"გამოვდივარ ინიციატივით, ყველამ, ვისაც საქართველო ევროკავშირში უნდა იხილოს, შევუგროვოთ ფული სალომე ზურაბიშვილს დაგეგმილი ვიზიტების განსახორციელებლად" - რას წერს გია ხუხაშვილი
ექსპერტი გია ხუხაშვილი პრეზიდენტ სალომე ზურაბიშვილის მიერ გერმანიაში დაგეგმილ ვიზიტს ეხმაურება. მისი თქმით, ვინაიდან მთავრობა პრეზიდენტს აღნიშნული ვიზიტის განხორციელებაზე უარი უთხრა, საზოგადოებას შეუძლია პრეზიდენტის ვიზიტი დააფინანსოს.
"გამოვდივარ ინიციატივით, ყველამ, ვისაც საქართველო ევროკავშირში უნდა იხილოს, შევუგროვოთ ფული სალომე ზურაბიშვილს დაგეგმილი ვიზიტების განსახორციელებლად.გავიდეს შვებულებაში და კერძო ტურისტული მოგზაურობები განახორციელოს. ვფიქრობ, რომ არავინ ეტყვის იქ უარს ყველა დაგეგმილი შეხვედრის ამ უცნაურ ფორმატში გადატანაზე.ვფიქრობ, მოვლენების განვითარებისთვის ეს სასარგებლოც კი შეიძლება იყოს…" - წერს ხუხაშვილი.
ცნობისთვის, სალომე ზურაბიშვილი საქართველოსთვის სტატუსის მინიჭების მხარდასაჭერად ევროპელ ლიდერებთან შეხვედრებს იწყებს. საქართველოს პრეზიდენტი სალომე ზურაბიშვილი 31 აგვისტოს გერმანიაში გაემგზავრება. როგორც პრეზიდენტის ადმინისტრაციის მიერ გავრცელებულ ინფორმაციაშია ნათქვამი, სალომე ზურაბიშვილი, ბერლინში, გერმანიის ფედერაციული რესპუბლიკის პრეზიდენტთან, ფრანკ-ვალტერ შტაინმაიერთან გამართავს შეხვედრას.
- საქართველოს მთავრობის განცხადებით, სალომე ზურაბიშვილის აღნიშნული ვიზიტი განხორციელებაზე უარი ეთქვა.
"შევახსენებთ პრეზიდენტ სალომე ზურაბიშვილს, რომ საქართველოს კონსტიტუციის 52-ე მუხლის პირველი პუნქტის "ა" ქვეპუნქტის შესაბამისად, საქართველოს პრეზიდენტი მხოლოდ საქართველოს მთავრობის თანხმობით ახორციელებს წარმომადგენლობით უფლებამოსილებებს საგარეო ურთიერთობებში, ვინაიდან კონსტიტუციის 54-ე მუხლის პირველი პუნქტის შესაბამისად, ქვეყნის საგარეო პოლიტიკის განხორციელება საქართველოს მთავრობის უფლებამოსილებაა." - ნათქვამია მთავრობის განცხადებაში.