"გუშინ გვეუბნებოდნენ, გმირები არიანო, დღეს კი..." - სამარაში, "ვაგნერელთა" სასაფლაოზე ჯვრები მოხსნეს და იქაურობა მიწასთან გაასწორეს: რას წერს მედია

სამარას რაიონის სოფელ ნიკოლაევკაში, 2022-2023 წლებში გახსნილი, რამდენიმე კილომეტრზე გადაჭიმული "ვაგნერელების“ სასაფლაოს "დემონტაჟი დაიწყო" - ამის შესახებ svoboda.org იუწყება. გამოცემის ცნობით, თვითმხილველები ჰყვებიან, რომ მებრძოლთა საფლავებზე ჯვრები მოხსნეს, ყვავილების თაიგულების გვერდით დაყარეს და იქაურობა მძიმე ტექნიკამ მიწასთან გაასწორა.

ადგილობრივები სოციალურ ქსელებში წერენ, რომ იმ ადგილას, სადაც "ვაგნერელების" საფლავები იყო, ტერიტორია მოასწორეს და ბეტონი დაასხეს.

სამარაში, "ვაგნერის" მეომრების სასაფლაო რამდენიმე თვის წინ გააკეთეს. ის ორგანიზაციის ხელმძღვანელმა ევგენი პრიგოჟინმა აპრილში გახსნა. მისივე ინიციატივით გაიხსნა ხსოვნის კედელი, რომელიც უკვე აღარ არსებობს. იმის შესახებ, თუ რას ემსახურება ნიკოლაევკაში "ვაგნერელების" სასაფლაოს გაუქმება, ჯერჯერობით სამარის ოლქის ხელმძღვანელობას კომენტარი არ გაუკეთებია.

რუსი ინტერნეტმომხმარებლები სოციალურ ქსელებში წერენ, რომ ეს მხოლოდ დასაწყისია. რუსეთის ხელმძღვანელობა მხოლოდ დაღუპული "ვაგნერელების" კვალის წაშლას კი არ ცდილობს, უკვე ცოცხლებზეც დაიწყეს ნადირობა. გარდა ამისა, ცნობილი გახდა, რომ უკრაინის მოთხოვნით, ფინეთში დააკავეს ჯგუფის ერთ-ერთი ქვედანაყოფის მთავარი მებრძოლი, იან პეტროვსკი, რომელმაც როგორც ჩანს, რუსეთის ხელმძღვანელობას გაასწრო, მაგრამ ბოლომდე მაინც არ გაუმართლა.

"მას შემდეგ, რაც პრიგოჟინისა და უტკინის სავარაუდო დაღუპვის შესახებ გახდა ცნობილი, "ეფესბეს" თანამშრომლებმა "ვაგნერელების" ოჯახის წევრები დაკითხვაზე დაიბარეს. მათ შორის ისინიც, ვინც ბოლო რამდენიმე თვის წინ, საპატიმროებიდანაც, სწორედ პრიგოჟინის გუნდის ინიციატივით გადაიბირეს, თუმცა მაშინ, სასჯელის მოსახსნელად სამშობლოს დაცვას სთავაზობდნენ, ოღონდ გარკვეული ანაზღაურების სანაცვლოდ", - წერენ სოციალურ ქსელში.

"ერთი წუთით წარმივიდგინოთ, ეს ამდენი შეიარაღებული ადამიანი, რომელთაც შავ-ბნელი წარსული აქვთ, ან სხვადასხვა ქვეყანაში ფულის გამო უბრძოლია, ან მძიმე დანაშაულებისთვის იხდიდა სასჯელს და გამოიყვანეს. ახლა ეს ხალხი უპატრონოდ დარჩა. უკრაინაში არ მიდიან, არმიაში ვერ ინტეგრირდებიან, დაბრუნდნენ, მაგრამ რა გააკეთონ, არ იციან. არადა, ომში ფულს უხდიდნენ... ჰოდა, ახლა ეს ხალხი ჩვენ გვერდით დადის, გაბოროტებული, მათ დევნიან, ავიწროებენ, ხვალ, ზეგ, ისევ ციხეში შებრუნებას უპირებენ, მათ კი ეს არ უნდათ. ასეთ კარგ ქვეყანაში ვცხოვრობთ, პუტინის დამსახურებით", - წერს ნადია ორლოვა.

"გუშინ გვეუბნებოდნენ, გმირები არიანო, დღეს მტრებად გამოაცხადეს და მათი საფლავები მიწასთან გაასწორეს. საბჭოთა ეპოქაა, ოღონდ სტალინის და ხრუშჩოვის ეპოქა ერთად. რა ხდება, ვერაფერი გავიგეთ", - წერს ემირ ვოლკოვი.

"პუტინმა და მისმა მეგობარმა პრიგოჟინმა წარმატებით შეძლეს რუსეთის მოსახლეობის გენოციდი. ახლა საფლავებიც კი გაანადგურეს. ახლა ცოცხლებს დაერევიან. ვისაც მოიხელთებენ, ციხეში შეაბრუნებენ. ნაწილს დახოცავენ. პრიგოჟინთან დაკავშირებით ყველაფერი გასაგებია, პუტინს კი, ადამიანს, რომელმაც თავისივე ხალხს გენოციდი მოუწყო, ჰააგის სასამართლო არ ასცდება. იმედია, მის გასამართლებას მოვესწრებით და სასჯელის უმაღლეს ზომას მიუსჯიან", - წერს ვიქტორ ჩისტიკნი.