"მადლობა, დედა" - როგორ ულოცავენ დედებს პოლიტიკოსები დედის დღეს?
ბოლო წლებია სოციალური ქსელში დღესასწაულების აღნიშვნა და ერთმანეთისთვის მილოცვა ტრადიციად იქცა.
3 მარტს საქართველოში დედის დღე აღინიშნება, გადახედოთ ცნობილი პოლიტიკოსები როგორ ულოცავენ დედებს და ახლობლებს დღევანდელ დღეს.
დედასთან, მეუღლესთან და შვილებთან ერთად გადაღებულ ფოტოს აქვეყნებს საპარტნიორო ფონდის ხელმძღვანელი დავით საგანელიძე და წერს:
"გილოცავთ დედის დღეს, ძვირფასო ქალბატონებო, ძვირფასო დედებო! ვულოცავ შვილებს, მშობლებს, ბებიებს. ვულოცავ ჩემს უძვირფასეს დედას და ჩემს სოფოს!თითოეულ დედას ვუსურვებ, გეხაროთ თქვენი შვილების ბედნიერებით".
დედასთან ერთად გადაღებულ ფოტოს აქვეყნებს პარტიის "საქართველოსთვის" ერთ-ერთი ლიდერი ნათია მეზვრიშვილი. "დედის დღეს გილოცავთ ყველაზე მებრძოლ და სწორი ღირებულებების ქალბატონ დედასთან ერთად!", - წერს ის.
ამავე პარტიის კიდევ ერთი წარმომადგენელი კახა ქემოკლიძე კი წერს:
"აქამდე არასოდეს მიმილოცია დედის დღე საჯაროდ დედაჩემისთვის. ცხოვრების წესად მქონდა ოჯახის წევრების არ გამოჩენა სოციალურ ქსელებში ან ღია წყაროების სხვადასხვა საშუალებებში . დღეს ეს ტრადიცია “დაემხობა . “მარინა ექიმო” (ასე მივმართავ ხოლმე შინაურულად) დედის დღეს გილოცავ და მინდა, ჯანმრთელი იყო, რადგან სხვა ყველაფერს ეშველება!
P.S. ვინც არ გიცნობს მათთვის ვიტყვი. ერთი შეხედვით ეს მომცრო, ჩია ქალი ძალიან ძლიერი პიროვნებაა. პროფესიონალიზმის, უშიშარობის, გამბედაობის, ბრძოლის, კეთილსინდისიერების, თავმდაბლობის, კარგი დედობის ნამდვილი მაგალითი ჩემთვისაც და ბევრისთვის ვინც მას უშუალოდ იცნობს ან შეხება ჰქონია .ყველა კარგ ადამიანს ვულოცავ თავისი მშობელი დედის დღეს!"
"ყველა დედას გილოცავთ დღევანდელ დღეს!" - წერს დეპუტატი სალომე სამადაშვილი და დედასთან ერთად გადაღებულ ბავშვობის ფოტოს აქვეყნებს.
"დედის დღეს გილოცავ ყველაზე საუკეთესო დედას დღეს, ბევრს საჯაროდ ვერ დავწერ იმდენად მამძიმებს რეალობა , რომელშიც ჩვენი დედა-სამშობლოა…
მადლობა რომ მასწავლე ასეთი სიყვარული… სიკეთე, უანგარობა, საკუთარ თავზე მეტად ვინც გიყვარს მისი ინტერესის გათვალისწინება, ერთგულება, თავგანწირვა, ზრუნვა , შრომისმოყვარეობა, პასუხისმგებლობა... ამ ყველაფერს ატარებ და ამ მაგალითით ვიზრდებოდით…
საუკეთესო დედა ხარ და ყოველთვის, განკითხვის გარეშე იდექი ყველგან სადაც მჭირდებოდი… არასოდეს გითქვამს არ წახვიდე - როდესაც სიკვდილ - სიცოცხლის ზღვარზე გადიოდა ჩემი ქუჩაში დგომა სხვისი თავისუფლებისთვის… "ფრთხილად იყავი, დედა”. - მხოლოდ ეს სიტყვები მომყვებოდა სახლიდან გასულს და მალულად პირჯვარს გადამწერდი… გუშინაც როცა თბილისში ჩამოვედი და რუსთაველზე პარლამენტის წინ გავრბოდი, ვიცი ზუსტად მიხვდი არაფერი გამაჩერებდა სახლში... ასე ვიარეთ და ასე ვისწავლე როგორი დედა უნდა ვიყო მადლობა დედა რომ ხარ სამყაროს ცა და საყრდენი დედამიწაზე გილოცავ დედის დღეს
# არა რუსულ კანონს!", - წერს პოლიტიკოსი ეკა ბესელია.
თეონა აქუბარდია, პარლამენტარი:
"დედის დღეს გილოცავთ ყველა დედას და შვილს. ეამაყოთ თქვენით დედებს. დედის დღეს განსაკუთრებულად ვულოცავ გმირების დედებს და მადლობა მათ ასეთი შვილების გაზრდისთვის. ესეც დედა ახალგაზრდობაში".
"ჩემს დედიკოს და ყველა დედას გილოცავთ დღევანდელ დღეს", - წერს "ნაციონალური მოძრაობის" თავმჯდომარე ლევან ხაბეიშვილი ფოტოს წარწერაში, რომელსაც "ფეისბუქზე" აქვეყნებს.
"ჩემი დედა მართლა ლამაზია ოღონდ. ამის სათქმელად გამოვიყენებ დასვენების დღეს", - წერს "ევროპული საქართველოს" წარმომადგენელი თამარ ჩერგოლეიშვილი და დედასთან ერთად გადაღებულ ბავშვობის ფოტოს აქვეყნებს.