"ნიას მამამ სიურპრიზი გაუკეთა..." - ვინ არის რუსეთში მცხოვრები ქართველი "კანონიერი ქურდი", რომლის შვილის დაბადების დღე სკანდალად იქცა: ნიას დედის, მსახიობ ენდი ძიძავას კომენტარი
22 ივნისს, მოსკოვში გამართულ წვეულებას, რომელსაც საქართველოდან ჩასული მომღერლები ესწრებოდნენ, სოციალურ ქსელში სერიოზული გამოხმაურება მოჰყვა. გავრცელებულ ვიდეოებში, რომელიც ერთ-ერთ რესტორანშია გადაღებული ჩანს, რომ წვეულებას ესწრებიან მომღერლები ნუცა ბუზალაძე, მეგი გოგიტიძე, დათო ხუჯაძე, მიშა სულუხია, ხვიჩა მაღლაკელიძე. საღამოს ესწრება ასევე სოსო პავლიაშვილიც, რომელიც სხვა ქართველებთან ერთად "სამშობლოს“ მღერის.
ბანერზე, რომლის ფონზეც ქართველები მღერიან წერია Happy birthday Nia. მედიაში გავრცელებული ინფორმაციით, იუბილეს ქართველი კანონიერი ქურდის ბადრი კოღუაშვილის (ქუთაისკის) ქალიშვილი, ნია კოღუაშვილი აღნიშნავდა.
მომღერალი მიშა სულუხია სოციალურ ქსელში წერს, რომ მოსკოვში 6 წლის უნახავი მეგობრის დაბადების დღეზე ჩავიდა.
"უიჰ, როგორც იქნა მეც გავეხვიე ერთ ნორმალურ სკანდალში. კი ოკუპანტ ქვეყანაში 6 წლის უნახავი დის სანახავად და მეგობრის დაბადების დღეზე ჩავედი, ჩემი მეგობრის. სცენაზეც ავედი. ვინმეს მართლა ჰგონია, რომ ეს კონცერტი იყო და ამაში ფული ავიღე? - არა, არ არის მართალი.
საზოგადოების მოტყუება ცუდი საქმეა, არ ვიცი, ეს ვინ გააკეთა, მაგრამ იცოდეთ რომ ეს არც კონცერტი და არც არანაირი მნიშვნელობის მქონე ღონისძიება არ ყოფილა. ქართველი გოგონას დაბადების დღე იყო და იქ შეკრებილი ადამიანებიც ქართველები იყვნენ...
საჯარო შეფასებების დროს სწორი ინფორმაციის ცოდნა და უფრო მეტი ინტელექტის გამოვლენაა საჭირო, ვიდრე სოსო პავლიაშვილის გვერდით დადგომა სამშობლოს ღალატად ფორმულირებაა..."
- სოციალურ ქსელში წერენ, რომ ნუცა ბუზალაძეც მეგობრის დაბადების დღეზე იყო ჩასული და მას ამისთვის ჰონორარი არ აუღია.
ვინ არის ბადრი კოღუაშვილი
ბადრი კოღუაშვილი (ქუთაისკი) ერთ-ერთი ყველაზე ავტორიტეტული ქურდია. რუსულ მედიაში მას კრიმინალურ სამყაროში პირველ ნომერსაც კი უწოდებენ.
კოღუაშვილი რუსეთის დამნაშავეთა სამყაროს ლიდერის კალაშოვის (შაქრო მალადოი) მოსკოველ მემკვიდრედ ითვლება. ბადრი კოღუაშვილი საქართველოში წლებია არ ჩამოსულა. ბოლო წლებში ის რუსეთში, უკრაინაში, თურქეთსა და ბელარუსში გადაადგილდებოდა.
ნია კოღუაშვილი ბადრი კოღუაშვილისა და ენდი ძიძავას საერთო ქალიშვილია. ქალბატონ ენდის ქართული საზოგადოება კარგად იცნობს, ის ქუთაისის ლადო მესხიშვილის სახელობის დრამატული თეატრის მსახიობია, თამაშობდა სერიალ "ჩემი ცოლის დაქალებში,“ სადაც ჩიკას დედას ასახიერებდა.
ქალბატონმა ენდიმ მომხდარის შემდეგ სოციალურ ქსელში სტატუსი გამოაქვეყნა...
"მზად ვარ ნებისმიერ ჟურნალისტთან გავაკეთო კომენტარი ჩემი შვილის დაბადების დღესთან დაკავშირებით, რომელიც მის დაბადების დღეს 22 წლის განმავლობაში მეორედ შეხვდა მამასთან ერთად! ნიას მამა მის დაბადებასაც არ დასწრებია...
ყველა იქ მყოფი მომღერალი ოჯახის უახლოესია და შეწყვიტეთ მათზე ცილისწამება თანხების აღებასთან დაკავშირებოთ! ვინც მიცნობს ყველამ იცის, რომ არ მჩვევია დამალვები. პასუხები ყოველთვის მაქვს კითხვებე. აქ ვარ! მკითხეთ და გიპასუხებთ!
იქამდე კი, კიდევ ერთხელ დავწერ.
ამ ადამიანებს ჰყავთ ოჯახები. აქვთ ლხინის და ჭირის დღეები და მინიმუმ ამ დღეებში უნდა ჰქონდეთ უფლება რამოდენიმე დღით სამშობლოში დაბრუნების, თუმცა...
გრუზ 200-ზე რომ ატყდება ხოლმე ამბავი, ამის მერე რა გინდა თქვა ადამიანმა?.."
Ambebi.ge ქალბატონ ენდის, კომენტარზე დაუკავშირდა, ჩვენთან საუბარში განაცხადა, რომ ნია მამას იშვიათად ნახულობს და სწორედ მამის სურვილი იყო, რომ ოქროს იუბილე შვილთან ერთად გაეტარებინა. თავად კი მოსკოვში არ ყოფილა, როგორც ჩვენთან საუბარში აღნიშნა, ის და მისი შვილის მამა კარგა ხანია არ ცხოვრობენ ერთად.
- ნია საქართველოში ცხოვრობს. მას იმდენად უყვარს საქართველო, რომ საფრანგეთი დატოვა, სადაც წარმატებული სტუდენტი იყო და საქართველოში ჩამოვიდა. ეროვნულ გამოცდებზე გავიდა და მედიცინის ფაკულტეტზე ჩააბარა. აქაც ერთ-ერთი ყველაზე საუკეთესო სტუდენტია.
აქვე თეატრის სიყვარულით (მსახიობობა უნდოდა) შოთა რუსთაველის სახელობის კონოსა და თეატრის სახელწიფო უნივერსიტეტის თეატრმცოდნეობის ფაკულტეტის სტუდენტია.
რაც შეეხება დაბადების დღეს, ნია მამას უიშვიათესად ნახულობს. ახლა ოქროს დაბადების დღე ჰქონდა და მამამ სთხოვა მასთან გაეტარებინა სულ რაღაც ორი დღე. სიურპრიზი გაუკეთა და მის დაბადების დღეზე უახლოესი ადამიანები შეკრიბა. ეს იყო და ეს. ახლა უკვე საქართველოშია. გუშინ დილით ჩამოფრინდა.
წაიკითხეთ ასევე: