"მინდა, მოგილოცოთ უკრაინის გამარჯვებები... რამდენიმე დღეში შეიძლება თვითონ მოსკოვში ჰქონდეთ არეულობა, იმ მარცხის გამო, რომელიც ახლა აქვთ" - მეუფე სტეფანე
ჭყონდიდელმა მიტროპოლიტმა სტეფანემ გუშინ მარტვილის ყოვლადწმინდა ღვთისმშობლის მიძინების სახელობის საკათედრო ტაძარში იქადაგა. სასულიერო პირმა უკრაინას ომში მიღწეული გამარჯვევები მიულოცა და განაცხადა, რომ რუსეთს ყველაფერი უკან დაუბრუნდა ბუმერანგივით...
მეუფე სტეფანე:
"მინდა, მოგილოცოთ უკრაინის გამარჯვებები, რეალურად დღეს უკვე როგორც ჩვენ ვხედავთ, უკრაინაში მიმდინარეობს სერიოზული წინსვლა და უკრაინის ტერიტორიის გათავისუფლება. მე დიდი ხანია ამის შესახებ ვთქვი, როდესაც ეს უგუნური შეტევა დაიწყო უკრაინაზე, ვთქვი, რომ ეს არის ძალიან დიდი სისულელე, რაც რუსეთის ხელისუფლებამ ჩაიდინა და ეს არ დარჩება-მეთქი ასე უბრალოდ. შეუძლებელია, რომ ამას პასუხი არ გაეცეს... საბოლოო ჯამში ვერ გაიმარჯვებს რუსეთი. უსამართლოდ და არასწორად მოიქცა როგორც ჩვენს მიმართ, ისე უკრაინის მიმართ.
სხვათა შორის უწმინდესმა უთხრა იქ ხელისუფლებას, რომ ბუმერანგივით მოგიბრუნდებათ, რასაც ჩვენს წინააღმდეგ აკეთებთო. ახლა ეს ბუმერანგი, ფაქტობრივად, უტრიალდებათ. რამდენიმე დღეში შეიძლება თვითონ მოსკოვში ჰქონდეთ არეულობა, იმ მარცხის გამო, რომელიც ახლა აქვთ.
გეოპოლიტიკური თამაშები მიმდინარეობს და რუსეთი ამ თამაშებში არასწორი ნაბიჯით შევარდა და საბოლოო ჯამში დღეს ისეთი შეტევა მიდის რუსეთზე, რომ ძალიან მძიმე იქნება ამ ნაბიჯიდან გამოსავალი. ჩვენ არ გვინდა, არც რუსეთისთვის ცუდი, მაგრამ ამ ნაბიჯებით, შეუძლებელია ყველაფერი უკან არ დაუბრუნდეთ.
უკრაინელ ერს უხარია ეს დღე, რომ მათი საქმე მიდის კეთილად და კარგად. თუ კიდევ ასე გაგრძელდა, რა მოხდება მსოფლიოში, არავინ იცის. ჩვენ ამ დროს ძალიან დიდი სიფრთხილე გვმართებს. ვინც ჩვენ გვეუბნება, რომ ამის გამო პრორუსული ვართ და მათ ვუჭერთ მხარს, ეს ტყუილია. უბრალოდ, ჩვენ ჩვენ თავს ვუჭერთ მხარს. ვიცით, რომ უკრაინასავით არავინ დაგვიდგება მხარში და არც ისეთი მეგობრები გვყავს, როგორ უკრაინას და არც იმხელა ტერიტორია გვაქვს, რომ ვითარების სტაბილიზაცია შევძლოთ, როდესაც ჩვენზე წამოვა ამხელა მანქანა.
ამიტომ ვცდილობთ, რომ ამ ომში არ ჩავერთოთ და ამაში დანაშაული საქართველოს არ აქვს. უსამართლოდ გვექცევა ზოგიერთი უკრაინელი პირი, რომელიც საქართველოზე ცუდს ლაპარაკობს და ჰგონიათ ხელისუფლების წინააღმდეგ ამბობენ. სინამდვილეში საქართველოს წინააღმდეგ გამოდიან, თითქოს ჩვენგან ხდება უკრაინის საწინააღმდეგო ქმედებები.
თუ ხელისუფლება რაღაც ისეთს აკეთებს რომ უკრაინას ვნებს, მაშინ კონკრეტულად გვითხრან. ჰაერზე ნუ საუბრობენ. მკვლელები და მოძალადეები, რომლებიც საქართველოში ბატონობდნენ დიდი ხნის განმავლობაში, ნაწილი ციხეშია, ზოგი პოლიტპატიმრად გამოაცხადეს და გამოიყვანეს ციხეებიდან და არეულობას და რევოლუციას გვიპირებენ. უკრაინიდან იქნება თუ სხვა ქვეყნიდან ამ დესტაბილიზაციის წაქეზება, უკვე პრობლემაა..."