"ბესოს ძალადობები, თქვენ გარდა, ყველამ ვიცოდით, თქვენივე ხელით რომ გამოკვებეთ ეს ამაზრზენი ადამიანი, ვერც ხედავდით" - ნინუცა მაყაშვილის ბიცოლა რობერტ სტურუას

მსახიობ ნინუცა მაყაშვილის ბიცოლა, თამრიკო ნასიძე სოციალურ ქსელში რობერტ სტურუას პოსტს ეხმაურება, რომელიც რეჟისორმა ყოფილი, მეუღლის შესახებ, ნინუცა მაყაშვილის განცხადებებთან დაკავშირებით დაწერა:

"პირველი შემთხვევაა, ბატონო რობიკო, რომ არ გეთანხმებით. ბესოს ძალადობები, თქვენ გარდა, ყველამ ვიცოდით. რა თქმა უნდა, ასე დეტალურად არა. გასაოცრად შორსმჭვრეტელი ბრძანდებით და თქვენივე ხელით რომ გამოკვებეთ ეს ამაზრზენი ადამიანი, ვერც ხედავდით. ნუთუ, მისი არაადეკვატურობისადმი ბრმა ხართ?!

მე ნინუცას ბუცოლა ვარ და პირადად მაქვს ჩალურჯებები ნანახი. ბესოს მხრიდან არანორმალური რეაქციები, რომლებიც მაფიქრებინებდა, რომ რაღაც პრეპარატზეა. აშკარად, რაღაცა წამალზე იჯდა, იმის მერე აღარ მინახია და ეხლა არ ვიცი. არაჯანსაღი ფსიქაკა როგორ ვერ ამოგიკითხიათ?! ნუთუ თქვენ, მართლაც რომ დამსახურებულად დიდო შემოქმედო და ფსიქოლოგო, მარათლაც დიდოსტატო, თქვენ ცხვირ წინ რა გველის წიწილაა ვერ ხედავთ? ან ბესოს ლაჩარი გამომეტყველება, თვალები რომ დაურბის და არასოდეს არ გისწორებს, ამასაც ვერ ხედავ? დღეს თქვენ დაიცავთ და ხვალ????

პირადად თქვენ, ჩემთვის უსაზღვროდ საპატივცემული მეტრი ბრძანდებით. არა ვართ მაყაშვილები არც მიშისტები და არც ვყოფილვართ "ვინმეისტი". თქვენთან ერთად, ერთ ბარიკადებზე ვართ ათწლეულებია და ამ კუთხით ნუ გაგვაკრიტიკებთ. ბავშვი, ნინუცაზე ვამბობ, არაერთხელ ნაცემია და ეს მარტო მე მცოდნია მაგალითად", - წერს თამრიკო ნასიძე.

რეჟისორი რობერტ სტურუა მსახიობ ბესო ზანგურის მხრიდან ფიზიკური ძალადობის შესახებ მისი ყოფილი მეუღლის, მსახიობ ნინუცა მაყაშვილის განცხადებებს სოციალურ ქსელში გამოეხმაურა.

"ვგრძნობდი, რომ ესენი ბოლშევიკები იყვნენ, ნეოკომუნისტები! და ქ ა ლ ე ბ მ ა 1937 წელი დაიწყეს! რ ე პ რ ე ს ი ე ბ ი!" - დაწერა რობერტს სტურუამ. რეჟისორის პოსტს საზოგადოების მხრიდან უმწვავესი კომენატრები მოჰყვა.