"ამ მილოცვას თან ახლავს სევდაც... " - რას წერს ნიკა მელია ზურაბ დათუნაშვილზე, რომელმაც სერბეთის სახელით ოლიმპიური ბრინჯაო მოიპოვა
"ნაციონალური მოძრაობის" თავმჯდომარე სერბეთის სახელით მოასპარეზე ქართველ მოჭიდავეს ზურაბ დათუნაშვილს ოლიმპიურ ბრინჯაოს მედალს ულოცავს.
როგორც ის სოციალურ ქსელში წერს, მილოცვას სევდაც ახლავს თან, რადგან დათუნაშვილი ჭიდაობის ფედერაციაში არსებულმა განუკითხაობამ აიძულა, რომ სხვა ქვეყანაში წასულიყო.
"სერბეთის სახელით მოასპარეზე ქართველმა მოჭიდავემ, ზურაბ დათუნაშვილმა ბრინჯაოს მედალი მოიპოვა. მინდა მთელი სულით და გულით მივულოცო. ამ სიხარულს, ამ მილოცვას თან ახლავს ერთგვარი სევდაც...
ჩვენი ქვეყნის უკუღმართობამ, ფედერაციაში არსებულმა განუკითხაობამ იგი იძულებული გახადა სხვა ქვეყნის სახელით ეასპარეზა და მისი წარმატება მისი სამშობლოს წარმატება არ ყოფილიყო.
ზურას მინდა ვუთხრა, მიუხედავად იმისა, რომ ის სხვა ქვეყნის სახელით ასპარეზობს, მისი წარმატება ჩვენი ყველას და შესაბამისად საქართველოს წარმატებაა!" - წერს მელია.
საქართველოს ბერძნულ-რომაული სტილით მოჭიდავეთა ნაკრების ყოფილი კაპიტანი ზურაბ დათუნაშვილი, სერბეთის სახელით მას შემდეგ ასპარეზობს, რაც ჭიდაობის ფედერაციის პრეზიდენტ გეგა გეგეშიძესთან კონფლიქტი ჰქონდა.