"მათზე ბინების გაქირავება შეიზღუდა... სხვა ქვეყნებში წასვლას განიხილავენ და მათ შორის, საქართველოში" - რა პრობლემები ექმნებათ თურქეთში რუსებს და რას ჰყვებიან იქ მცხოვრები ქართველები
"რაც დრო გადის, რუსეთის სულ უფრო მეტი მოქალაქე ჩამოდის თურქეთში, რასაც ადგილობრივები, მათი ქმედებებიდან გამომდინარე, შიშით უყურებენ. სახლდებიან კომპაქტურად, ნაწილობრივი მობილიზაციის გამოცხადების შემდეგ, მათი რაოდენობა ერთბაშად გაორმაგდა და ყოველ დღე ემატება.
რუსები, რომლებიც უკვე აქ მანამდეც ცხოვრობდნენ და უძრავი ქონების მფლობელებიც არიან, ბინებსა და სახლებს მხოლოდ რუსებზე აქირავებდნენ. მთლიანობაში, ისნი თავიანთი ცხოვრების წესს ამკვიდრებენ. ხელისუფლებამ რუსეთის მოქალაქეეების მოჭარბების გამო, გარკვეულ ქალაქებში მათზე ბინების გაქირავება შეზღუდა, თუმცა, გამოსავალი იპოვეს", - ამბობს Ambebi.ge-სთან ქართველი ემიგრანტი, ლელა ქავთარაძე, რომელიც წლებია თურქეთში ცხოვრობს.
მისივე თქმით, შეზღუდვა ეხება რუსეთიდან თურქეთში წასული ადამიანების ახალ ნაკადს.
"ადრე ის, ვინც 250 ათასი დოლარის და მეტი ღირებულების უძრავ ქონებას შეიძენდა, თურქეთის მოქალაქეობას, ან ბინადრობის უფლებას იღებდა. ახლა ბინადრობის უფლების პროცედურები გართულდა. ეს მასობრივად შემოდინებამ განაპირობა. რუსეთიდან ბევრი ადამიანის შემოსვლა ადგილობრივებისთვის უკმაყოფილების მიზეზად იქცა", - ამბობს ქართველი ემიგრანტი.
- ანტალიაში მცხოვრები ქართველის, ლევან დოლიძის თქმით კი, რუსები ამ ყველაფრის გამო, უკმაყოფილებას გამოთქვამენ, რადგან მიაჩნიათ, რომ ქვეყნის ბიუჯეტის შევსებაში მათი წვლილი მნიშვნელოვანია.
"თუმცა ბოლო ხანებში, ახალი ინიციატივის გამო, რომლის ფარგლებშიც, რუსებისთვის ბინადრობის გაუქმების ფაქტები გახშირდა, რუსებმა გამოსავლის პოვნა დაიწყეს. ცხადია, რუსეთში დაბრუნებაზე ჯერჯერობით არავინ ფიქრობს, რადგან მობილიზაციის მესამე ეტაპს ელოდებიან.
ადგილობრივები ამბობენ, რომ უკვე ცოტათი დაგვიანებულია, მაგრამ მაინც კარგია, რომ ბოლო ხანებში ტურისტულ ზონებში ბინების გაქირავების უფლება შეეზღუდათ, რადგან ანტალია, ქემერი, ბოდრუმი, ფაქტობრივად, რუსულმა ბიზნესმა იყიდა. ზოგი, ვისაც ნაყიდი არ ჰქონდა, მაგრამ მთელი წლით ჰქონდა ნაქირავები უძრავი ქონება, ახლა ცდილობს ის სხვა ქვეყნის მოქალაქეებზე გადააქირავოს.
არის ადგილები, რაიონები, ქალაქები, ტურისტული ზონები, სადაც რუსებმა გამოსავალი იპოვეს და ომის შემდეგ შემოსულ უკრაინელებთან შევიდნენ გარიგებაში, ანუ ამბობენ, რომ ბინებს კი არ აქირავებენ, უკრაინელების წინაშე თავს დავალებულად ვგრძნობთ და უფასოდ ვუშვებთო. სინამდვილეში, სიტყვიერი შეთანხმების საფუძველზე აქირავებენ, როვორც საცხოვრებელ ასევე კომერციულ ფართებს.
პირიქითაც ხდება - უკრაინელებს აქვთ უძრავი ქონება ნაყიდი და რუსებს უშვებენ ქირით, რა ვქნათ, ეს არის ჩვენი შემოსავალიო. ანუ ერთმანეთის ბიზნესს კვებავენ. სამართალდამცავებმა სმს მიმოწერები ამოიღეს, ანუ ბიზნეს სქემა გაშიფრეს. ამიტომ, უკვე ვრცელდება ცნობები იმაზე, რომ ბინებისა და კომერციული ფართების გაქირავება, შესაძლოა, უკრაინელებსაც შეეზღუდოთ", - ამბობს ქართველი ემიგრანტი.
კიდევ ერთი ქართველი ემიგრანტის თქმით, ადგილობრივებსა და სხვა ქვეყნის მოქალაქეებს ეგონათ, რომ "ერთმანეთთან (რუსებსა და უკრაინელებს) კონფლიქტი ექნებოდათ, მაგრამ ძალიან შეთანხმებულად მოქმედებენ. ცხადია, ეს ყველას არ ეხება, არის ადგილები, სადაც ერთმანეთს კრიჭაში უდგანან, რუსი ცდილობს უკრაინელის დროშა ჩამოგლიჯოს და პირიქით. ასეთ შემთხვევებში, რახან საერთო ვითარება შეიცვალა, რუსები, რომელთაც იქ თავის დამკვიდრება გაუჭირდათ, რამდენიმე ქვეყანას განიხილავენ ახალ საცხოვრებლად და ერთ-ერთი საქართველოა", - ამბობს ნინო გაიელი.