"რეალურად, გვერდს მართავდა ჩემი ძმა..." - რას წერს გაბრიელ წულაია "ოცნებასთან" ასოცირებულ "ფეიჯზე", რომელმაც სახელი შეიცვალა?

მთავრობის ადმინისტრაციის სტრატეგიული კომუნიკაციების დეპარტამენტის ყოფილი ხელმძღვანელი გაბრიელ წულაია მასზე გავრცელებულ ინფორმაციასთან დაკავშირებით განმარტებას აკეთებს.

როგორც ის "ფეისბუქზე" წერს, დეზინფორმაციაა, რომ გვერდს, სახელწოდებით "Bidzina ivanishvili&media" თავად მართავდა.

"მინდა საზოგადოებას მივაწოდო რეალური ინფორმაცია:

1. ტყუილია თითქოს ბიძინა ივანიშვილის ოფიციალური გვერდი გახარიას მხარდამჭერ გვერდად გადაკეთდა.აღნიშნული გვერდი, რომელიც არ იყო ოფიციალური, არამედ, ჩვეულებრივი მხარდამჭერთა გვერდი იყო, მე და ჩემმა ძმამ, ირაკლი წულაიამ ჯერ კიდევ ქართული ოცნების დაფუძნებამდე, 2011 წლის ოქტომბერში შევქმენით.

2. ასევე, დეზინფორმაციაა, თითქოს ჩემი საჯარო სამსახურში მუშაობისას ვმართავდი აღნიშნულ გვერდს. რეალურად - მხარდამჭერ გვერდს მართავდა ჩემი ძმა

3. აუცილებლად უნდა აღინიშნოს, რომ მიუხედავად სხვადასხვა პირების არაერთი მცდელობისა, მომხდარიყო გვერდის "დარეპორტება", გამომდინარე იქიდან, რომ 2011 წლის ოქტომბრიდან მოყოლებული, მხარდამჭერთა გვერდი ფუნქციონირებს სოცქსელის ყველა სტანდარტისა და წესის დაცვით, ფეისბუქის მხრიდან მისი ფუნქციონირება არასოდეს შეფერხებულა (სოცქსელის მცოდნე ნებისმიერი ადამიანი მიხვდება ამის მნიშვნელობას).

4. გიორგი გახარიას თანამდებობიდან გადადგომისთანავე მივიღე გადაწყვეტილება და დავტოვე მთავრობის ადმინისტრაციის სტრატკომის დეპარტამენტის უფროსის პოზიცია. ამიტომ, აბსოლუტურად ლეგიტიმურად და ღიად, სწორედ ჩემი შეხედულებების შესაბამისად, ჩემ ძმასთან ერთად, გავაგრძელებ აღნიშნული გვერდის მართვას" - წერს წულაია.

ცნობისთვის, თებერვალში პრემიერ-მინისტრის პოსტიდან წასული გიორგი გახარია გუშინ ტელეკამერების წინ პირველად გამოჩნდა და ჟურნალისტებთან პოლიტიკაში დაბრუნების შესახებაც ისაუბრა.

არსებობს იმის მოლოდინი, რომ მან შესაძლოა მესამე პოლიტიკური ცენტრის ჩამოყალიბება სცადოს. ერთ-ერთი გავრცელებული მოსაზრებით, არ არის გამორიცხული, გახარია ბიძინა ივანიშვილის პროექტიც იყოს. ამის თაობაზე მითქმა-მოთქმა მას მერე გააქტიურდა, რაც გახარიას კომენტარი პოლიტიკაში დაბრუნების შესახებ, "ქართული ოცნების" მხარდამჭერმა "ფეისბუქგვერდმა", სახელად: Bidzina Ivanishvili & Media გააზიარა.

მას შემდეგ, რაც აღნიშნულ გვერდზე გახარიას კომენტარი გაზიარდა, ფეისბუქ-გვერდი არაერთმა ადამიანმა გააქილიკა. დღეს კი "ფეიჯმა" სახელი გადაირქვა.

გვერდთან დაკავშირებით დღეს ვრცელი ინფორმაცია გამოაქვეყნა ორგანიზაციამ "სამართლიანი არჩევნებისა და დემოკრატიული საერთაშორისო საზოგადოება".

მათი ცნობით, ფეისბუქ გვერდი 2011 წლის 9 ოქტომბრიდან მოყოლებული ემსახურებოდა პარტია “ქართული ოცნების”, მისი წევრებისა და ბიძინა ივანიშვილის პოპულარიზაციას.

"ფეისბუქ-გვერდი „Bidzina Ivanishvili & Media” 2011 წელს გაბრიელ წულაიას მიერ არის შექმნილი. CrowdTangle-ის მონაცემებით, Შექმნის დღიდან გვერდმა სულ 5,631 პოსტი გამოაქვეყნა, რომელსაც ჯამში 2,041,736 ინტერაქცია (კომენტარი, რეაქცია, გაზიარება) ჰქონდა" - ნათქვამია ინფორმაციაში.