გადამწვარი, გმირი ქალაქი, რომელიც ისევ დგას - როგორია ვითარება ბახმუტთან: ბოლო ცნობები ომის ყველაზე ცხელი წერტილიდან

უკრაინული ციხე-სიმაგრე, ქალაქი ბახმუტი მე-9 თვეა აუღებლად რჩება. უკრაინელები მზად არიან, ის ყველაფრის ფასად დაიცვან.

• პარალელურად ბახმუტის შემოგარენში მტრის სუსტ ფლანგებს პერიოდულად არღვევენ და შესაძლოა, უახლოეს მომავალში მასშტაბური კონტრშეტევაც განახორციელონ.

გმირი ქალაქი ფაქტობრივად, გადამწვარია, თუმცა მაინც დგას. 9 თვის განმავლობაში რუსებმა ბახმუტის ასაღებად თითქმის ყველანაირი შეიარაღება გამოიყენეს. გასულ კვირას უმართავ ცეცხლგამჩენ ბომბებსაც მიმართეს. ამჟამად უკრაინელებს ქალაქში მყოფი ჯარისკაცებისთვის ერთადერთი მომარაგების გზაღა აქვთ დარჩენილი. ჩასივ იარიდან ივანივსკის მიმართულებით. მათ შესაძლებლობა რჩებათ, რომ ბახმუტს არ მოწყდნენ და მომარაგების პროცესი მეტ-ნაკლებად შეუფერხებლად გააგრძელონ.

არ არსებობს ზუსტი მონაცემი ქალაქის აღება/დაცვას რამდენი ადამიანის სიცოცხლე შეეწირა. დანაკარგი ორივე მხრიდან დიდია. ბახმუტის მნიშვნელოვანი ნაწილი განადგურებულია, მათ შორის საუბარია სამოქალაქო ობიექტებსა და კრიტიკულ ინფრასტრუქტურაზე.

გუშინ, 13 მაისს მეფე დანილოს სახელობის 24-ე მექანიზირებულმა ბრიგადამ ბახმუტის ამსახველი, დრონით გადაღებული კადრები გაავრცელა.

"ასე გამოიყურება ამ წუთებში ბახმუტი. შესაძლოა, მოგეჩვენოთ, რომ ნისლია, მაგრამ ეს ხანძრებისა და ჭურვების დაკვამლიანებაა. სასოწარკვეთილი მტერი ჩვენი დაცვის გარღვევას ცდილობს.

არტილერიის ცეცხლი, სარაკეტო და ავია დარტყმები ერთი წუთითაც არ წყდება. ქალაქის თითოეული მეტრი ცეცხლის ქვეშაა“, -წერია გამოქვეყნებულ ინფორმაციაში.

უშუალოდ ბახმუტისთვის ბრძოლა გასული წლის აგვისტოში დაიწყო. უკრაინელები არც ერთი მეტრის დათმობას არ აპირებენ და სამშობლოს მტრისგან ღირსეულად იცავენ.

• რუსეთის თავდაცვის სამინისტრო ადასტურებს, რომ ბახმუტთან, საბრძოლო მოქმედებებისას ორი რუსი პოლკოვნიკი დაიღუპა.

როგორც მედია შოიგუს უწყებაზე დაყრდნობით წერს, დაიღუპნენ რუსეთის არმიის მე-4 მოტორიზებული მსროლელი ბრიგადის მეთაური, პოლკოვნიკი ვიაჩესლავ მაკაროვი და სამხედრო-პოლიტიკური მუშაობისთვის საარმიო კორპუსის მეთაურის მოადგილე, პოლკოვნიკი ევგენი ბროვკო.

ავტორი: ანრი კურტანიძე