"მიფიქრია საბრძოლველად წასვლაზე..." - პირდაპირ ეთერში ატირებული უკრაინული ფეხბურთის ლეგენდა: როგორ ეხმარება ანდრეი შევჩენკო სამშობლოს?
ლეგენდარულმა უკრაინელმა ფეხბურთელმა ანდრეი შევჩენკომ ერთ-ერთ იტალიურ ტელეარხზე რუსეთ-უკრაინის ომზე საუბრისას ცრემლი ვერ შეიკავა. მან ომის მიმდინარეობაზე კიდევ ერთხელ ისაუბრა და თქვა, რომ ის თითქოს კოშმარულ სიზმარშია, რომლიდანაც გამოღვიძება უნდა.
"მილანის" ყველა დროის საუკეთესო თავდამსხმელმა და უკრაინის ნაკრების ყოფილმა მწვრთნელმა ისიც თქვა, რომ ბევრჯერ უფიქრია სამშობლოს იარაღით დაცვაზეც.
"ბევრჯერ მიფიქრია საბრძოლველად წასვლაზე, მაგრამ ჩემი მხრიდან, არ ვიცი, ეს რამდენად სწორი ნაბიჯი იქნება, რადგან ვფიქრობ, რომ ახლა უკრაინას ყველაზე მეტად ჩემი კავშირების გამოყენებით დავეხმარები. თითქმის ყოველდღიურად ომის შესახებ აქტიურად ვლაპარაკობ საერთაშორისო მედიაში, ჰუმანიტარულად ვეხმარები ჩემი ქვეყნიდან ლტოლვილებს და ზოგადად ჰუმანიტარული დახმარებისთვის რესურსების მოზიდვას და კოორდინაციას ვცდილობ, უკვე შევქმენი დახმარების არაერთი პროგრამა და საქველმოქმედო ფონდებთანაც აქტიურად ვურთიერთობ. ბოლო ორი თვის განმავლობაში, ეს იქცა ცხოვრების წესად, მეტს არაფერს ვაკეთებ", - განაცხადა "შევამ" გადაცემაში.
უფრო ადრე შევჩენკო განაცხადა, რომ ომის დაწყება მისთვის უდიდეს შოკად იქცა:
"მიჭირს იმის აღქმა, რაც ხდება, ვერანაირი ქმედებები ვერ გაამართლებს იმას, რაც დაიწყეს უკრაინელი ერის წინააღმდეგ. ეს მხოლოდ ომი არ არის, ეს გენოციდია".
როგორც 45 წლის შევჩენკო ამბობს, არ აპირებს სამწვრთნელო კარიერის გაგრძელებას მანამ, ვიდრე უკრაინაში მშვიდობა არ დაისადგურებს.
ცნობილია, რომ ომის დაწყებიდან მალევე, ფეხბურთელმა უკრაინელების დასახმარებლად 400 000 ევროს ღირებულების მედიკამენტები და სამედიცინო მასალა შეიძინა.
"ახლა მხოლოდ ჩემი ქვეყნის დახმარებაზე ვარ ორინტირებული", - განაცხადა "შევამ". წყარო