რუსეთის სკოლაში თავდასხმას 13 ადამიანის სიცოცხლე ემსხვერპლა - ვინ არის თავდამსხმელი და საქმის რა ახალ დეტალებს ავრცელებს რუსული მედია
რუსეთში, იჟევსკის სკოლაში სროლის შედეგად დაღუპულთა რიცხვი 13-მდე გაიზარდა, - ინფორმაციას რუსული მედია საგამოძიებო კომიტეტზე დაყრდნობით ავრცელებს.
მათივე ინფორმაციით, დაღუპულებს შორის 7 არასრულწლოვანია, ასევე დაიღუპნენ მასწავლებლები და დაცვის თანამშრომლები. დაღუპულია თავად თავდამსხმელიც. ამასთანავე, დაშავდა კიდევ 14 ბავშვი და 7 ზრდასრული.
საგამოძიებო კომიტეტში აცხადებენ, რომ დამნაშავე ამავე სკოლის კურსდამთავრებული, 1988 წელს დაბადებული პირია.
შეგახსენებთ, სკოლაში შეჭრილმა პირმა სროლა გაკვეთილზე ატეხა. შავ ტანსაცმელში ჩაცმული უცნობი მამაკაცი კლასში შეიჭრა და ბავშვების მიმართულებით სროლა დაიწყო. ზოგიერთმა მათგანმა დამალვა მოახერხა.
რუსეთის შსს-ს პრესსამსახურში განაცხადეს, რომ ამ მომენტისთვის პოლიციელებმა აღმოაჩინეს მამაკაცის ცხედარი.
"არსებული ინფორმაციით, თავდამსხმელმა თავი მოიკლა", - აცხადებენ უწყებაში.