"საქართველო კვლავ გვართმევს ტალანტებს" - რუსები 13 წლის მოციგურავე ინგა გურგენიძის საქართველოს ნაკრებში გადასვლამ გააღიზიანა
გავრცელებული ინფორმაციით, საქართველოს ფიგურული ციგურაობის ნაკრები კიდევ ერთი ნიჭიერი სპორტსმენით გაძლიერდა. 13 წლის ინგა გურგენიძემ, რომელიც ამჟამად ოჯახთან ერთად, რუსეთის ქალაქ ყაზანში ცხოვრობს, საქართველოს მოქალაქეობის მისაღებად საჭირო პროცედურები უკვე გაიარა და საქართველოს სახელით რამდენიმე კვირაში დებიუტიც ექნება
რუსეთში მოციგურავის ამ გადაწყვეტილებამ ბევრი გააღიზიანა. სპორტული გამოცემა "ჩემპიონატი" ავრცელებს სტატიას, სათაურით: "საქართველო კვლავ გვართმევს ტალანტებს".
"ანასტასია გუბანოვას შემდეგ, საქართველოს დროშის ქვეშ მისი უმცროსი კოლეგა ინგა გურგენიძეც გამოვა. ახალ სეზონში 13 წლის მოციგურავე იუნიორულ საფეხურზე გადადის, რაც იმას ნიშნავს, რომ საერთაშორისო შეჯიბრებებში მონაწილეობას შეძლებს. მისთვის ერთ-ერთი პირველი ასეთი სტარტი იქნება გრან პრის ეტაპი, რომელზედაც იგი რუსეთის სახელით ვერ წარდგებოდა. საქართველოში გადასვლით კი მას რეალურად შეუძლია, ახალგაზრდებს შორის მსოფლიოს ჩემპიონატის საგზურის მოსაპოვებლად იბრძოლოს და სამომავლოდ ნაკრების ლიდერიც გახდეს", - წერს გამოცემა.
როგორც ირკვევა, ინგამ მიმდინარე წელს ყაზანის საქალაქო პირველობაში მიიღო მონაწილეობა და ჩემპიონიც გახდა.
რუსული გამოცემის ინფორმაციით, ინგა ფლობს ერთ-ერთ ყველაზე რთულ ილეთს სამმაგ აქსელს, რომლის შესრულება ვაჟებსაც კი უჭირს. გოგონას 13 წელი ა.წ. აპრილში შეუსრულდა და აქამდე ის ვარჯიშობდა ყაზანის ოლიმპიური რეზერვების სპორტსკოლაში, ლუდმილა გაფაროვას ხელმძღვანელობით.
რუსული გამოცემა წერს იმასაც, რომ გოგონას მამა ქართველია, თუმცა გასულ წლამდე ინგა დედის გვარს - ნიკიტინას ატარებდა.
საქართველოს ფიგურული ციგურაობის ფედერაციის ინფორმაციით, ინგა გურგენიძის დებიუტი საქართველოს ნაკრების შემადგენლობაში ერთ თვეში შედგება.
რუსული სპორტული გამოცემა სტატიის დასასრულს წერს, - პირველი შემთხვევა არ არის, რაც საქართველო ტალანტებს გვართმევსო, მაგალითისთვის კი მამაკაცთა ერთეულებში მოასპარეზე მორის ყვითელაშვილს და საფინა-ბერულავას დუეტს ახსენებენ, ასევე ანასტასია გუბანოვას, რომელიც საქართველოს ნაკრებში მეორე წელიწადია ასპარეზობს. წყარო