მნიშვნელოვანი ინფორმაცია
31
მარტიდღის ზოგადი ასტროლოგიური პროგნოზი
სამშაბათი, მთვარის მეოთხე დღე დაიწყება 07:33-ზე, მთვარე კუროშია
კარგი დღეა ახალი საქმეების დასაწყებად. აგრეთვე დაკარგული ნივთების, ადამიანების მოსაძებნად. გააფართოეთ ბიზნესი, დაარეგულირეთ ურთიერთობა ბიზნესპარტნიორებთან. მოაგვარეთ ფინანსური საკითხები. არასასურველია უძრავი ქონებით ვაჭრობა. მოერიდეთ კამათს, საქმეების გარჩევას. კარგი დღეა სწავლისთვის, სამეცნიერო სამუშაოსთვის, გამოცდის ჩაბარება სხვა დღისთვის გადადეთ. ცუდი დღეა მოგზაურობის დასაწყებად, შორ მანძილზე მგზავრობისთვის. შეძლებისდაგვარად მოუარეთ ყვავილებს, დარგეთ ხეები, გაისეირნეთ ბუნებაში. მოერიდეთ ალკოჰოლს, სიგარეტს, კუჭის გადატვირთვას; ოპერაციების ჩატარებას კისერსა და ყელზე. რაციონიდან გამორიცხეთ პროდუქტები, რომლებიც სახამებელსა და ნახშირწყლებს შეიცავს.
მნიშვნელოვანი ინფორმაცია
მკითხველის რჩევით
ასევე დაგაინტერესებთ
"ნებისმიერი ადამიანი, ვინც წაიკითხავს, იმ ემოციებით დაიტვირთება, რა ემოციებითაც მე ამ რომანს წლების მანძილზე ვწერდი“ - გახდი ბესტსელერის ავტორი მენტორთან ერთად მუშაობის შესახებ
16:40 / 03-08-2022
გამომცემლობა „პალიტრა L-ის“ პოპულარული კონკურსის „გახდი ბესტსელერის ავტორი 2022-ის“ გამარჯვებულმა ავტორებმა და მენტორებმა წიგნების რედაქტირებაზე ერთობლივი მუშაობა დაასრულეს. მიზანი ტექსტების დახვეწა და გამრავალფეროვნება იყო.
წელს კონკურსის გამარჯვებულები გახდნენ: ირაკლი არიშვილი - „დასაწყისის დასასრული“, ოლანი ბიწაძე - „მანიტუ“ და ანუკი შატაკიშვილი - „წუთით კოსმოსში“. მათ ჟიურისა და მკითხველს თავიანთი ორიგინალური და საინტერესო ტექსტებით დაამახსოვრეს თავი. გამარჯვებულების მენტორები კი არიან: მაკა ჯოხაძე - მწერალი და ლიტერატურათმცოდნე - ანუკი შატაკიშვილის მენტორი; მწერალი ინა არჩუაშვილი - ოლანი ბიწაძის მენტორი და მწერალი და რედაქტორი ბესო ხვედელიძე - ირაკლი არიშვილის მენტორი.
ნამუშევრები წიგნის მაღაზიათა თაროებზე შემოდგომიდან გამოჩნდება, მანამდე კი ავტორებმა და მენტორებმა მუშაობის პროცესზე თავიანთი შთაბეჭდილებები გაგვიზიარეს.
ანუკი შატაკიშვილი 19 წლის ავტორია, რომლის დებიუტიც „პალიტრა L-ის“ ლიტერატურულ კონკურსში შედგა. მისი რომანი „წუთით კოსმოსში“ მოგვითხრობს შეყვარებული წყვილის ლა ლუნასა და ჰალეის შესახებ, რომელთაც ერთი ოცნება - მთვარეზე გაფრენა აერთიანებთ. ამ ოცნების ასასრულებლად კი უამრავი დაბრკოლების გადალახვა უწევთ. როგორც ავტორი გვიამბობს, მისთვის ემოციურია იმის გააზრება, რომ მალე წიგნის გაცნობას მკითხველთა ფართო წრეები შეძლებენ და ამ დღეს მოუთმენლად ელის.
„ნებისმიერი ადამიანი, ვინც წაიკითხავს, იმ ემოციებით დაიტვირთება, რა ემოციებითაც მე ამ რომანს წლების მანძილზე ვწერდი და დარწმუნებული ვარ, რომ ის ძალა შეემატებათ, რაც მინდა, რომ რომანის კითხვის დროს მკითხველმა იგრძნოს,“ - აღნიშნა ავტორმა.
რაც შეეხება მენტორთან ერთად მუშაობის გამოცდილებას, ეს მისთვის საინტერესო და ბევრის მომცემი იყო, მიღებულ ცოდნას კი სამომავლოდ გამოიყენებს:
„ძალიან საინტერესო პროცესი იყო განსაკუთრებით იმ მხრივ, რომ მე ვარ 19 წლის, ჩემი მენტორი კი 74 წლის და შესაბამისად თუნდაც ასაკობრივმა სხვაობამაც მუშაობის პროცესში დიდი გამოცდილება მომცა. უმეტესად სტილისტურ ხარვეზებს ვასწორებდით. ბევრი რამ ვისწავლე და აღმოვაჩინე. რედაქტირება საკმაოდ დატვირთული პროცესი იყო.
მიუხედავად იმისა, რომ გარშემო ბევრი მეგობარი და ახლობელი მყავს, ვინც თავადაც წერს და ვისაც ეს ნაწარმოები წავაკითხე, აქამდე ასე დეტალურად ყველა სიტყვას, არავინ არ დაკვირვებია. აქედან გამომდინარე, ძალიან საინტერესო იყო ის პატარა აღმოჩენები, რაც ჩემი მენტორის დახმარებით გავაკეთე. სასიამოვნოა, როცა გაქვს იმის პატივი, რომ ამდენად გამოცდილმა ადამიანმა წაიკითხოს შენი ნაწარმოები და თავისი მოსაზრებები გაგიზიაროს. უმეტესად ყველაფერში დავეთანხმე და მისი შენიშვნებიდან გამომდინარე რაღაცები მე თვითონაც ჩავასწორე“, - განმარტა ანუკი შატაკიშვილმა.
წიგნზე მუშაობის პროცესზე თავის გამოცდილებასა და შთაბეჭდილებებს გვიზიარებს მენტორი, მწერალი და ფილოლოგიის მეცნიერებათა დოქტორი მაკა ჯოხაძე:
„ხშირად ოცნებები და მიზნები ეპოქის შესატყვისად იცვლება, ანუკი შატაკიშვილის რომანის „წუთით კოსმოში“ მთავარი გმირების ბავშვობისდროინდელი ოცნება მთვარეზე გაფრენაა. ეს მიზანი მათ მშობლებისაგან ერთგვარ ესტაფეტად გადმოეცათ. კოსმოსისაკენ მიმავალი გზა საიდუმლოებებით, ხიფათით, მისტიკითა და დაბრკოლებებით არის სავსე, მაგრამ შეყვარებული წყვილი ლა ლუნა და ჰალეი მეგობრების დახმარებით ამ წინაღობებს გადალახავენ და მთვარეზე გაფრენა მკითხველის თვალწინ ხორციელდება. სიუჟეტის განვითარების თვალსაზრისით, რომანი ინტერესით, დეტექტივივით იკითხება, მაგრამ ქართული ენის თვალსაზრისით აშკარად უკმარისობის განცდას ტოვებდა. შენიშვნა ზოგადად ეკუთვნის ახალ თაობას, რომელიც მართალია, ორიგინალში კითხულობს ევრო-ამერიკულ ლიტერატურას, მაგრამ იშვიათი გამონაკლისის გარდა წარმოდგენა არ აქვს 16 საუკუნოვან მშობლიურ ლიტერატურაზე, ცუდად იცნობს ან საერთოდ არ იცნობს XIX-XX საუკუნის ქართულ კლასიკას, რაც დაღად აჯდება ტექსტებს. ეს პრობლემა კომპლექტურად ოჯახური ტრადიციების, სკოლისა და საგანმანათლებლო სისტემის ერთობლიობაშია შესასწავლი. მსგავსი კონკურსები ამ მხრივაც ეხმარება ახალგაზრდა კონკურსანტებს, როცა პროფესიონალებისაგან, ჟიურის წევრებისაგან მენტორებისაგან რჩევა-დარიგებებს იღებენ.
ჩვენ, მე და ანუკიმ ნაყოფიერად ვიმუშავეთ და როგორც მოსალოდნელი იყო, ნიჭიერმა ავტორმა მენტორის ყველა შენიშვნა გაითვალისწინა, ტექსტი მეტნაკლებად გათავისუფლდა კალკებისაგან, ტავტოლოგიებისაგან, უხვსიტყვაობისაგან. მწერლობა დეტალების ხელოვნებაცაა, „წუთით კოსმოსში“ მრავალი საინტერესო დეტალი გვხვდება, ამიტომ ვფიქრობ, რომ თუ ანუკი შატაკიშვილი სერიოზულად გადაწყვეტს მწერლობას და სრულყოფილად შეისწავლის მშობლიური ლიტერატურის ბრწყინვალე ნიმუშებს, მომავალშიც არაერთი და ორი მკითხველის გულს გაახარებს თავისი შემოქმედებითი წარმატებებით“, - განმარტა მაკა ჯოხაძემ.
„გახდი ბესტსელერის ავტორი“ გამომცემლობა „პალიტრა L-ის“ ყველაზე პოპულარული ლიტერატურული კონკურსია, რომელიც 2017 წლიდან ყოველწლიურად ტარდება. კონკურსმა უკვე მკითხველთა ფართო წრეებისთვის ცნობილი არაერთი ავტორი აღმოაჩინა, რომელთა ნამუშევრებიც ხშირად ხვდება ბესტსელერთა სიაში.
R
გააკეთეთ კომენტარი
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
კადრები: რა ხდებოდა 2 ძლიერი მიწისძვრის დროს მიანმარში? - დაღუპულთა რაოდენობა 1 000-ს გასცდა
კვირის კითხვადი სტატიები
მნიშვნელოვანი ინფორმაცია
მკითხველის რჩევით
