USAID-ის ეკონომიკური უსაფრთხოების პროგრამის მხარდაჭერით KIU ახალ სტუდენტურ პროექტს იწყებს
ქუთაისის საერთაშორისო უნივერსიტეტი USAID-ის ეკონომიკური უსაფრთხოების პროგრამის მხარდაჭერით, გრანტის ფარგლებში, პროექტს - „ინფორმაციული და საკომუნიკაციო ტექნოლოგიური (ICT) გადაწყვეტები მიკრო, მცირე და საშუალო საწარმოებისთვის (MSMEs)“ ახორციელებს. პროექტის მიზანია ხელი შეუწყოს სხვადასხვა სფეროში მოქმედი ბიზნესების ეკონომიკური კონკურენტუნარიანობის გაზრდას მათი ICT-სთან დაკავშირებული ცოდნითა და უნარებით აღჭურვის გზით. ასევე, შესთავაზოს ბიზნესებს ელექტრონული ვაჭრობის ისეთი ინოვაციური გადაწყვეტები და მიდგომები, რაც პირდაპირ მათ საჭიროებებზე იქნება მორგებული. პროექტი გამოცდილებისა და გამოწვევების გაზიარების პლატფორმის შექმნით, საფუძველს ჩაუყრის კერძო სექტორისა და უნივერსიტეტის თანამშრომლობას, ხელს შეუწყობს ქუთაისის საერთაშორისო უნივერსიტეტის კომპიუტერული მეცნიერების (CS) და მენეჯმენტის საბაკალავრო პროგრამის განვითარებას და გაამდიდრებს სასწავლო კურსს რეალური ბიზნეს „ქეისებით“ და გამოცდილებაზე დაფუძნებული მიდგომებით.
პროექტის ფარგლებში KIU-ს სტუდენტთა შერჩეული გუნდი ჩაატარებს კვლევას საქართველოში მოქმედი საწარმოების შერჩევის მიზნით და მათთვის ელექტრონული ვაჭრობის საჭიროებების დასადგენად. მომდევნო ეტაპზე დაახლოებით 40 კომპანიისთვის ჩატარდება ტრეინინგები ელექტრონული ვაჭრობის და ინფორმაციული და საკომუნიკაციო ტექნოლოგიების ბიზნეს-საქმიანობაში გამოყენების შესახებ. გაზაფხულზე კი დაგეგმილია გამოფენის მოწყობა, სადაც დაინტერესებულ ბიზნესებს სტუდენტები შეთავაზებენ მათ საჭიროებებზე მორგებულ ICT ბიზნეს-გადაწყვეტებს. საბოლოოდ, მინიმუმ 5 საწარმო, სრულიად უფასოდ, ისარგებლებს ICT გადაწყვეტების დანერგვით თავიანთ კომპანიებში, რომელიც ექსკლუზიურად სწორედ მათ საჭიროებებზე იქნება მორგებული.
პროექტის ბოლოს ICT სამუშაო ჯგუფები ინდივიდუალურ სემინარებს ჩაუტარებენ აღნიშნულ კომპანიებს და საჭიროების მიხედვით გაუწევენ ტექნიკურ დახმარებას, მათთვის შესაბამისი ბიზნეს გადაწყვეტების განხორციელებისა და შენარჩუნებისთვის საჭირო სპეციალური ცოდნით, ინსტრუმენტებით და მეთოდებით აღჭურვის მიზნით.
ქუთაისის საერთაშორისო უნივერსიტეტმა (KIU) სტუდენტების პირველი ნაკადი 2020 წელს მიიღო. უნივერსიტეტის მიზანია ეტაპობრივად გახდეს განათლების, მეცნიერებისა და ტექნოლოგიების ჰაბი რეგიონში. შედეგად, საქართველო დაიკავებს წამყვან ადგილს საერთაშორისო საგანმანათლებლო და სამეცნიერო არენაზე.
KIU ამჟამად ახორციელებს ინგლისურენოვან საბაკალავრო პროგრამებს. უნივერსიტეტი სამომავლოდ გეგმავს პროფესიული, სამაგისტრო და სადოქტორო პროგრამების დამატებას.
KIU თანამშრომლობს ევროპის წამყვან მიუნხენის ტექნიკურ უნივერსიტეტთან (TUM International GmbH და TUM). ქუთაისის საერთაშორისო უნივერსიტეტის საპატიო პრეზიდენტია TUM-ის ყოფილი პრეზიდენტი, პროფესორი ვოლფგანგ ა. ჰერმანი.
USAID-ის ეკონომიკური უსაფრთხოების პროგრამა არის ხუთწლიანი USAID-ის მიერ დაფინანსებული პროგრამა, რომელიც ხორციელდება DAI Global-ის მიერ. პროგრამის მიზანია სოფლის მეურნეობის მიღმა არსებული სექტორების განვითარების ხელშეწყობა, რომელთაც სამუშაო ადგილების შექმნის, ინვესტიციების მოზიდვის, მიკრო, მცირე და საშუალო საწარმოებისთვის შემოსავლების ზრდის პოტენციალი გააჩნიათ.
NS