6
მაისიდღის ზოგადი ასტროლოგიური პროგნოზი
ფრენბურთის შესახებ არც თუ ისე ხშირად ვიგებთ ამბებს. საქართველოში ეს სპორტი დღითიდღე ვითარდება, თუმცა 24 წლის ანა კალანდაძემ უკვე მოახერხა და ქართული ფრენბურთის სახელი საზღვრებს მიღმა წარმატებით გაიტანა. საქართველოს ფრენბურთის ეროვნული ნაკრების კაპიტანი ჩემპიონთა ლიგის All Star-ის შემადგენლობაში მოხვდა და ის ყველაზე პრესტიჟული საკლუბო ტურნირის, ჩემპიონთა ლიგის ჯგუფური ეტაპის საუკეთესო მოთამაშედ დასახელდა. ანა პირველი ქართველი ფრენბურთელია, ვინც მსგავსი მასშტაბის აღიარება მიიღო. ჩემპიონთა ლიგის ჯგუფური ეტაპის MVP-ის გამოკითხვაში მან მთლიანობაში 23 221 ხმა მიიღო (41%), რის შედეგადაც რუს ვიტა აკიმოვას, შვედ ისაბელ ჰააკსა და ამერიკელ ჯორდან ტომპსონს აჯობა.
- რა დონის შეჯიბრებაზე გვაქვს საუბარი და რას ნიშნავს ეს ტიტული თქვენთვის?
- მოგესალმებით, ჩემპიონთა ლიგა არის ყველაზე პრესტიჟული ტურნიტი კლუბურ დონეზე. ყველა ფრენბურთელის ოცნებაა, რომ ამ დონეზე იმოღვაწეოს და შეძლოს თავის წარმოჩენა. შესაბამისად, ეს წარმატება ჩემთვის ძალიან ბევრს ნიშნავს, დიდი ხნის განმავლობაში ვერც კი ვიაზრებდი, რა ხდებოდა ჩემს თავს. ახლა რაც დრო გავიდა, ნელ-ნელა უკვე ვიაზრებ და ნამდვილად სასიამოვნოა ეს ყველაფერი.
- რატომ ფრენბურთი?
- პატარაობიდან ბევრ სპორტთან მქონდა შეხება, მაგრამ საბოლოოდ მაინც ფრენბურთზე შევაჩერე არჩევანი. ეს სპორტი ყველაზე მეტად შემიყვარდა და სწორედ აქ ვიპოვე ჩემი თავი.
- 2020 წლიდან ანა პოლონური კლუბ “დოლინა ჟეშუვეს” ფრენბურთელია. მანამდე იყო ასევე პოლონური კლუბი “ლოძი", უფრო ადრე კი ის ბერძნულ მარკოპულოს, თურქული სამსუნსპორისა და ასევე თურქული ანკარაშის ღირსებას იცავდა.
- საკმაოდ დიდი გამოცდილება გაქვს ამ სპორტში და სხვადასხვა ქვეყნებშიც მოგიწია თამაში, როგორ ვითარდებოდა შენი სპორტული კარიერა?
- რაც ჩეეხება ჩემი სპორტული კარიერის განვითარებას, ყოველი მომდევნო წელი წინისგან უკეთესი იყო. ბევრი წინააღმდეგობა შემხვდა, ბევრი არასაჭირო და არასამართლიანი ფაქტებიც იყო, რამაც უკან დამხია და ვფიქრობ, რომ არა ისინი, შეიძლება ახლა ბევრად წინ ვყოფილიყავი. მიუხედავად ამისა, მე ყოველთვის ვცდილობ მოცემული სიტუაციიდან მაქსიმალური შედეგი დავდო და საბედნიეროდ, ეს ასე მოხდა.
- ახალგაზრდა ფრენბურთელი სპორტული ოჯახიდანაა. მისი მამა ტიტე კალანდაძე საქართველოს ხელბურთის ნაკრების ყოფილი ლიდერი და პროფესიონალი ხელბურთელი გახლდათ, დედა კალათბურთელი, ძმა კი ასევე წარმატებული ხელბურთელია.
- ოჯახი ჩემს ცხოვრებაში ყველაზე მნიშვნელოვანი რამ არის. როგორი პიროვნება ვარ, რას წარმოვადგენ სპორტში, ეს ყველაფერი აბსოლუტურად ჩემი ოჯახის დამსახურებაა. ძალიან იღბლიანი და მადლიერი ვარ, რომ ასეთ ოჯახში გავიზარდე.
- რას ნიშნავს თქვენთვის ეროვნული ნაკრების კაპიტნობა?
- ეროვნული ნაკრების ფორმით თამაში ჩემთვის ერთდროულად არის სასიამოვნო და საამაყო, ასევე საპასუხისმგებლო და ცოტა რთულიც. ფრენბურთი ეროვნულ დონეზე ძალიან სასიამოვნო საყურებელია და იმედი მაქვს, რომ მალე შევძლებთ პირველ რიგში ქართველი ხალხის გულების გახარებას და შემდეგ უკვე საზღვარგარეთ ჩვენი სახელის დამკვიდრებას საერთაშორისო ასპარეზზე.
- როგორი არის თქვენი ცხოვრების სტილი და რა უნარ-ჩვებებს გაძლევს ფრენბურთი?
- ფრენბურთი, როგორც ყველა სპორტი, ცხოვრების სტილია. ყველანაირად ვართ დამოკიდებული და ჩაფლული ამ საქმეში. სპორტი გვასწავლის ცხოვრებას და ის საზოგადოებაში სრულფასოვან და პატივსაცემ ადამიანად გაყალიბებს. სულ რამდენიმე რომ ჩამოვთვალო, ეს იქნება დისციპლინა, რეჟიმი, მენტალური სიძლიერე და ბრძოლისუნარიანობა.
- რაზე ოცნებობდი ბავშვობაში?
- ოცნებას მე ისეთ რაღაცეებს ვეძახი, რაც შეიძლება შეუძლებელთან ახლოს იყოს, ამიტომ ბავშვობიდან მქონდა მიზნები. ეს მიზანი იყო უმაღლეს დონეზე ასპარეზი. ოცნება შეიძლება ვუწოდო იმ ფაქტს, რომ ბავშვობიდან მინდოდა ოლიმპიადაზე მონაწილეობა და საქართველოში უმაღლესი ლიგის უმაღლეს დონეზე ასპარეზი. ეს ორი რამ ძალიან შორს არის რეალობასთან ჩემი კარიერის განმავლობაში, ამიტომ მოვიხსენიებ მათ როგორც ოცნებებს.
- წარმატებული სეზონი უკვე დაასრულეთ. რომელ კლუბში გააგრძელებთ მოღვაწეობას და რა გაქვთ პროგრამა მინიმუმი ახალი სეზონისთვის?
- ახალ სეზონს ისევ იმავე გუნდში გავატარებ. მიზნები ისევ და ისევ რჩება პირველი ადგილი ნებისმიერ შიდა ტურნირზე და ჩემპიონთა ლიგის შედეგის გაუმჯობესება, რამდენადაც ეს იქნება შესაძლებელი.
- იმ ახალგაზრდებს ვისაც არ აქვთ სპორტთან შეხება, ურჩევდით თუ არა ფრენბურთზე შესვლას და რატომ?
- რა თქმა უნდა, ყველა ახალგაზრდას ვურჩევდი ამ სპორტით დაკავებას. პირველ რიგში სიამოვნების და სიყვარულის გამო, რადგან უნდა გიყვარდეს ის, რასაც აკეთებ. შემდეგ უკვე ცხოვრების გზა განახებს, რამდენად იქნება ეს შენი ცხოვრების წესი, მაგრამ ცდად ყველას ვურჩევდი ამ ლამაზ სპორტს.
- უნდა ვიკითხოთ პირად ცხოვრებაზეც, რა ხდება ამ კუთხით?
- პირად ცხოვრებას რაც შეეხება, ჯერჯერობით არაფერი ხდება, ესეც ალბათ ჩემი ცხოვრების სტილის დამსახურებაა, მაგრამ არა უშავს, ალბათ, ყველაფერს თავისი დრო აქვს.
ერთ-ერთი საუკეთესო ქალი სპორტსმენი საქართველოში და ულამაზესი და უნიჭიერესი გოგონა.
მაგარი გოგო, ღერთმა გაუმარჯოს შენს ოჯახს და საქართველოს.
შენი დიდი ოცნებები აგხდენოდეს, ერის გასახარად.