“დაიტირა ძმა, ცუდად გახდა და მალე წავიდა... სამ დღეში 10 კილო აქვს დაკლებული, სიარულიც უჭირს“ - რას ამბობს ავთანდილ ჭრიკიშვილი ზურაბ ზვიადაურზე
ძიუდოისტმა ავთანდილ ჭრიკიშვილმა მედიასთან განზრახ მკვლელობის ბრალდებით დაკავებული ოლიმპიური ჩემპიონის, ზურაბ ზვიადაურის ჯანმრთელობის მდგომარეობის შესახებ ისაუბრა. მისი თქმით, ზვიადაური თავს ძალიან ცუდად გრძნობს.
“დაახლოებით სამ დღეში ისე არის გამხდარი, რომ 10 კილო აქვს დაკლებული. ის ადამიანი რას გადის ახლა, ვერც წარმოიდგენთ. ცუდად იყო, სასწრაფო იდგა...
მოვიდა, დაიტირა ძმა, ძალიან ცოტა ხანი იყო, ცუდად გახდა და წავიდა. ვერ გაუძლო, წელი სტკიოდა და ვერ დადიოდა, რომ მოვიდა სკამზე დასვეს. სიარულიც უჭირს უკვე, ისეთ მდგომარეობაშია. ცოცხალია, მაგრამ ჩათვალეთ, რომ ისიც მკვდარია“, - განაცხადა მსოფლიო ჩემპიონმა ავთანდილ ჭრიკიშვილმა.
ცნობისთვის, ზურაბ ზვიადაურს აღკვეთის ღონისძიების სახით პატიმრობა უკვე შეეფარდა. ადვოკატები სასამართლოს გადაწყვეტილებას უსამართლოს უწოდებენ.
შეგახსენებთ, წინანდალში 16 აგვისტოს 3 ადამიანი მოკლეს, მათ შორის ერთი ზურაბ ზვიადაურის ძმა, ზვიად ზვიადაური.
მომხდარის შემდეგ შსს-მ ორი პირი დააკავა. ზურაბ ზვიადაური ერთი ადამიანის განზრახ მკვლელობის ბრალდებითაა დაკავებული, ხოლო ცეცხლსასროლი იარაღის დაუდევრად შენახვის ბრალდებით, რასაც ადამიანის სიცოცხლის მოსპობა მოჰყვა, დაკავებულია 1977 წელს დაბადებული ჯ.ჯ.
შსს-ს მიერ გავრცელებული ინფორმაციის თანახმად, ზურაბ ზვიადაურმა იმ მამაკაცს ესროლა, რომელმაც მის ძმასა და კიდევ რამდენიმე ადამიანს ესროლა.