გაიცანით ქართველი ფრენბურთელები, რომლებიც მსოფლიოს სხვადასხვა ქვეყნებში ასპარეზობენ
ქართველი ფრენბურთელების სახელი ნელ-ნელა მსოფლიო ასპარეზზეც გაისმის და ამაში დიდი წვლილი საქართველოს ფრენბურთის ეროვნულ ფედერაციას მიუძღვის. ბოლო დროს მასშტაბურ წარმატებას მიაღწია ფრენბურთის ქალთა ასაკობრივმა ნაკრებმა, რომლებმაც ევროპის ჩემპიონატზე პირველად იასპარეზეს. სერბეთსა და უნგრეთში გამართულ ევროპის ჩემპიონატზე 17-წლამდელმა ფრენბურთელებმა ისტორიული გამარჯვებაც მოიპოვეს და ტურნირი სენსაციურად დაიწყეს. პირველივე მატჩზე მათ მასპინძელი სერბეთის ნაკრების დამარცხება ანგარიშით 3:2 შეძლეს. მართალია ჩემპიონობის ტიტული იტალიის ნაკრებმა მოიპოვა, თუმცა ქართველი ფრენბურთელებისთვის ევროპის ჩემპიონატზე ასპარეზობა უდიდესი გამოცდილება იყო.
საქართველოს ფრენბურთის ნაკრების ზოგიერთი წევრი ახლა უცხოეთში იმყოფება, სადაც სხვადასხვა კლუბებში თამაშობენ. ამით მათ საშუალება ეძლევათ განავითარონ თავიანთი სპორტული უნარები და მიაღწიონ უფრო დიდ წარმატებას. დღეს სწორედ ასეთ სპორტსმენებს გაგაცნობთ:
მაგდა კობაიძე 15 წლისაა, რომელიც კარიერულ თავგადასავალს უნგრეთში, ბალათონფურდის szent benedek röplabda akadémia- ში აგრძელებს.
ფრენბურთელი ჩვენთან ინტერვიუში აღნიშნავს:
"როგორც იცით საქართველოს ფრენბურთელ გოგონათა 17- წლამდელთა ნაკრები მოხვდა ევროპის ჩემპიონატის ფინალურ ეტაპზე, სადაც 7 თამაშის ჩატარება მოგვიწია. ამ თამაშების დასრულების შემდეგ მალევე დაგვიკავშირდა აგენტი, რომელმაც შემოგვთავაზა უნგრეთის ერთ-ერთ გუნდში კონტრაქტის გაფორმება. კერძოდ, ბალათონფურდის szent benedek röplabda akadémia- ში.
კლუბი თამაშობს ექსტრა ლიგას. ჩემთან ერთად ბევრი უცხოელი მოთამაშე შემოუერთდა გუნდს და ამიტომ იმედები დიდია იმისა, რომ უნგრეთის ჩემპიონატში საპრიზო ადგილს მოვიპოვებთ.
უნგრეთში დამხვდა საკმაოდ კარგი სავარჯიშო პირობები, რაც ხელს შეუწყობს ჩემს ფიზიკურ განვითარებას. ასევე კლუბი ორგანიზებას უწევს ყოველკვირეული ამხანაგური თამაშების ჩატარებას სხვადასხვა ქვეყნებში, რაც თამაშის პრაქტიკულ გამოცდილებას მაძლევს. ვფიქრობ, რომ ეს ყველაფერი მნიშვნელოვანი ფაქტორია ჩემი კარიერული წინსვლისთვის.
საქართველოს ფრენბურთის ეროვნული ფედერაცია შესაძლებლობის ფარგლებში აკეთებდა ყველაფერს იმისათვის, რომ შეექმნა ჩემთვის და ჩემი გუნდისთვის კარგი სავარჯიშო პირობები. უნგრეთთან კონტრაქტის გაფორმებაში ასევე იყვნენ ჩართულები და ხელი შემიწყეს, რომ კარგ პირობებში აღმოვჩენილიყავი. “
მარიამ მუშკუდიანი 16 წლისაა, რომელიც ახლა საფრანგეთის ერთ-ერთ საუკეთესო გუნდში თამაშობს. სწორედ მარიამია ნაკრების ის გამორჩეული მოთამაშე, რომელმაც ევროპის ჩემპიონატის საგზურის მოსაპოვებლად, გადამწყვეტ მატჩზე გუნდს ყველაზე მეტი ქულა მოუტანა.
მარიამი ჩვენთან ინტერვიუში აღნიშნავს:
"მიხარია, რომ საფრანგეთის ერთ-ერთ საუკეთესო გუნდში ვთამაშობ. კლუბს Mulhouse Alsace, რომელიც ჩემპიონთა ლიგის მოთამაშეა, არაერთი მნიშვნელოვანი ტიტული აქვს მიღებული. ისეთი, როგორიც საფრანგეთის ჩემპიონობაა. მათ ძალიან დიდი ფრენბურთის ტრადიციები გააჩნიათ. ახლაც სეზონის ლიდერები სწორედ ჩვენ ვართ.
აქ საოცრად კარგი მოთამაშეები დამხვდნენ, გუნდშიც ადვილად და მეგობრულად მიმიღეს. ვინაიდან 16 წლის ვარ, ამ ეტაპისთვის 3 წლიანი კონტრაქტი გავაფორმე, რითიც კმაყოფილი ვარ. აქტიური თამაში ახლა ელიტ დივიზიონში მიწევს და ვფიქრობ, რომ მალე მთავარ გუნდშიც გადავალ.
სხვათაშორის, ზოგჯერ მთავარ გუნდშიც მიწევს თამაში და ასევე 18 წლამდელთა ნაკრებსაც ვეხმარები ხოლმე. რაც შეეხება სპორტულ ცხოვრებას, დღეში ორჯერ ან სამჯერ ვვარჯიშობთ, როგორც ფიზიკურად, ასევე ტექნიკაზე.
ბუნებრივია საქართველოს ფრენბურთის ეროვნულ ფედერაციასთან ახლაც მაქვს კონტაქტი. როცა ჩემი ჩამოსვლის საჭიროება იქნება, იმისათვის, რომ ასაკობრივ ან ეროვნულ ნაკრებში თამაშები ჩავატარო, აუცილებლად ჩამოვალ.
მოლოდინები და გეგმები წინ ბევრი მაქვს. ახლა ფრანგულ ენას ვეუფლები და მთლიანი დატვირთვით ვვარჯიშობ. ვიბრძვით ფლეიოფში გასასვლელად და შემდეგ, რა თქმა უნდა, უმაღლესი მიზნებისთვის. “
ნანა ლობჟანიძე
"ახლახანს, 10 ოქტომბერს შემისრულდა 16 წელი. წელს რამდენიმე კლუბიდან მქონდა შემოთავაზება. დიდი ხანი ვიდექი დილემის წინაშე, თუ რომელ ქვეყნაში წავსულიყავი სათამაშოდ. საბოლოოდ, გერმანიის ორ კლუბს შორის, გადავწყვიტე ამერჩია ნავარო, ერთ-ერთი გადამწყვეტი ფაქტორი იყო ის, რომ შესაძლებლობა მექნებოდა ჩემს უფროს დასთან ერთად მეცხოვრა, მევარჯიშა, მეთამაშა და იქიდან გამომდინარე, რომ არასრულწლოვანი ვარ, ვფიქრობ, რომ ამ ეტაპისთვის საუკეთესო გადაწყვეტილება მივიღე. ფრენბურთს ვთამაშობ 3 წელია, პირველი ტემპის/Middle blocker-ის პოზიციაზე და სხვა პოზიციებთან დიდი და ხანგძლივი შეხება არ მქონია.
აქ როდესაც ჩამოვედი რამდენიმე ვარჯიშის შემდეგ გადაწყვიტეს ჩემი პოზიციის შეცვლა (მათ განსაკუთრებით მოეწონათ ჩემი დაცვაში თამაშის უნარი) და ახლა დამატებით ვვარჯიშობ მეორე ტემპის/Outside Hitter-ის (4 ნომრის) პოზიციაზე. ჯერჯერობით არ გადამიწყვიტავს, რომელი პოზიცია მირჩევნია, რადგან, როგორც Outside Hitter-ი სულ ცოტა ხანია, რაც ვვარჯიშობ, თუმცა ძალიან მომწონს და ვხედავ ამ პოზიციაზე მომავალში საკუთარ თავს. აქვე მინდა აღვნიშნო, რომ საქართველოს ფრენბურთის ეროვნულმა ფედერაციამ ძალიან პოზიტიური, გამოცდილი და პროფესიონალი უკრაინელი მწვრთნელი ჩამოგვიყვანა და მჯერა, რომ ის კიდევ უფრო დაგვეხმარება განვითარებაში, გუნდის კიდევ უფრო შეკვრა, გაძლიერებაში და სულ მალე ვეცდებით, რომ კიდევ უფრო გავახაროთ ჩვენი გულშემატკივარი და სრულიად საქართველო. მჯერა, რომ ფედერაცია ენერგიას არ დაიშურებს და ყველა ფრენბურთზე შეყვარებულ მოთამაშეს მუდმივ მზრუნველობას გაუწევს და გვერდით დაუდგება ერთიანი მიზნის მისაღწევად. ჩემი, როგორც სხვა ყველა სპორტსმენის ოცნებაა ოლიმპიადის საგზურის მოპოვება და ამისთვის ყველამ ერთიანად უნდა ვიმუშაოთ. მიუღწეველი არაფერია, როცა ყველას ერთი მიზანი აქვს".