"რკინის მუშტი" "ცეცხლოვანი ბუშტების" საპასუხოდ" - ისრაელმა დღეს დილით, ღაზას სექტორზე საჰაერო დარტყმა მიიტანა

ისრაელმა დღეს დილით ღაზას სექტორზე საჰაერო დარტყმები განახორციელა. მედიის ინფორმაციით, ისრაელის ხელისუფლებამ ეს გადაწყვეტილება მას შემდეგ მიიღო, რაც პალესტინის ტერიტორიიდან ხანძრის გამომწვევი სპეციალური საჰაერო ბურთები გაუშვეს, რომელმაც საზღვართან, გაშლილ ტერიტორიაზე 20-მდე ხანძარი გააჩინა.

ისრაელის თავდაცვის ძალების განცხადებით, მათმა საფრენმა აპარატებმა ქალაქ ხან იუნისსა და ღაზაში დაჯგუფება "ჰამასის“ სამხედრო ობიექტები გაანადგურეს.

”ისრაელის თავდაცვის ძალები მზად არიან ყველა სცენარისთვის, მათ შორის საბრძოლო მოქმედებების განახლებისთვის, ღაზას სექტორიდან განხორციელებული ტერორისტული აქტების ფონზე”, - განაცხადეს ისრაელის თავდაცვის ძალებში.

"რამდენიმე საათის წინ, ისრაელის საჰაერო ძალებმა, ღაზას სექტორში განახორციელეს სარაკეტო დარტყმები "ცეცხლოვანი ბუშტების" საპასუხოდ.

ისრაელის სამხრეთ ნაწილში ათეულობით ხანძრის შემდეგ, არმია აცხადებს, რომ მათ "ჰამასის" ტერორისტულ-სტრატეგიულ ადგილებზე მიიტანეს სარაკეტო იერიში. პალესტინის ცნობით, არავინ დაშავებულა.

"რკინის მუშტი" "ცეცხლოვანი ბუშტების" საპასუხოდ. ასე აფასებენ ისრაელში მიმდინარე ამბებს. ცეცხლის შეწყვეტის შეთანხმების შემდეგ, ეს პირველი შემთხვევაა, როდესაც სიტუაცია კვლავ უკიდურესად დაიძაბა. მშვიდობა ისრაელს", - წერს ისრაელში მცხოვრები ქართველი ჟურნალისტი მიხეილ ხეცოიძე "ფეისბუქის" პირად გვერდზე.

საჰაერო თავდასხმები პირველი იყო მას შემდეგ, რაც ეგვიპტის შუამავლობით გაფორმებული ცეცხლის შეწყვეტის შეთანხმების შედეგად ისრაელსა და პალესტინის დაჯგუფებებს შორის 11-დღიანი შეიარაღებული კონფლიქტი დასრულდა.

პალესტინელების გაღიზიანება მემარჯვენე რადიკალური ნაციონალისტური ჯგუფების მიერ აღმოსავლეთ იერუსალიმში მოწყობილმა აღლუმმა და ათასობით დროშის ფრიალმა გამოიწვია. შეგახსენებთ, რომ აღლუმი თავდაპირველად 10 მაისს, იერუსალიმის დღის აღსანიშნავად, უნდა გამართულიყო.