პარტნიორები:
    ავტორი:

    "მსაჯმა მისი დაცვა ვერ შეძლო..." - "ნაპოლის" პირველი მარცხი სერია A-ს მიმდინარე სეზონში და უკიდურესად უხეში თამაში "კვარას" წინააღმდეგ

    "მსაჯმა მისი დაცვა ვერ შეძლო..." - "ნაპოლის" პირველი მარცხი სერია A-ს მიმდინარე სეზონში და უკიდურესად უხეში თამაში "კვარას" წინააღმდეგ

    4 იანვარს, იტალიის სერია A-ს მორიგ ტურში "ნაპოლი“ მილანის "ინტერს“ სტუმრად დაუპირისპირდა და ამ სეზონში პირველი მარცხი იწვნია. ხვიჩა კვარაცხელიას გუნდი ანგარიშით 1:0 დამარცხდა. ქართველმა მარცხენა გარემარბმა მოედანზე 75 წუთი დაყო, ეს იყო ტრავმის შემდგომ ოფიციალურ მატჩში მისი პირველი გამოჩენა. ის ნამდვილად ვერ ბრწყინავდა ძველებურად, თუმცა ამის მთავარ მიზეზებად თავად "ნაპოლის" არცთუ კარგი თამაში და მეტოქე გუნდის უხეშობა შეიძლება დასახელდეს. თამაშის წინ ბევრი იწერებოდა, თუ როგორ დაგეგმავდა "ინტერის" მწვრთნელი სიმონე ინძაგი დაცვას და როგორ გააჩერებდა "ნაპოლის" შემტევ ფეხბურთელებს, მათ შორის უპირველესად, კვარაცხელიას. როგორც მატჩში ვნახეთ, სამწუხაროდ, ინძაგის გეგმა "კვარას" გასაჩერებლად, მის წინააღმდეგ უკიდურესად უხეში თამაში აღმოჩნდა, რასაც მსაჯმაც შეუწყო ხელი. ხვიჩა რამდენჯერმე სერიოზულ ტრავმას გადაურჩა, თუმცა მსაჯმა ყოველ ჯერზე ეს ვერ თუ არ დაინახა...

    რამდენიმე იტალიურმა გამოცემამ "ნაპოლის" ფეხბურთელები შეაფასა, ჩვენს ინტერესს კი ყველაზე მეტად, რა თქმა უნდა, ხვიჩა კვარაცხელია იწვევს.

    გთავაზობთ მათ კომენტარებს:

    "ყველამ ვიცოდით, რომ დაბრუნების შემდეგ ადვილი მატჩი არ ექნებოდა. მის წინააღმდეგ ბევრჯერ იუხეშეს. ოსიმენს რეალური მომენტი შეუქმნა, როდესაც ნიგერიელი ონანასთან პირისპირ დატოვა. ხიფათის შექმნას ხშირად ცდილობდა, თუმცა მისი ცეცხლი მალე ქრებოდა", - დაწერა Calcionapoli-მ და ხვიჩას თამაში 5 ქულით შეაფასა.

    "ხვიჩა ყველაზე მეტს აქტიურობდა, მარცხენა ფლანგზე დარმიანს და შკრინიარს ბევრი საქმე ჰქონდათ. ქართველის ცუდად შეფასება რთულია, მიუხედავად იმისა, რომ კარგად ვერ გამოიყურებოდა. მსაჯმა მისი დაცვა ვერ შეძლო, ეს კი "ინტერის" ფეხბურთელებისთვის დამატებითი მოტივაცია აღმოჩნდა" - დაწერა Tuttomercatoweb-მა და ქართველს 6 ქულა დაუწერა. გააგრძელეთ კითხვა