"ეს ნახატს იდუმალ სახეს აძლევს.." - მხატვარი, რომელიც განსხვავებული ტექნიკით ხატავს და კვერცხის გულზე დამზადებულ საღებავებს იყენებს
ადრე ინტერვიუში მითხრა, - "ჩემმა ნამუშევრებმა მინდა, სიხარული გამოიწვიოსო." მისი ნახატები მნახველის მოწონებას ნამდვილად იმსახურებს. აქტიური მხატვარია, აღფრთოვანებას და სიამოვნებას აუდიტორიას მუდმივად ანიჭებს. ბექა ხუცურაულთან ფერს უდიდესი დატვირთვა აქვს და ნამუშევრებში დიდი სითბო იგრძნობა.
ბავშვობაში არასდროს დაუხატავს, მაგრამ მას მერე, რაც ხატვა დაიწყო, არ გაჩერებულა. დღე ისე არ ჩაივლის, თავის მორიგი ახალი ჩანაფიქრი ტილოზე არ გადაიტანოს. ეს პროცესი მისთვის უზომოდ დიდი სიამოვნებაა. ხატავს ზეთის საღებავებით ტილოზე და მუშაობს საუკეთესო მასალით. ბოლო დროს მის შემოქმედებაში რაღაც ახალი მიმართულება გაჩნდა, თითქოს ის კაშკაშა ფერები სადღაც გაქრა.
თავად ამბობს, რომ ეს სიახლე სულაც არ არის, ასე ადრეც მუშაობდა, ახლა უბრალოდ მიუბრუნდა კვერცხის გულზე დამზადებულ საღებავებს. ეს კი ლევკასის ტექნიკაა, რაც ძალიან საინტერესო პროცესია.
- ბექა ხუცურაული:
- ჩემთვის ხატვა და ზოგადად ხელოვნება სიახლის ძიებასთან ასოცირდება, სხვაგვარად ძალიან მოსაწყენი იქნებოდა. შემოქმედება დაუღალავი შრომაა, მაგრამ თუ ის სიახლის შექმნას არ ემსახურება, მხოლოდ რუტინულ შრომად იქცევა და ადრე თუ გვიან დაგღლის. ამიტომ ახალი აუცილებელია, ახალი საფეხურიდან კარგად ჩანს განვლილი გზაც და მომავლის პერსპექტივაც, თუმცა ეს არ ნიშნავს, რომ ძველი უნდა დაივიწყო.
- სად გაქრა შენი კაშკაშა ფერები, რომლითაც უამრავი ადამიანის მოხიბვლა შეძელი?
- ჩემი ფერები არსად გაქრება, ის ჩემში სრულად გამჯდარია და ვერ დავივიწყებ. ზეთის საღებავებით ხატვა დიდი სიამოვნებაა და ამას ვერასოდეს შეველევი, ეს ჩემი სულის ამოძახილია. ჩემი ქვეყნის ბუნების სიყვარული მახატვინებს და რა უფლება მაქვს, დავივიწყო?! მაგრამ არის პერიოდები, როდესაც "გაღვიძებას“ ველოდები და ამ დროს სიახლის ძიებას ვუთმობ.
- ე.ი. ლევკასის ტექნიკა და ტემპერა ეს ახალი ხომ? რა ტექნოლოგიაზეა საუბარი?
- ლევკასი ბერძნული სიტყვიდან მოდის, - leukos - თეთრს ნიშნავს და ეს არის გრუნტი, რომელსაც ფერწერისთვის ადრეული პერიოდიდან ხის ზედაპირის დასაფარად იყენებდნენ. ხატწერაში კი დღემდე გამოიყენება და ეს სიახლე არაა. არსებობს დაგრუნტვის რამდენიმე სახეობა და ძალიან საინტერესო პროცესია. აქ მთავარია, იცოდე რისი დახატვა გსურს, რომ გრუნტიც შესაბამისი შეურჩიო. შემდეგ კი იხატება ტემპერას საღებავით ან პიგმენტებით, რომელიც კვერცხის გულსა და წყალში იხსნება. ხატვისას ვიღებ სიძველის ეფექტს, რაც ძალიან მომწონს. ეს სტილი ტილოზეც მოვსინჯე და მოწონება დაიმსახურა, ვფიქრობ, ამ მიმართულებითაც ვიმუშავებ.
- რთულია ამ მეთოდით ხატვა?
- ადვილი ნამდვილად არაა, რადგან ტემპერა და ზოგადად წყლის ან კვერცხის გულის გამხსნელით შეზავებული საღებავები თავისებურ ხატვის ტექნიკას მოითხოვს. თუ მაგალითად ზეთის საღებავით ხატვისას მსუყე მონასმი ტილოს ამშვენიერებს, ამ შემთხვევაში პირიქითაა, თხელი, გამჭვირვალე ფენები იძლევა ჰაეროვნებას. ჩემთვის ინსპირაცია მერაბ აბრამიშვილიდან წამოვიდა. ბატონი მერაბი საოცარი და უნიჭიერესი მხატვარი იყო. მისი სტილი, გემოვნება, ფერები, ტექნიკა კომპლექსურად ქმნის დიდებულ ჰარმონიას, სულ გინდა უყურო.
- ბევრი არ ხატავს, ხომ ასე?
- ასეთი სტილით ბევრი არ ხატავს, თუმცა არიან მხატვრები, რომლებიც მუშაობენ ამ ტექნიკით და ძალიან საინტერესოდ, მაგრამ აბრამიშვილი ჩემთვის მაინც გამორჩეული და ძვირფასია.
- რა დრო სჭირდება ყოველ ახალ ნამუშევარს?
- მთავარი მაინც იდეაა, ეს თუ ვიცი, მხოლოდ იმის ფიქრში ვარ, როგორ განვახორციელო და სხვა აღარაფერი მახსოვს, ამიტომ მუშაობაში შეიძლება დამათენდეს კიდეც. საკმაოდ დიდი დრო მიაქვს გრუნტის მომზადებას, შეიძლება რამდენიმე ფენა გახდეს საჭირო და აუცილებლად კარგად უნდა გაშრეს. ამიტომ გრუნტით დაფარვას წინასწარ ვაკეთებ. შემდეგ კი აუცილებელია, კომპოზიციის სწორედ განაწილება და ფერების ზუსტად შერჩევა. ზეთის საღებავთან შედარებით, მალე შრება, მაგრამ მთლიანობაში მაინც დიდი დრო მიაქვს.
- თემატიკაც აქ თითქოს განსხვავებული გაქვს, ხომ?
- დიახ, ეს სტილი უფრო დეკორატიულია, ვიდრე რეალისტური. ვხატავ არქაულ, უძველეს ნაივურ ფიგურებს, ცხოველებს, მცენარეებს, ეს ნახატს იდუმალ და მისტიკურ სახეს აძლევს, რაც ჩემთვის ძალიან საინტერესოა, ფერებიც უფრო მიწიერი და ნატურალურია, ერთმანეთში გარდამავალი და არა კონტრასტული. თან, არის და თან არა.
- რომელი უფრო სასიამოვნო პროცესია - პირდაპირ ტილოზე რომ ხატავ თუ, ეს?
- ვერასოდეს დავხატავდი, საერთოდ რომ არ მსიამოვნებდეს. ხატვის პროცესი, ეს არის გზა დამარცხებებით და გამარჯვებებით, დაცემით და წამოდგომით, მწუხარებით და სიხარულით, სულ იბრძვი, რომ გაიმარჯვო და თუ არ იბრძვი და მზად არ ხარ გამარჯვებისთვის, არც უნდა დაიწყო. ეს ძალიან დამთრგუნველი იქნება და შეიძლება დახატვის სურვილიც აღარ გაგიჩნდეს! ასე რომ, ხატვა სულ სასიამოვნოა, გინდ ქაღალდის მცირე ნაწილზე ხატავდე. მთავარია, გინდოდეს.
- გამოფენისთვის ხომ არ ემზადები?
- ძალიან დიდი სურვილი მაქვს, იმედია, გავუკეთებ ორგანიზებას. საკმაოდ დიდ რესურსს მოითხოვს და ვეცდები, მოვახერხო. დიდია ინტერესი, თითქმის დღე არ გავა, არ მკითხონ, როდის ვგეგმავ გამოფენას, რაც ძალიან მახარებს და ამავდროულად დიდ პასუხისმგებლობას ვგრძნობ. აუცილებლად იქნება და ამას ყველა გაიგებს.