"ცხადია, რბილი ლ არ კლავს, მაგრამ... ნერვიულობს კალაძე! რთულია ვერმოგების მოგებად გასაღება" - რას წერს ლაშა ბუღაძე?

მწერალი ლაშა ბუღაძე თვითმმართველობის არჩევნების მეორე ტურთან დაკავშირებით ეგზიტპოლის შედეგებს ეხმაურება და ამბობს, რომ "ოცნებამ" წაგებული მოგებად გაასაღა.

აღნიშნულთან დაკავშირებით ბუღაძე პოსტს სოციალურ ქსელში ავრცელებს.

"ცხადია, რბილი ლ არ კლავს, მაგრამ კალაძეს ამწუთიერი ხელოვნურად რიხიანი გამოსვლის დროს კაპიტულანტურად უვარდება ლასის დეფექტი... ნერვიულობს! რთულია ვერმოგების მოგებად გასაღება" - წერს ბუღაძე.

ცნობისთვის, "იმედის" დაკვეთით "გორბის" მიერ ჩატარებული ეგზიტპოლის თანახმად, თბილისში კახა კალაძე იმარჯვებს 57, 2%-ით, ნიკა მელიას 42,8%-იანი მხარდაჭერა აქვს.

"ქართული ოცნების“ ლიდერები ეგზიტპოლებს პარტიის ოფისის წინ დამონტაჟებულ სცენაზე ოვაციებითა და ტაშით შეხვდნენ. პარტიის ოფისთან იმყოფებოდნენ ირაკლი ღარიბაშვილი, ირაკლი კობახიძე, კახა კალაძე და პარტიის სხვა ლიდერები.

"ძალიან დიდი მადლობა თითოეულ ჩემს მხარდამჭერს. ყველა იმ ადამიანს, ვინც მონაწილეობა მიიღო არჩევნებში და გადადგა სწორი ნაბიჯი, გააკეთა სწორი არჩევანი ქალაქთან დაკავშირებით აღმშენებლობასთან, განვითარებასთან, სიმშვიდესთან და სტაბილურობასთან მიმართებით.

დღეს ყველაზე მეტად რაც თბილისს სჭირდება, ეს არის განვითარება, აღმშენებლობა, ეს არის სიმშვიდე და სტაბილურობა. ეს არის თქვენი დამსახურება და ძალიან დიდი მადლობა ამისთვის. მე ჩემს გუნდთან ერთად მზად ვარ, 24 საათიან რეჟიმში ვემსახურო ამ ქალაქს, მზად ვარ, დაუღალავი შრომით ვემსახურო ამ ქალაქში მცხოვრებ თითოეულ ადამიანს, განურჩევალდ მათი პოლიტიკური შეხედულებისა.

მე პირობა დავდე, ვიქნები ყველას მერი, ვიყავი ყველას მერი და ასევე ვაპირებ მომავალში ჩემი საქმიანობის გაგრძელებას. ჩვენ დაველოდებით ცესკო-ს საბოლოო მონაცემების გამოქვეყნებას. რა თქმა უნდა, პატივს ვცემთ ყველას და მეორე დღიდანვე ვიწყებთ კონკრეტული პროექტების განხორციელებას“, - განაცხადა კალაძემ.