"პარიზში რა გინდა, წადი მოსკოვში... მონა“ - დეპუტატ ელისო ბოლქვაძეს აეროპორტში ე.წ. აგენტების კანონის მხარდაჭერისთვის პასუხი მოსთხოვეს: რას წერს პიანისტი თვითონ?
"პარიზში რა გინდა, წადი მოსკოვში, აქ რა გინდა, მონა“, - ასე მიმართავენ მოქალაქეები პარიზის აეროპორტში გადაღებულ და სოციალურ ქსელში გავრცელებულ ვიდეო კადრებში პარლამენტარსა და პიანისტ ელისო ბოლქვაძეს.
დღესვე ელისო ბოლქვაძემ "ფეისბუქზე" დაწერა, რომ "სამაგალითოდ გამოაჭენებს“ იმ ხალხს, ვინც მას მონა უწოდა.
"იმ უმსგავს ხალხს, ვინც თავს უფლებას აძლევს პარიზის აეროპორტში ისტერიკები გამართოს როგორც ნამდვილმა ქაჯებმა შემდეგს ვეტყოდი: უსახურები და საცოდავები ხართ. მონები და უსამშობლოები! გამოგაჭენებთ მალე სამაგალითოდ“.
ბოლქვაძეს სტატუსის ქვეშ უპასუხა მოქალაქემ, რომელმაც დეპუტატს ე.წ აგენტების კანონისთვის მხარდაჭერისთვის აეროპორტში პასუხი მოსთხოვა:
"მე ვარ ელისო, არ იწვალოთ ბევრი ჩემს მოსაძებნად. კივილი და ისტერიკა თქვენ ატეხეთ, მე მხოლოდ ერთი კითხვა დაგისვით: რა გინდათ იმ ქვეყანაში, რომელსაც აგენტების დამფინანსებელს და მტერს ეძახით?! ქართველებისთვის ჩინეთი, რუსეთი და ირანი გინდათ და თქვენ პარიზებში დასეირნობთ! აი, ეს არის სიმართლე და გრცხვენოდეთ! მე არსად გავქცეულვარ, არაფერი მაქვს გასაქცევი და თქვენ როგორ გარბიხართ, კარგად ჩანს“, - წერს თამარ ჯინჭარაძე.