"მთავარია, მისი ნასროლი ისარი არ მომხვდა" - რა თქვა რუდი გარსიამ კვარაცხელიას შესახებ და რას უკავშირდება ქართველი ფეხბურთელისგან გოლის აღნიშვნის ახალი სტილი
"ნაპოლიმ" სერია ა-ს მორიგ ტურში სტუმრად "ვერონას" მოუგო. მატჩი ანგარიშით 1-3 დასრულდა. იტალიური გუნდის ქართველმა ვარსკვლავმა ხვიჩა კვარაცხელიამ დუბლი შეასრულა.
ხვიჩამ გოლი განსხვავებულად აღნიშნა - ასეთი სტილი პირველად საქართველო-კვიპროსის მატჩში ვნახეთ, ხოლო ახლა იგივე იტალიაშიც გააკეთა. ამ აღნიშვნას მედია აქტიურად აშუქებს და ინტერესდებიან, თუ რას ნიშნავს.
DANZN ITALIA წერს, რომ გოლის გატანის შემდეგ აღნიშვნის ეს სტილი UFC-ის ცნობილ მებრძოლს, ისრაელ ადესანიას უკავშირდება. როგორც ჩანს, ხვიჩა ადესანიას გულშემატკივარია.
"სწორედ ამას უკავშირდება კვარას აღნიშვნის ახალი სტილი. საქართველოში MMA ძალიან პოპულარული სპორტია, კვარაცხელიასაც იზიდავს ეს სახეობა და სურდა გაემეორებინა ადესანიას აღნიშნვნა", - წერს გამოცემა.
- აღსანიშნავია, რომ თამაშის შემდეგ, "ნაპოლის" მწვრთნელმა რუდი გარსიამ ქართველი ფეხბურთელი შეაქო:
"უდინეზესთან" მატჩის შემდეგ კვარაცხელია დაბრუნდა. თავისუფლად უტევს, გოლის ნებისმიერ ფასად გატანაზე არ ფიქრობს. როდესაც ასე თამაშობს, ჩვენთვის მნიშვნელოვანია. დღეს გადამწყვეტი იყო და მის გამო გახარებული ვარ.
"კვარას" გოლის ახალი სტილით, ისრის სროლით აღნიშვნა? არ ვიცი, ამას რატომ აკეთებს, ვკითხავ (იცინის). მთავარია, მისი ნასროლი ისარი არ მომხვდა", - ამბობს რუდი გარსია.