"პრემიერს მინდა მივმართო, აიღე პასუხისმგებლობა და გადადექი" - ინგა გრიგოლია ლექსო ლაშქარავას გარდაცვალებაზე

ტელეკომპანია "პირველის" მენეჯმენტის წარმომადგენელი და თოქშოუს წამყვანი, ინგა გრიგოლია აცხადებს, რომ საქართველოს პრემიერ-მინისტრი ირაკლი ღარიბაშვილი უნდა გადადგეს. მან პრემიერს ტელეეთერიდან მიმართა.

"ჩვენ ვცხოვრობთ იმ ქვეყანაში, სადაც მედიას კლავენ. სადაც ხელისფულებამ გაუგზავნა თავის მომხრეებს მთავარი მესიჯი - სადაც დაინახავთ მიკროფონიანს და კამერიანს, მიადექით და სცემეთ. ამ ქვეყანაში ჟურნალისტებს კლავენ.

მინდა, მივმართო იმ ხალხს, მთელი ეს დღეები რომ გვამუნათებდა. შენ წვერიანო, უწვერო, თავსაფრიანო, უთავსაფრო, დაგიდგებათ ერთი დღე, როცა სახლში შემოგივარდებიან, როცა რაღაცის თქმა მოგინდებათ და არსად აღარ გეყოლებათ ჟურნალისტი და მედია საშუალება, ვისთანც მიხვალთ და თქვენს თავზე, თქვენს დარღვეულ უფლებებზე ილაპარაკებთ.

იმდენი არ ქნათ, ხალხო, რომ ქვეყანაში თავისუფალი მედია მართლა გაქრეს... ვინმეს ეჭვი გეპარებათ, რომ ეს იყო ხელისუფლების დაგეგმილი სპეცოპერაცია ჟურნალისტების წინააღმდეგ, მე არ მეპარება ეჭვი, არ მეპარება. ეს რომ ხელისუფლების დაგეგმილი არ ყოფილიყო, ეს არ მოხდებოდა, პრევენციისთვის ხო ყველაფერს გააკეთებდნენ - სპეცრაზმს ხო გამოიყვანდნენ...

ვინმეს ეჭვი გეპარებათ, რომ ამ წვერიანებს თუ უწვეროებს, არ ვიცი, რა ვუწოდო, ამ არაადამიანებს ხელისუფლებასთან აქვთ კავშირი. ვის სჭირდება, ხალხო, თქვენი სამძიმარი?! რაღაცა ენის მოჩლექა, რომ იზიარებ "ტვ პირველის"... იზიარებ კი არა, პრემიერს მინდა მივმართო, აიღე პასუხისმგებლობა და გადადექი. როგორც ქვეყნის პრემიერმა, აიღე პასუხისმგებლობა და გადადექი... თუ ვინმე პოლიტიკოსი მეტყვის, რომ ამ ტრაგედიის ფონზე, ჩვენ ისევ იგივე პრემიერი გვყავს, რომელმაც წააქეზა იმ დილით ხალხი... რა ექსპერტიზის პასუხიც არ უნდა დაიდოს... თქვენ რამე ხო არ გეშლებათ? ვინ შეჭამს თქვენ შეკერილს?

თუ მცემენ აქციაზე, დამაზიანებენ, ძვლებს ჩამიმტვრევენ, თვალს ამომთხრიან და კარგი, იმ მომენტში გადავრჩი და მერე სახლში წავედი და დარდისგან გამისკდეს გული, ვინ არის ამაზე პასუხისმგებელი?! ძვალის გატეხვაა მიზეზი, თუ ადამიანს ღირსება აქვს, ხალხო... ღირსება აქვს, ხალხო! იცით თქვენ რა არის?! სახლში შენს თავთან მარტო რომ დარჩები და რომ ხედავ კადრებში, როგორ გცემენ და ეს რო გახრჩობს, ეს არის ღირსება..."

პოლიცია რომ აპირებდა შემოვარდნას, ლექსო საავადმყოფოში ადგა და აქ გამოიქცა, მოვიდა ჩემთან და მითხრა: ინგა მე ამათ ვუჩივლებო. ხელისუფლებას, სააპტრიარქოსო - ჩამომთვალა. ალბათ სტრასბურგამდე მივალო. მე პირობა მივეცი - შენს გვერდით ვიქნები-მეთქი. დღეს უკვე მკვდარს მინდა, ვუთხრა - მე ყველაფერს გავაკეთებ, არც სამსახური არ მაინტერესებს, არც ჟურნალისტიკა, სამი დღის წინ იყო ეს საუბარი და არაფერი შეგეშალოთ, ახლა იწყება თქვენი პასუხისმგებლობის დაყენება", - თქვა ინგა გრიგოლიამ.