"წამოვა კვარაცხელია? ხვალვე წავიყვანდი, მაგრამ არ წამოვა" - შოთა არველაძე
ვეტერანი ქართველი ფეხბურთელი და მწვრთნელი შოთა არველაძე ამჟამად ინგლისში "ჰალ სიტის" მთავარი მწვრთნელის პოსტზე მუშაობს.
"ჰალ სიტი" ჩემპიონშიპში ასპარეზობს და ამ დროისთვის მე-19 პოზიციაზეა.
შოთა არველაძემ სხვადასხვა საკითხზე "პირველი არხის" ეთერში, გადაცემაში, "საფეხბურთო ტაიმაუტი" ისაუბრა და ქართველი ფეხბურთელის, ხვიჩა კვარაცხელიას საკითხსაც შეეხო.
- "ქულები უნდა ავიღოთ, წელში გავსწორდეთ, რომ ლიგაში დარჩენაზე კითხვები აღარ გაჩნდეს და ტრანსფერებს და გაძლიერებაზე ფიქრს ამის შემდეგ მივხედავ. ვინმეს თუ ავიყვანდი ქართველებიდან? წამოვა კვარაცხელია? ხვალვე წავიყვანდი, მაგრამ არ წამოვა", - თქვა შოთა არველაძემ.
ცნობისთვის, ამ დროისთვის ხვიჩა კვარაცხელია კვლავ რუსეთში რჩება და ისევ ყაზანის "რუბინში" ირიცხება. მედიაში კვლავ წერენ ამა თუ იმ გუნდში მისი შესაძლო გადასვლის შესახებ, თუმცა რაიმე ოფიციალური ინფორმაცია, რომ ფეხბურთელი მართლაც გეგმავს კლუბის დატოვებას, ამ დროისთვის არ არსებობს.