"წყობიდან გამოვედი... ნერვები აღარ მივარგა" - რას წერს ზურაბ ჯაფარიძე თენგიზ ცერცვაძესთან დაძაბული დებატების შემდეგ?

პარტია "გირჩი - მეტი თავისუფლების" თავმჯდომარე ზურა ჯაფარიძე ინფექციური საავადმყოფოს დირექტორთან დაძაბული დებატების შემდეგ ბოდიშს იხდის.

პოსტს ჯაფარიძე "ფეისბუქზე" ავრცელებს.

"წყობიდან გამოვედი მიუხედავად იმისა, რომ მთელი დღე საკუთარ თავს ვამზადებდი, ეგ არ დამმართნოდა და ეს არ არის ბოლო პერიოდში პირველი შემთხვევა... ნერვები აღარ მივარგა i guess...

ბოდიში ყველასთან, მათ შორის ოპონენტთან და წამყვანთან" - წერს ჯაფარიძე.

ცნობისთვის, თენგიზ ცერცვაძემ რამდენიმე დღის წინ სოციალურ ქსელში პოსტი გამოაქვეყნა, სადაც ზურაბ ჯაფარიძის განცხადებებს გამოეხმაურა და მას დებატებში დაჯდომისკენ მოუწოდა. დებატები "რუსთავი 2"-ის ეთერში გაიმართა.

ტელეეთერში ჯაფარიძემ ცერცვაძეს საკუთარი განცხადებები შეახსენა და აღნიშნა, რომ ბევრ რამეზე პასუხისმგებლები ცერცვაძე-გამყრელიძე-იმნაძე იყვნენ.

"ექიმი ბრძანდებით და მადლობა ყველაფრისთვის, რასაც აკეთებთ, მაგრამ ეს ხომ არ ნიშნავს იმას, რომ სხვა თქვენი განცხადებების შედეგები დაივიწყოთ და თქვათ, რომ მე ამაზე ფორმალური პასუხისმგებელი არ ვარ.

აბა ვინ არის? თქვენ 3 ადამიანი იყავით, ვინც დაუკვეთეთ, საბოლოო ჯამში და მერე გააპრავეთ ეს ყველაფერი. გახარიას კიდევ დარტანიანს ეძახდით, საუკეთესო კრიზისმენეჯერიაო. ახლა დაუძახეთ, აბა, გახარიას "დარტანიანი" და კარგი კრიზისმენეჯერი. აღარ არის ახლა მოდაში," - მიმართა "დღის კურიერის" ეთერში ზურა ჯაფარიძემ თენგიზ ცერცვაძეს.