"ფატიმა 14 წლის იყო, როცა რამზანისგან შვილს ელოდებოდა" - "რამზანის ჰარამხანა": რა გამოავლინა ჟურნალისტურმა გამოძიებამ? ჩეჩნეთის ლიდერის კიდევ ერთი ბნელი მხარე
საგამოძიებო ჟურნალისტურმა ჯგუფმა "პროექტმა" რამდენიმე დღის წინ ჩეჩნეთის ლიდერის რამზან კადიროვის შესახებ გამოძიება გამოაქვეყნეს. როგორ მოვიდა დიქტატორი ხელისუფლებაში და რა დანაშაულები ჩაიდინა ჩეჩნეთის მმართველობის 20 წლის განმავლობაში.
საგამოძიებო ნამუშევარი ვრცელია და მასში დეტალურად არის აღწერილი კადიროვების კლანის აღზევება, გამდიდრება, მკვლელობების სერია და დეტალები ჩეჩნეთის ლიდერის ჰარამხანის შესახებ, სადაც არაერთი არასრულწლოვანიც მოხვედრილა. ისტორიები მძიმეა, ალბათ ბევრი თქვენგანი ახლა გაიგებს, რომ კადიროვის 14 შვილს სხვადასხვა დედები ჰყავთ.
- კადიროვის ქალები
რამზან კადიროვი გაუმაძღარია ქალების მიმართ - ასე იწყება გამოძიების ის ნაწილი, სადაც ლიდერის ჰარამხანაზე გვიყვებიან. ჩეჩნეთის ლიდერს ჰყავს რამდენიმე მუდმივი ცოლი, თუმცა რუსეთის კანონმდებლობა კრძალავს მრავალცოლიანობას. მას ასევე ჰყავს არაერთი ხარჭა. ხარჭა - არ არის ზუსტი ტერმინი, როგორც კადიროვის ორი ნაცნობი განმარტავს, მათთან ურთიერთობისას ჩეჩნეთის ლიდერმა ადგილობრივ მოლას უბრძანა ე.წ. ნიკა, ანუ ისლამური ქორწინება გაეფორმებინა. ასე აზღვევენ გოგონებს სიძვის ბრალდებებისგან, თუმცა ეს მათ არ შველის. ჩეჩნეთში ბევრი ლამაზი გოგონაა, რომლებიც კადიროვის ყოფილი ხარჭების სტიგმით ცხოვრობენ. ისინი ცოლად არავის მოჰყავს.
ჩეჩნეთში საიდუმლო არ არის, რომ კადიროვს ჰარემი აქვს.
სიმღერა "ჩემი ნანაკი", 2012 წელს პოპულარულმა ჩეჩენმა მომღერალმა თამილა საგაიპოვამ შეასრულა. მუსიკალური თვალსაზრისით, ეს არის ჩვეულებრივი ლეზგინკა ელექტრონული არანჟირებით. ტექსტი ჩეჩნურისა და რუსულის ნაზავია. მასში კადიროვის მრავალი ხარჭაა ჩამოთვლილი. სინამდვილეში, "ნანაკი" რამზან კადიროვის მეტსახელია. მას მომღერალი ნაზად მიმართავს, თითქოს მისი ოჯახის წევრი იყოს. საქმე ისაა, რომ თავად თამილა საგაიპოვა ჩეჩნეთის უფროსის ჰარემში ცხოვრობდა.
გამოძიებამ დაადგინა ყველა იმ ქალის ვინაობა, რომელიც ამ სახელების უკან იმალებოდა. ეთიკური მიზეზების გამო, გამოძიებამ თავი შეიკავა ყველა მათგანზე საუბრისგან, თუმცა ზოგიერთი ქალის ისტორია იმდენად მძიმეა, რომ მისი იგნორირება შეუძლებელია - მათი ამბები ნათლად ასახავს ჩეჩნეთის მმართველის სრულიად არაადამიანურ სახეს.
გაიცანით ჩეჩნეთის ლიდერის მთავარი ცოლები: მედნი კადიროვა, ფატიმა ხაზუევა, ამინატ ახმადოვა და ზამირა (პასპორტის მიხედვით ინდირა) ძაბრაილოვა.
მედნი კადიროვას შესახებ ყველამ იცის - რამზანი ოფიციალურად წარადგენს მას, როგორც თავის ერთადერთ მეუღლეს. მედნი ისევე როგორც კადიროვის ყველა სხვა ქალი, ძალიან მდიდარია. ძვირადღირებული ქონების დამალვის მიზნით, კადიროვის პირველ მეუღლეს ფიქტიური ვინაობაც კი მოუგონეს - მას მეორე პასპორტი აქვს მედნი მუსაევის სახელზე.
კადიროვის პროპაგანდა ირწმუნება, რომ მედნიმ რამზანს 42 წლის ასაკში 14 შვილი გაუჩინა, რაც რა თქმა უნდა, სიმართლეს არ შეესაბამება. საქმე ისაა, რომ კადიროვი ართმევს შვილებს თავის ხარჭებს.
2014 წელს ამინატ ახმადოვას რამზან კადიროვისაგან ვაჟი შეიხ მუჰამედი შეეძინა. როგორც მოსალოდნელი იყო, ამინატს ცალკე სახლი გადაეცა სპეციალურად დაცულ ტერიტორიაზე კადიროვის რეზიდენციის მახლობლად, სადაც ის მსახურებთან და ხანდახან შვილთან ერთად ცხოვრობს. საზოგადოებაში ბავშვი წარმოდგენილია როგორც კადიროვის კანონიერი მეუღლის, მედნის ვაჟი.
კადიროვის მეორე ვაჟის, ელის დედა ფატიმა ხაზუევაა, ჩეჩნეთის მმართველის ერთ-ერთი არაოფიციალური ცოლი.
ფატიმა რამზანის კიდევ სამი შვილის დედაა. ამ ფოტოზე მისი ქალიშვილი აშურა, მედნი კადიროვას ეხუტება.
და ესენი არიან ესეტი და შეიხ-აჰმადი, ტყუპი, რომლებიც ფატიმამ 2015 წელს გააჩინა.
გამოძიების ერთ-ერთი წყარო იხსენებს, როგორ შეესწრო ოჯახურ დრამას - ფატიმას სურდა ერთ-ერთ შვილის ჩახუტებოდა, მაგრამ რამზანმა ამის უფლება არ მისცა.
რამზანისა და ფატიმას არაოფიციალური ქორწინება ცალკე ისტორიაა. ხაზუევამ ჩეჩნეთის ისტორიაში ერთადერთ სილამაზის კონკურსში მეორე ადგილი დაიკავა. კონკურსი 2006 წლის გაზაფხულზე გაიმართა. რეალურად კი ის სპეციალურად რამზანისთვის ჩატარდა და ღონისძიებას მაყურებელიც კი არ ჰყავდა, რაც მორალზე ზრუნვით ახსნეს. სინამდვილეში რამზანმა სპეციალურად თავისი ქალებისთვის შოუ დადგა.
როდესაც ხაზუევამ მეორე ადგილისთვის პრიზი მიიღო, რამზანისგან შვილს ელოდებოდა. მაშინ ფატიმა 14 წლის იყო, ის ჯერ კიდევ სკოლაში დადიოდა. ელი იმ წლის ბოლოს დაიბადა.
წყარო ამბობს: "კადიროვს ურჩევნია ქალწული ახალგაზრდა გოგონები, სკოლის მოსწავლეები ან პირველკურსელები. მას ჰყავს ასისტენტი, რომელიც ინარჩუნებს კონტაქტებს ბევრ ახალგაზრდა ჩეჩენ გოგონასთან. ათობით, შესაძლოა ასობითაც იყვნენ ისინი“.
ჩეჩნეთში ახსოვთ, როდესაც 2000-იან წლებში კადიროვის ხალხს შეეძლო ლამაზი ახალგაზრდა ჩეჩენი გოგონები პირდაპირ ქუჩაში, სკოლის გზაზე დაეჭირათ. კადიროვმა ზოგიერთ თავის ხარჭას მისგან ბავშვის გაჩენაზე ფიქრიც კი აუკრძალა. დაუმორჩილებლობის შემთხვევაში კი მათ გარდაუვალი სასჯელი ელოდათ.
მსგავსი ისტორია გადახდა ჟანეტა მუკუევას. მისი ამბავი ჟურნალისტურ გამოძიებას სამმა ადამიანმა მოუყვა, ისინი იცნობდნენ რამზანსაც და გოგონას ოჯახსაც.
ჟანეტი რამზანის თანატოლი იყო. კადიროვი მას ბავშვობიდან იცნობდა და ალბათ მასზე შეყვარებულიც იყო. მაგრამ ახალგაზრდა ასაკში ჟანეტი სხვა ჩეჩენზე, ტიმირბულატზე დაქორწინდა. რამდენიმე წელში წყვილი განქორწინდა, მათ პატარა ქალიშვილი, ლინდა დარჩათ. როდესაც რამზანმა ეს შეიტყო და თავისი დიდი ხნის ვნების ობიექტს მიაკითხა. მათ შორის ურთიერთობა დაიწყო და საბოლოოდ ტრაგედიით დასრულდა.
2003 წლის 26 სექტემბერს ჟანეტი გუდერმესში მოკლეს. უცნობმა პირებმა მას ქუჩაში ესროლეს. გარდაცვალების მიზეზი დასახელდა ტყვიით მიყენებული მრავლობითი ჭრილობები თავისა და გულმკერდის არეში. კადიროვის ნაცნობი ორი ადამიანი თვლის, რომ რამზანმა თავად მოიშორა საყვარელი ქალი.
ერთ-ერთის თქმით, რამზანს გაუხარდა, როდესაც გოგონას გარდაცვალების ამბავი გაიგო, რადგან ქალი ორსულად იყო. ჩეჩნეთის ლიდერმა ქალის სიკვდილის შემდეგ, გროზნოში მდებარე ერთ-ერთ ბენზინგასამართ სადგურს დროებით - "ჟანეტი" დაარქვა. "ეს მისი დახვეწილი იუმორის გრძნობაა", - ამბობს ერთ-ერთი თანამოსაუბრე.
კადიროვის კიდევ ერთი საიდუმლო ცოლი სიმღერის ერთ-ერთი გმირი ხუტმატ დადაევაა. სინამდვილეში, მისი სახელია ზალინა. იმის გამო, რომ ის არ დაემორჩილა სულთანს, მისი კარიერა განადგურდა. ახალგაზრდა გოგონა ხშირად ჩნდებოდა ახალ ამბებში რამზანთან ერთად, როგორც მისი თანაშემწე. ის ხელმძღვანელობდა იმანის ქალთა კლუბს (კადიროვის მხარდამჭერ ქალთა ასოციაცია) და ახალგაზრდულ პოლიტიკას რესპუბლიკაში. გარკვეულ მომენტამდე, კადიროვი რეგულარულად ატარებდა შეხვედრებს ამ კლუბთან და საჯაროდ მიულოცა თავის თანაშემწეს დაბადების დღე, უსურვა "ბედნიერება პირად ცხოვრებაში", მაგრამ 2017 წლის შემდეგ დადაევა დაითხოვა.
ასევე დაისაჯა მომღერალი თამილა საგაიპოვა, რომელმაც კადიროვის ჰარემზე სიმღერა დაწერა. მან რამზანთან შეხვედრის შემდეგ საყვარელი ადამიანი იპოვა, რაც სულთანს არ მოეწონა. თამილა სცემეს და ის სამუდამოდ გააქრეს ჩეჩნური სცენიდან. ახლა საზღვარგარეთ ცხოვრობს.
კადიროვი მორჩილ ცოლებს ბევრ ფულს აძლევს. ერთ დროს ისინი გროზნოს ცენტრში ერთ-ერთ ახალ კორპუსში ცხოვრობდნენ. შემდეგ კი ბევრმა მათგანმა მიიღო ძვირადღირებული სახლი ჩეჩნეთის დედაქალაქის ყველაზე დაცულ მხარეში - რამზანის რეზიდენციასთან ახლოს.
"ახლა გასაგებია, რაში ხარჯავს რამზან კადიროვი ბიუჯეტიდან მოპარულ მილიარდებს. სულთანს თავისუფალ დროს მთელი ჰარემი დუბაიში მიჰყავს. იქ, როგორც თვითმხილველი ამბობს, კადიროვის ხარჭები თავიანთ "ნანაკთან" ერთობიან", - ვკითხულობთ საგამოძიებო მასალაში.
ფულის გარდა, მნიშვნელოვანია სტატუსიც. პატივია იყო ჩეჩნეთის სულთნის მემკვიდრის დედა, თუნდაც ქალმა საჯაროდ არ გამოაცხადოს დედობა... მაგალითად, პატივია იყო 15 წლის სასტიკი ადამ კადიროვის დედა.
- გავიხსენოთ სილამაზის კონკურსი, რომელიც რეალურად რამზან კადიროვის ქალების ორგანიზებული შოუ იყო. თუ ფატიმა ხაზუევამ მეორე ადგილი დაიკავა, მაშინ ვინ გახდა პირველი? - ის ახლა ოცდათორმეტი წლის, ზამირა (ანუ ინდირა) ძაბრაილოვაა.
კონკურსის დროს ზამირა 14 წლის იყო, უმამოდ გაიზარდა. მამა ომში ომში დაიღუპა. ამ დღიდან წელიწადნახევარი გავა და ზამირა ადამ კადიროვს გააჩენს... რომელიც პირველივე დღეებიდან სხვა ქალის შვილად იქნება წარმოდგენილი. ადამის სისასტიკეზე კი უამრავჯერ დაუწერია მედიას.
წაიკითხეთ ასევე: