"ევროპული საქართველოს" მერობის კანდიდატების ვინაობა ცნობილია
პარტია "ევროპულმა საქართველომ" მერობის კანდიდატები დაასახელა. პარტიის თავმჯდომარის გიგა ბოკერიას განცხადებით, ოპოზიციურმა პარტიებმა სხვადასხვა ოლქებსა და მუნიციპალიტეტში, სხვადასხვა შემადგენლობით შეძლეს გონივრული კომპრომისის პოვნა.
„მნიშვნელოვანი ეტაპი დასრულდა კონსულტაციებისა და კოორდინაციის სხვადასხვა ოპოზიციურ პარტიებს შორის, თქვენ იცით, რომ “ევროპული საქართველო” ყოველთვის იყო ამის ინიციატორი, იმიტომ რომ სწორ სტრატეგიად მიგვაჩნია ამ ბრძოლაში, ამ არჩევნებში, რომელიც სულაც არ არის არათუ ჩვეულებრივი თვითმართველობის არჩევნები, უბრალო არჩევნებიც არ არის, ეს არის შესაძლებლობა და შანსი, რომ დავამარცხოთ რეჟიმი, რომელიც საფრთხეს უქმნის ჩვენი ქვეყნის მომავალს. ამ არჩევნებზე წყდება ბედი გვექნება თუ არ შესაძლებლობა სწრაფად გამოვიდეთ ამ უმძიმესი ვითარებიდან, რასაც ვაწყდებით ყველანი ჩვენ ქვეყანაში, დაწყებული კოვიდის ვითარებიდან, სადაც მთავრობამ დემონსტრატულად ფეხებზე დაიკიდა ჩვენი მოქალაქეების ბედი, სიცოცხლე და ჯანმრთელობა, კორუფციით, უსაფრთხოებით, ჩვენი თავისუფლებით, ჩვენი შანსით რომ გავხდეთ ნორმალური, თავისუფალი ქვეყანა. ამიტომ არის მნიშვნელოვანი კოორდინაცია განსხვავებულ ოპოზიციურ პარტიებს შორის, ამიტომ ვიყავით და ვართ “ევროპული საქართველო” ამ ყველაფრის ინიციატორები.
ამ ეტაპზე შეიძლება ითქვას, რომ პირველი ეტაპი კოორდინაციის, მართალია დაგვიანებით, მაგრამ წარმატებით დასრულდა. მერობის ორი კანდიდატი ხონში - ზურაბ ჯიბუხაია, თერჯოლაში - ზურაბ ბუცხრიკიძე სხვადასხვა პოლიტიკურ ძალასთან არის შეთანხმებული. ამასთან ერთად ჩვენ ბუნებრივია წარვადგენთ კანდიდატებს, იქაც სადაც შეთანხმების ნაწილი იყო, რომ რამდენიმე კანდიდატი ყოფილიყო“, - განაცხადა გიგა ბოკერიამ.
მერობის კანდიდატთა სია ასე გამოიყურება: გორი - ეთერ ჯალაღონია, ახალციხე - ზურაბ სადათიერაშვილი, ახალქალაქი - არაენ კარაპეტიანი, მარნეული - ახმედ იმამკულიევი, სამტრედია - ჟუჟუკა ფოფხაძე, კასპი - აკაკი (კახა) გეჯაძე, ამბროლაური - მაია კაციტაძე, თეთრიწყარო - ნინო დავითაშვილი.
წალენჯიხაში, ნინოწმინდაში, ადიგენში კანდიდატების წარდგენა ცალკე გაიმართება.
„მნიშვნელოვანია საზოგადოებამ, მოქალაქეებმა, ჩვენმა მხარდამჭერებმა, ყველამ იცოდნენ სად დაუჭერს “ევროპული საქართველო” მხარს საერთო შეთანხმებულ კანდიდატებს, რომელიც წარმოდგენილი იქნება სხვადასხვა პარტიიდან ან დამოუკიდებელ კანდიდატებად. ამასთან ერთად 300-ზე მეტ მაჟორიტარულ ოლქში წინასწარი შეთანხმება არის ერთიანი კანდიდატების წარდგენაზე.
პირველ ეტაპზე ჩვენ კმაყოფილი ვართ კოორდინაციის ამ შედეგით და მიგვაჩნია ეს გზავნილი უნდა მივიდეს მოქალაქეებთან, რომ ოპოზიციურმა პარტიებმა სხვადასხვა ოლქებსა და სხვადასხვა მუნიციპალიტეტში, სხვადასხვა შემადგენლობით შეძლო გონივრული კომპრომისის პოვნა იმაზე, რაზეც ჩვენი ქვეყნის ბედს გადაწყვეტს, დემონსტრირება იმისა, რომ ჩვენ შეგვიძლია ივანიშვილის რეჟიმის დამარცხება და ამის შემდეგ კოორდინირებულად, კოალიციურად გადაწყვეტილებების მიღება", - განაცხადა ბოკერიამ.