"მილიონი მას, ვინც ანას იპოვის..." - რუსეთში 22 წლის ცნობილი სპორტსმენი FSB-ს სანატორიუმიდან გაუჩინარდა: რას ამბობენ გოგონას ახლობლები?

10 თებერვალს დონის როსტოვიდან 22 წლის სპორტსმენი ანა ცომარტოვა კასპიისკში, დაღესტნის რესპუბლიკაში ყოფნისას გაუჩინარდა. გოგონა წარუმატებლად გამოვიდა Muay Thai-ის კონკურსზე, იმედგაცრუებული სასეირნოდ წავიდა და მიუხედავად იმისა, რომ თითქმის 21 დღე გავიდა - ძებნა არ შეწყვეტილა.

წაგებული ბრძოლა

იურიდიული სკოლის სტუდენტი ანა ცომარტოვა დაღესტანში ჩრდილოეთ კავკასიის ფედერალური ოლქისა და სამხრეთ ფედერალური ოლქის ტაილანდურ კრივში ჩემპიონატზე იმყოფებოდა. სპორტსმენი როსტოვის რეგიონის სახელით გამოდიოდა 57 კგ-მდე წონით კატეგორიაში. ნახევარფინალში ცომარტოვა რუს მეტოქესთან დამარცხდა, თუმცა ახლობლების თქმით, ეს იყო მისი პირველი მარცხი 10 წლის განმავლობაში. დამარცხების შემდეგ მსუბუქად ჩაცმულმა სპორტსმენმა ალი ალიევის სახელობის სპორტკომპლექსი დატოვა და გაუჩინარდა - თან არ წაუღია ტელეფონი, ბარათი და პირადი ნივთები. ერთ-ერთი ინფორმაციით, ცომარტოვა ძმას დაემშვიდობა და სთხოვა, დედისთვის ეთქვა, რომ ძალიან უყვარდა.

რას ამბობს მოწმე

სათვალთვალო კამერებზე ჩანს, რომ ცომარტოვა სასტუმროს დატოვების შემდეგ, კასპიისკის სანაპიროზე სეირნობს, ეს ადგილი საშიშ ზონად ითვლება. ოჯახის თქმით, ანა აქამდე არასოდეს გაუჩინარებულა და ყოველთვის კონტაქტზე იყო.

ერთ-ერთი თვითმხილველი ამბობს, რომ გოგონა მუხლამდე წყალში იდგა და მას გამოელაპარაკა, რადგან კაპიუშონში შენიღბული თავიდან მყვინთავი ეგონა. ამის შემდეგ სპორტსმენი სანაპიროს ტოვებს და გემბანისკენ მიდის.

გაქრობა FSB-ს სანატორიუმის ტერიტორიიდან

გამოძიების მიხედვით ირკვევა, რომ ანა FSB-ს სანატორიუმის ტერიტორიას უახლოვდება. ის სათვალთვალო კამერებმა დააფიქსირეს. კადრებში ჩანს, რომ გოგონა იქ თითქმის 40 წუთის განმავლობაში იმყოფებოდა. გამოკითხული თანამშრომლების თქმით, დაცვამ შენიშნა და ერთ-ერთი მათგანი მასთან მივიდა, მაგრამ სანამ მიუახლოვდებოდა, გოგონა გაქრა.

”იცით, რა არის უცნაური: ჩვენ გვაჩვენეს ჩანაწერი მხოლოდ ერთი კამერიდან. და ამ სანატორიუმში ათობით კამერაა. მეჩვენება, რომ რაღაცას გვიმალავენ“, - ამბობს გოგონას დედა.

პირველ დღეებში გოგონას საგანგებო სიტუაციების სამინისტრო, პოლიცია და მოხალისეები ეძებდნენ, ძიებაში ჩაერთნენ მყვინთავებიც და ვერტმფრენები. დაღესტნის სანაპიროზე საერთო საძიებო ზოლი 156 კმ-ია.

სისხლის სამართლის საქმე

ძებნის პარალელურად სისხლის სამართლის საქმე „მკვლელობის“ მუხლით აღიძრა, მაგრამ 18 თებერვალს გავრცელდა ინფორმაცია, თითქოს ცომარტოვა მახაჩკალიდან ვლადიკავკაზისკენ ტაქსის გამოძახებას ცდილობდა. მაგრამ მძღოლმა გოგონა არ წაიყვანა, რადგან ის, სავარაუდოდ, ცუდ მდგომარეობაში იყო. მოგვიანებით, გოგონას მამამ უარყო, რომ მისი ქალიშვილი რეალურად ნახეს მახაჩკალაში.

1 მილიონი ჯილდო

20 თებერვალს ცომარტოვას ოჯახმა გაავრცელა განცხადება, რომ ვინც მათი ქალიშვილის ადგილსამყოფლის შესახებ ინფორმაციას მიაწვდიდა, ჯილდოდ 1 მილიონ რუბლს მიიღებდა. „პრემია ჩვენ თვითონ დავაწესეთ, გვყავს მეგობარი, რომელიც მზად არის სესხი აიღოს ჩვენთვის. მაქსიმუმ მილიონი შეუძლია აიღოს, მერე გადავიხდით“ - განაცხადა კაცმა.

როგორც კი ანას მამამ ჯილდოს შესახებ გამოაცხადა, შინაგან საქმეთა სამინისტროში 40-მდე ზარი გაისმა, ადამიანები ამტკიცებდნენ, რომ ანა ცომარტოვა ნახეს. ყველა მათგანის მიერ მიწოდებული ინფორმაცია ყალბი აღმოჩნდა.

ანას მამის თქმით, მისი ქალიშვილი შეჯიბრზე კარგ ხასიათზე წავიდა, რადგან სწავლის გამო იშვიათად ახერხებდა შეჯიბრებებზე სიარულს. ბოლო სამ წელიწადში ეს მხოლოდ მეორე ტურნირი იყო, რომელიც არდადეგებს დაემთხვა.

"დიახ, წარუმატებლად იბრძოლა, მაგრამ მან იცის, ამას როგორ უნდა შეხვდეს... ჩვენ არ გამოვრიცხავთ ავარიას, მაგრამ გამოვრიცხავთ თვითმკვლელობას. ჩანაწერებში გოგონას მოძრაობიდან ჩანს, რომ გაბრაზებულია. ანას უყვარდა ნაპირზე სიარული. როსტოვშიც კი, სადაც ჩვენ ვცხოვრობდით, ხშირად სეირნობდა დონის სანაპიროზე.

ჩრდილოეთ ოსეთის ტაილანდური კრივის ნაკრების მთავარი მწვრთნელი, ვერდი ტარიევი, რომელიც ცომარტოვას სკოლის წლებში წვრთნიდა, ამბობს, რომ მისი აზრით, ანა ცოცხალია. ტარიევის თქმით, ჩხუბი, რის შემდეგაც გოგონა გაუჩინარდა, მის კარიერაზე არანაირად არ იმოქმედებდა, რადგან ის უკვე ფინალში იყო.

„ჩხუბის შემდეგ, როცა წააგო, მე მის გვერდით ვიყავი გასახდელში და ვეუბნებოდი, დამშვიდდი, არა უშავს, ასეც ხდება. დიახ, ნაწყენი იყო, როგორც ნებისმიერი სპორტსმენი, მაგრამ ნორმალურად, ადეკვატურად გამოიყურებოდა. ის არ იყო იმ მდგომარეობაში, რომ თავი მოეკლა.

ანა ცომარტოვას Tik-Tok-ზე 250 ათასზე მეტი მიმდევარი ჰყავს. თავის ვიდეოებში ის ხშირად საუბრობდა ვარჯიშზე, მამაზე, რომელსაც მადლობა უხდის და ეუბნება, რომ მისით აუცილებლად იამაყებს.

პეტიცია პრეზიდენტს და ძიების პროცესი

ანას მამამ ასევე შექმნა პეტიცია და რუსეთის პრეზიდენტს ვლადიმერ პუტინს მოუწოდა, ჩაერთოს გამოძიებაში: ”ბოლო ადგილი, სადაც ის იმყოფებოდა, ეს იყო FSB-ს უწყებრივი სანატორიუმის ტერიტორია დაღესტანში. მიუხედავად იმისა, რომ ის სპეციალურად დაცულ ტერიტორიაზე გაუჩინარდა, ანა ცომარტოვას ადგილსამყოფელი ჯერ არ არის დადგენილი. მიგვაჩნია, რომ ანა ცომარტოვას გაუჩინარების ობიექტური გამოძიებისთვის აუცილებელია რუსეთის პრეზიდენტის პუტინის გამოძიებაში მონაწილეობა“. პეტიციას ამ დროისთვის 2360-მა ადამიანმა მოაწერა ხელი.

LisaAlert-ის სამძებრო ჯგუფის პრესსამსახურის ცნობით, სანაპირო ზოლის რვა კილომეტრზე მეტი უკვე შემოწმდა. მოხალისეები სასწრაფო დახმარების თანამშრომლებთან ერთად მუშაობენ - ჩხრეკას როგორც ხმელეთზე, ასევე ჰაერიდან საგანგებო სიტუაციების სამინისტრო ახორციელებს. შემთხვევის ადგილზე დაღესტნის შინაგან საქმეთა სამინისტროს თანამშრომლებიც მუშაობენ. მოხალისეების დასახმარებლად ჩეჩნეთიდან KAVKAZ-ის საძიებო ჯგუფის მოხალისეები ჩავიდნენ, თუმცა გოგონა აქამდე ისევ დაკარგულად ითვლება.