"კალაძე წუხელ რომ იმუშავე, რამდენი დაგირიცხეს? მოდი და ჩემთან ერთად იმუშავე" - "თბილსერვის ჯგუფის" თანამშრომლების ნაწილის გაფიცვა დღესაც გრძელდება

"თბილსერვის ჯგუფის" თანამშრომლების ნაწილის გაფიცვა გრძელდება. დასუფთავების სამსახურის თანამშრომლები დღეს დილიდან "თბილსევის ჯგუფის" შენობასთან აქციას მართავენ. მათი მთავარი მოთხოვნა სამუშაო პირობების გაუმჯობესება და ხელფასის 50%-ით გაზრდაა.

„ჩვენი მოთხოვნა არის ხელფასის გაზრდა, ტექნიკის და გრაფიკის გაუმჯობესება. ხელზე ასაღები გვაქვს 1250 ლარი და 760 ლარს ვიღებ. დანარჩენი თანხა სად მიდის? რატომ არ მოდის თბილისის მერი კახა კალაძე? ხომ უნდა მოვიდეს დაგველაპარაკოს, გაითვალისწინოს ჩვენი შრომა. რატომ არ გვაფასებენ?! მოგვცენ ის ხელფასი, რაც გვაქვს ან გაგვიზარდონ" , - განაცხადა აქციის ერთ-ერთმა მონაწილემ.

"კალაძე წუხელ რომ იმუშავე, რამდენი დაგირიცხეს? ძალიან გაგიჭირდა სანაგვეში რომ იმუშავე? მოდი და ჩემთან ერთად იმუშავე. ხომ შეიძლებოდა მოსულიყო თბილი სიტყვით, ეთქვა, ბიჭებო, რა გიჭირთო. მოვიდა და ამბობს, აჟიოტაჟი შექმენითო" - ამბობს აქციის კიდევ ერთი მონაწილე.

ამასთან, დედაქალაქის მერი კახა კალაძე „თბილსერვის ჯგუფის“ თანამშრომლების ნაწილის გაფიცვას გამოეხმაურა და აღნიშნა, რომ ეს დაგეგმილი პროვოკაციაა. როგორც კახა კალაძე აღნიშნავს, „თბილსერვის ჯგუფის“ თანამშრომლებს გასულ წელს ხელფასები 20%-ით გაეზარდათ, ანაზღაურებასთან დაკავშირებული საკითხი კი 2022 წლის იანვარში კვლავ გადაიხედება.

დედაქალაქის მერმა ასევე ისაუბრა იმ პრეტენზიებზე რაც დასუფთავების სამსახურის თანამშრომლების ფორმებს უკავშირდება და აღნიშნა, რომ სამუშაო ფორმების შეძენაც ყოველწლიურად ხდება, ბოლო შესყიდვისას კი ტენდერთან დაკავშირებით პრობლემა იყო და გამარჯვებული კომპანია არის და თანამშრომლებს სექტემბრის დასაწყისში ახალი ფორმები ექნებათ.

რაც შეეხება ტექნიკას, მან განაცხადა, რომ ტყუილი ითქვა, თითქოს 9 წლის განმავლობაში ტექნიკის შეძენა არ მომხდარა.