ეს დიდად მნიშვნელოვანი არ არის. ახლა სიმბოლური მომენტი იყო და ეს ამიტომ შევმატე.

- ე.ი. ფეხბურთის გულშემატკივარი ცხადია, ხართ.

- ბავშვობიდან ძალიან მიყვარდა და ფეხბურთს ძალიან ვგულშემატკივრობდი. ახლა ისეთი ენთუზიაზმით აღარ ვარ ამ სპორტის მიმართ გამწყობილი, ცხოვრებაში ბევრად უფრო სხვა რაღაცები უფრო მაინტერესებს. ნუ, ფეხბურთის სიყვარული ბავშვობიდან მომყვება და ფეხბურთში საკმაოდ კარგად ვერკვევი. ბავშვობაში ამ სპორტზე არ მივლია, თუმცა როგორც ყველა ბავშვს, მეც მითამაშია. არც ფეხბურთელობაზე მიფიქრია, უფრო კომენტატორობა და მწვრთნელობა მინდოდა.

- თქვენი ტატუ თავზე ყურადღებას მართლა იქცევს.

- ესეც იმ ტატუ-არტისტის გაკეთებულია, ვინც ეს ბოლო, ფეხზე გამიკეთა. ფაქტობრივად ნეირონებია გამოსახული, ანუ ტვინის უჯრედები, რის ხარჯზეც ვაზროვნებთ. მოკლედ 2 ნეირონის დაკავშირებაა ასახული, რომელიც წარმოქმნის სიგნალს და ჩნდება აზრი. დაახლოებით ეს შინაარსი დევს... ყველა ტატუს რაღაც დატვირთვა აქვს.

- ფეხბურთს რომ დავუბრუნდეთ - რომელი გუნდის გულშემატკივარი ხართ?

- ბავშვობიდან "ბარსელონას" ვგულშემატკივრობდი, ჯერ კიდევ ძველი თაობა რომ თამაშობდა - ფეხბურთს მე-20 საუკუნეშიც ვგულშემატკივრობდი და მათ შორის, ბარსელონას. რაღაც პერიოდი მოვყვებოდი, მაგრამ ახლა უბრალოდ ვუყურებ. განსაკუთრებული გულშემატკივარი აღარ ვარ.

- ამ ჩემპიონატზე რა გვეტყვით?

- მოსაწყენი ჩემპიონატი გამოვიდა, ზოგადად იშვიათად, რომ ასეთი მოსაწყენი გამოვიდეს ხოლმე. ძალიან ჩაკეტილი იყო. საქართველოს ნაკრების გამობრწყინება რომ არ ჩავთვალოთ და ესპანეთის ძალიან კარგი თამაში, ვიმეორებ, მოსაწყენი ჩემპიონატი იყო. ვნახოთ, ფინალი როგორი იქნება, სავარაუდოდ, ინგლისი ისევ გააფუჭებს თამაშს და ეგ გუნდი სერიოზული პრობლემაა. ცუდი მწვრთნელი ჰყავს, დაცვით ფეხბურთს ათამაშებს...

ესპანეთი ამ "ევროზე“ საუკეთესო გუნდია. ფაქტია, ფინალშია და მოიგებს კიდეც. ჩემპიონატს ძალიან კარგად მომზადებული შეხვდა, ასეა ხოლმე -ჩემპიონატებში შეიძლება ისეთი ძლიერი შემადგენლობა არ ჰყავდეს, მაგრამ გუნდი ფსიქოლოგიურად უფრო მომზადებული შეხვდეს. ამიტომაც ესპანეთის ნაკრები ყველაზე მაღლა დგას, რა თქმა უნდა, ჩვენს ნაკრებზეც ბევრად მაღლა იდგა. ჩვენც უნდა ვმდგარიყავით და თავი დაგვეცვა. პირველი 40 წუთი მაგას ვაკეთებდით, მერე მსაჯმა შეცდომა დაუშვა. აშკარა თამაშგარე იყო, არ დააფიქსირა. სწორად რომ ემოქმედა, არავინ იცის, მეორე ტაიმში რა მოხდებოდა. ჩვენ ვიდგებოდით და შეიძლება გაგვეძლო კიდევაც.

ესპანეთი ზოგადად ჩვენთანაც მოგებას იმსახურებდა. საერთოდ ვიტყოდი, რომ არ ვიმსახურებდით მერვედფინალში ესპანეთთან თამაშს. ისეთი კარგი გუნდია, მათთან შეიძლება, ყველამ წააგოს.

- რას ეტყოდით ჩვენს მკითხველს, ფეხბურთის გულშემატკივარს და ტატუ-მოყვარულებს?

- ზოგადად ტატუ მოგონებაა, რომელიც ყოველთვის შენს სხეულთან ერთად არის. ჩემთვის ეს დანიშნულება აქვს. სიმბოლურია, მარტო ის არ არის, რომ ვიზუალურად ლამაზი იყოს და ამიტომ გავიკეთო.

თუ ვინმეს ჩემი გამოცდილება გამოადგება, გავუზიარო, - სანამ პირველ ტატუს გაიკეთებთ, შეიძლება 30 წელი გავიდეს. ჩემ შემთხვევაში 31 წელი გავიდა... როგორც კი პირველს გაიკეთებ, მერე გაჩერება რთულია.