"ლინჩიო? ეგ იმაზე უარესია, რაც მოხდა... ნუ წავახალისებთ უგუნურებას, გადაწვან სახლები და დახოცონ სხვები" - როგორ ეხმაურებიან მამა-შვილის მიერ 8 წლის ბავშვის გაუპატიურების ამბავს

მარტვილის ერთ-ერთ სოფელში შოკისმომგვრელი დანაშაული მოხდა. სამეგრელოს პოლიციამ, 2 დღის წინ 8 წლის ბავშვის გაუპატიურებაში ბრალდებული მამა-შვილი, 65 და 35 წლის მამაკაცები დააკავა. სასამართლომ მათ უკვე პატიმრობა შეუფარდა. ამ ამბის გახმაურების შემდეგ, ბრალდებულების საცხოვრებელ სახლს გოგონას ოჯახის წევრებმა, მეზობლებმა და ახლობლებმა ცეცხლი წაუკიდეს და დაწვეს.

ამბავს საზოგადოების მხრიდან აქტიური გამოხმაურება მოჰყვა.

ნათია ფანჯიკიძე, ფსიქოლოგი:

"პედოფილიის შემთხვევების უმეტესობა ახლო წრეში, ნაცნობ გარემოში ხდება, რადგან მცირეწლოვანი ბავშვი იშვიათად ხვდება სრულიად უცხო გარემოში. სექსუალური განათლება ამიტომ არის აუცილებელი, რომ ყველა მშობელმა იცოდეს, სად იმალება საშიშროება და მაქსიმალურად უზრუნველყოს ბავშვისთვის უსაფრთხო გარემო და ყველა ბავშვმა იცოდეს, რა სახის ქმედება არ არის დაშვებული მის მიმართ. პედოფილი, რომელიც სასტიკ ძალადობას ჩადის, ყოველთვის რჩება საზოგადოებისთვის საშიშ პირად, ამიტომ უნდა ისჯებოდეს სამუდამო პატიმრობით. ძალადობის მსხვერპლ ბავშვებს ესაჭიროებათ ხანგრძლივი ფსიქორეაბილიტაცია, იმისათვის, რომ შეძლონ ნორმალური ცხოვრების გაგრძელება. მოძალადის შვილებსაც ესაჭიროებათ ფსიქორეაბილიტაცია, იმავე მიზნით, რომ შეძლონ ჯანსაღი ცხოვრების გაგრძელება".

"როცა შვილების თავს პრობლემებია, ისედაც თავს იდანაშაულებენ მშობლები. ხოდა თუ თავს არ მოვაკვლევინებთ მათ, მათკენ ისრების გადატანით, მემგონი აჯობებს. ასევე, არ წავახალისებთ უგუნურებას, გადაწვან სახლები და დახოცონ სხვები. ბავშვებშიც არ გავაძლიეროთ განცდა "მშობლებმა ვერ დამიცვეს". იმედია, სასამართლო ადეკვატური იქნება იმდენად, რომ სამართლის აღსრულების საკმარისი განცდა გაჩნდეს და არა ისე, წელიწადში რომ გარეთ უშვებენ უმძიმესი დანაშაულის ჩამდენებს".

ბაია პატარაია, ქალთა უფლებადამცველი:

"მშობელი უნდა ვალაპარაკოთ ტელევიზიაშიო, მართლა არ ვიცი, რატომ ან რა უნდა ისაუბროს ამ დროს მშობელმა... მე რომ ამ ბავშვს ვიცავდე (უკვე შევთავაზეთ, მაგრამ ჯერ არ დათანხმებულან), მშობელს ვთხოვდი მაქსიმალურ კონფიდენციალურობას. ასევე, ნუ ულანძღავთ ამ ბავშვებს დედას. თქვენ როგორც წარმოგიდგენიათ ბავშვის გაუპატიურება ანალურად და ვაგინალურად, ასე არ ხდება პრაქტიკაში ხშირად. პედოფილები საკმაოდ ფრთხილი და ვერაგი ხალხია, იციან, როგორ არ აწამონ ბავშვი, როგორ მიიჩვიონ და როგორ მოატყუონ და ა.შ. სამწუხაროდ, ბევრი პრაქტიკა დაგვიგროვდა და გთხოვთ, მშობელს ნურც არაჰიგიენურობას დააბრალებთ და ნურც უყურადღებობას. ისეთ დედებს ვიცნობ, ბუზს რომ არ აჯენდნენ შვილს თავზე, მაგრამ ძალიან ახლო ნათესავისაგან და მეზობლისაგან ვერ დაიცვეს შვილი. კარგი დედისთვისაც ვერ უთქვამს შვილს დროულად. ბავშვს თუ წინასწარ არ აქვს ინფორმაცია პედოფილიაზე და თავდაცვაზე, ვერაფერს ხვდება და ვერანაირად ვერ იცავს თავს როგორც წესი. ამიტომ გაეშვით დედის ლანძღვას".

"პედოფილია უმძიმესი დანაშაულია და ითვალისწინებს სამუდამო პატიმრობას, რაც სწორია. სხვისი სახლის დაწვა დანაშაულია, თუნდაც დამნაშავის სახლის დაწვაც დანაშაულია. ხოლო პოლიციელი თუ მონაწილეობს ამ დანაშაულში ღიად, უყურებს დანაშაულს და არ ცდილობს მის აღკვეთას - ეს მთელი სახელმწიფოს სისტემის ჩამოშლაა. დარწმუნებული ხართ, რომ გამოქვაბულში გინდათ დაბრუნება და ლინჩის წესით ცხოვრება? მე არ მსურს ბრბო ასამართლებდეს ვინმეს. მე სამართლიანი სასამართლო მინდა, რომელიც პედოფილსაც განსჯის და პოლიციელის დანაშაულსაც, სამართლიანად და მიუკერძოებლად. გავეშებული ბრბოს სამართლის აღსრულება არც არასდროს შეეძლო და ვერც ვერასდროს შეძლებს. სიველურეს და ლინჩის წესს არასდროს არ გავამართლებ - ეს უკონტროლო ბოროტებაა, რომელსაც საერთო არაფერი აქვს სამართლიანობასთან და კანონთან".

გია ეძგვერდაძე, მხატვარი:

"პედოფილია გარკვეული სახის ფსიქიური ფენომენია - ადამიანურ კულტურაზე ინდივიდუალური ფსიქიური რეაგირების ფორმა. ასეთი გადახრის მქონე ადამიანმა შეიძლება ეს გადახრა თავად აღიაროს, თავადვე დადგეს აღრიცხვაზე და ფსიქოლოგიური თერაპია გაიაროს. კულტურულ საზოგადოებაში სწორედ ასეთი დამოკიდებულება უნდა იყოს ინდივიდუალურ ფსიქიური გადახრების მიმართ ზოგადად. სწორედ ამ მიზეზით ეძახდნენ ფუკოს "ყველას და ყველაფრის ადვოკატს" - იგი ყველა ტიპის პერვერსიას უჰუმანურესი თვალით ხედავდა და ცდილობდა ცივილური მოთოდებით აღმოეფხვრა ეს გადახრები საზოგადოებიდან. ამის განსახორციელებლად და ასეთი პრაქტიკის დასამკვიდრებლად, პირველ რიგში ასეთ გ ა დ ა ხ რ ე ბ ზ ე უნდა მოიხსნას საზოგადოების მიერ დაფიქსირებული სტიგმა - ყველამ უნდა გააცნობიეროს, რომ ასეთი მოვლენის მატარებელი ადამიანი "ცუდი ადამიანი" კი არ არის, არამედ ფსიქიურად არ არის საზოგადოების მოთხოვნებთან მიმართებაში მორგებული და მას მიეცეს საშუალება სინდისის ქეჯნის და წამების გარეშე იგრძნოს თავი ამ გადახრის მატარებლად, დადგეს აღრიცხვაზე და თერაპია ჩაიტაროს (აქ არის ლაპარაკი ადამიანებზე, რომლებიც ასეთ ტენდენციას გრძნობენ, მაგრამ არანაირი აქტი ამ მიმართულებით არ ჩაუდენიათ). მხოლოდ ასე შეიძლება ავირიდოთ თავიდან და შევძლოთ მომხდარი ძალადობის საზიზღარი ფაქტების პრევენცია. ეს ერთადერთი გზაა!"

"ლინჩიო??? უი, თქვე უკიდეგანოდ ჩარჩენილებო! ეგ, მემგონი, კიდევ იმაზე უარესია, რაც მოხდა - დასჯაზე პრეტენზია შიზოფრენიის ფორმაა - კარმის სრული იგნორირება - ინდური სიბრძნეა: "არავინ იცის რა გამოვა საიდან"! ნენე ჩერი ქუჩაში ხუთმა კაცმა გააუპატიურა და ინტერვიუში ამბობს მერე: ამ შთხვევამ გამხადა ის რაც ეხლა ვარ და დამაყენა პიროვნებაო".

8 წლის ბავშვის გაუპატიურებაში ბრალდებულ მამა-შვილს პატიმრობა გუშინ შეეფარდა. აღნიშნული გადაწყვეტილება მოსამართლე ლევან ნუცუბიძემ მიიღო. პროცესი სენაკის რაიონულ სასამართლოში გაიმართა და ის მოსამართლის გადაწყვეტილებით დახურული იყო. დაკავებულები ბრალს არ აღიარებენ.

დაკავებულებს ბრალდება საქართველოს სისხლის სამართლის კოდექსის 137-ე მუხლის მე-4 ნაწილის "გ" ქვეპუნქტით წარედგინათ ( გაუპატიურება, ჩადენილი წინასწარი შეცნობით არასრულწლოვანის მიმართ ბ.გ.-ს ორი ეპიზოდი, ზ.გ.-ს სამი ეპიზოდი), ხოლო ზ.გ-ს ასევე ბრალდება 138-ე მუხლის მე-3 ნაწილის "გ" ქვეპუნქტით (სექსუალური ხასიათის სხვაგვარი ქმედება ჩადენილი ძალადობით, დაზარალებულის უმწეობის გამოყენებით, წინასწარი შეცნობით თოთხმეტი წლის ასაკს მიუღწეველთან.