"ქართულმა ოცნებამ“ გადაწყვიტა, რომ იკადრებს აბსოლუტურად ყველაფერს და საქართველოს სახელმწიფოს საბოლოოდ მიითვისებს" - გრიგოლ გეგელია
"ლელო საქართველოსთვის" ერთ-ერთმა ლიდერის, გრიგოლ გეგელიას თქმით, გამორიცხული არ არის ოპოზიციამ ბრძოლის ერთ-ერთ იარაღად საპარლამენტო ბოიკოტი გამოიყენოს.
"გამორიცხული არაფერია, რადგან „ქართულმა ოცნებამ“ სრულიად ექსტრაორდინალური ვითარება შექმნა ქვეყანაში. პასუხებიც შესაძლოა სრულიად ექსტრაორდინალური იყოს" - აღნიშნა მან.
როგორც გეგელია ამბობს, ამ ეტაპზე მიმდინარეობს იმის განხილვა, თუ როგორ წარიმართება ხელისუფლებასთან ბრძოლის პროცესი სამომავლოდ.
"ახლა წყდება სახელმწიფოებრიობის საკითხი და ის, თუ რამდენად აქვს ამ ქვეყანაში არჩევნების ჩატარებას აზრი. ამაზე დიდი და ფუნდამენტური არაფერი არსებობს დემოკრატიულ პოლიტიკაში. შესაბამისად, ჩვენ ყველა ბერკეტს გამოვიყენეთ ზეწოლისთვის და იმისთვის, რომ „ქართულმა ოცნებამ“ გადაიხადოს ძალიან ძვირი ფასი წუხელ ჩადენილი ბოროტმოქმედებისთვის“, - განაცხადა გეგელიამ.
მისი განმარტებით, ოპოზიცია ყველა მექანიზმს გამოიყენებს, მათ შორის საპროტესტო აქციებს და საერთაშორისო საზოგადოების ზეწოლას.
"ქართულმა ოცნებამ“ გადაწყვიტა, რომ ყველა დიდ ქალაქს მიიტაცებს, ყველა მოქალაქის ხმას მიიტაცებს, ადამიანის სინდისით ივაჭრებს, იკადრებს აბსოლუტურად ყველაფერს და საქართველოს სახელმწიფოს საბოლოოდ მიითვისებს. ჩვენ ნათლად ვნახეთ, რომ ეს პრივატიზაციის პროცესი, რომელიც წლების განმავლობაში მიმდინარეობდა, ჩაცემენტდა და „ქართულმა ოცნებამ“ პირდაპირ გამოგვიცხადა, რომ ამ ქვეყანაში არჩევნებს არავითარი აზრი არ გააჩნია“,-განაცხადა გეგელიამ.
მის თქმით, ოპოზიცია იბრძვის არა თითოეული ამომრჩევლის ხმის დასაცავად, არამედ იმისთვის, რომ ქვეყანაში არჩევნებს აზრი დაუბრუნდეს.
"დღეს საღამოს 19:00 საათზე ჩვენ საზოგადოებას გავაცნობთ ხედვას იმის თაობაზე, თუ როგორ გავაგრძელებთ ბრძოლას“,-აღნიშნა გეგელიამ.