"ვის დაურეკავს გახარია - ივანიშვილს, ბრიუსელს, მოსკოვს თუ ვაშინგტონს...“ - როგორი იქნება ექსპრემიერის პოლიტიკური რეინკარნაცია?

გამართლდა საზოგადოების მოლოდინი და ეჭვი იმასთან დაკავშირებით, რომ პრემიერობიდან კარის გაჯახუნებით წასული გიორგი გახარია შესაძლოა, ერთ მშვენიერ დღეს პოლიტიკაში დაბრუნებულიყო. "მიუხედავად იმისა, რომ უამრავი სხვადასხვა ჭორი დადიოდა, არსად წასვლას არ ვაპირებ. უფრო მეტიც, არც პოლიტიკიდან არ წავალ. რეალურად, გეგმებს მივყვებით, ჩვენს დღის წესრიგს, რაც მოგვცემს იმის შესაძლებლობას, რომ უახლოეს პერიოდში ყველაფერი დეტალურად გაგიზიაროთ და მოგიყვეთ. მალე შევხვდებით. ყველა კითხვას პასუხი გაეცემა", - განაცხადა ახლახან ექსპრემიერმა. გაჩნდა იმის მოლოდინიც, რომ შესაძლოა მან მესამე პოლიტიკური ცენტრის ჩამოყალიბება სცადოს. არსებობს ვარაუდი, რომ არ არის გამორიცხული, გახარია ბიძინა ივანიშვილის პროექტიც იყოს. ამის თაობაზე მითქმა-მოთქმა მას მერე გააქტიურდა, რაც გახარიას კომენტარი "ქართული ოცნების" მხარდამჭერმა "ფეისბუქგვერდმა", სახელად: Bidzina Ivanishvili & Media გააზიარა.

გიორგი გახარიას შანსებზე ambebi.ge-სთან პოლიტოლოგები საუბრობენ.

გია ხუხაშვილი:

"ძალიან კარგი, თუ არ აპირებს გახარია პოლიტიკიდან წასვლას, გამოცოცხლდება ჩვენი ჩამყაყებული პოლიტიკური სიტუაცია და ამ ველზე საინტერესო ელემენტი გაჩნდება. მართალია, მას აქვს გარკვეული პოლიტიკური წონა, პოლიტიკური პერსპექტივა, მაგრამ მის შანსებზე ნაადრევია ლაპარაკი, დღევანდელ სიტუაციაში გზის გაკვლევა საკმაოდ რთულია - გასაგებია, მას პირველ ეტაპზე მოუწევს ორმხრივი ცეცხლის გაძლება იმიტომ, რომ ცოტა ხანში "ნაცები" იტყვიან, ის ბიძინას პროექტია, "ქოცები" იტყვიან - მიშას შეეეკრა და მისი პროექტიაო. ვნახოთ, როგორ გაუძლებს გახარია ამ ყველაფერს. ისე, პერსპექტივა აქვს. პრაქტიკულად, რაში გამოიხატება ეს ყველაფერი, ამას დრო გვაჩვენებს. შესაძლოა, ის მესამე ალტერნატიულ ცენტრად ჩამოყალიბდეს კიდეც“.

ხათუნა ლაგაზიძე:

"გახარიას შემოსვლა პოლიტიკურ ველზე სერიოზულ ცვლილებებს რომ გამოიწვევს, ეს ცხადია. სულ მცირე იქიდან გამომდინარე, რომ საზოგადოება, მიუხედავად იმისა, ქუჩაში, საპროტესტო აქციებზე არ გამოდის, ეს იმას ხომ არ ნიშნავს, რომ ხალხში პროტესტი არ არის. ვფიქრობ, როგორც მთლიანად ოპოზიციური ველის, ისე ოპოზიციური ამომრჩევლის სერიოზული გადალაგება დაიწყება.

ეს, უპირველესად, "ოცნებას“ გამოაცლის იმ ამომრჩეველს, რომელიც მას "ნაციონალების" შიშით აძლევდა ხმას, ამომრჩევლის იმ ნაწილს, რომელსაც "ოცნება“ სჭირდებოდა, როგორც "ნაციონალების" რევანშისგან დამცავი ფარი. ასეთმა ამომრჩეველმა, შეიძლება გახარია განიხილოს ახალი ფარის როლში. ვფიქრობ, რომ ერთის მხრივ, ეს არის გამოწვევა "ქართული ოცნებისთვის“ და დღეს იქ დარჩენილი პოლიტიკური ფიგურებისთვის. მეორეს მხრივ, არანაციონალური პარტიებისთვის, ვინაიდან მათი პოზიციონირება გართულდება და მოუწევთ ან ნაციონალებთან მიკედლება, ან თავისი სივრცის ძალიან მკვეთრად გამოკვეთა იმისთვის, რომ ამომრჩეველი არა თუ შეინარჩუნონ, არამედ გაზარდონ.

პლუს ამას, თუ ჩავთვლით "ქართული ოცნების“ პოტენციურ ამომრჩეველს, რომელიც იქ არის არა იმიტომ, რომ მოსწონს, არამედ იმიტომ, რომ დამცავი ფარი სჭირდება, ამ ამომრჩევლის სერიოზული გადაჯგუფება დაიწყება. გახარია იქნება დამოუკიდებელი პოლიტიკური ძალა, თუ ვინმეს პროექტი, ეს ძალიან მარტივად გასაშიფრი სქემაა. სახელისუფლებო მედიები მის მიმართაც თუ ისეთივე დაუფარავი აგრესიით იქნებიან განწყობილნი, როგორც დანარჩენი ოპოზიციის მიმართ და ისევე დაბლოკავენ, როგორც დანარჩენ ოპოზიციას, ჩემთვის პირადად, ეს იქნება ერთ-ერთი მთავარი ინდიკატორი იმისა, რეალურად, გახარია არის დამოუკიდებელი მოთამაშე, თუ ვინმეს პროექტი.

მთავარი პრობლემა, რაც მას დაუდგება, ეს არის მედიის თემა. ყველა შემთხვევაში, მას გააშუქებენ, ვინაიდან, ინტერესი იქნება მაღალი, მაგრამ მის მიმართ კეთილგანწყობილი მედიის მომენტი იქნება განმსაზღვრელი - ექნება თუ არა მას მისდამი მკვეთრად კეთილგანწყობილი ტელე-მედია რესურსი. ცალსახაა, ძალიან საინტერესო პროცესები და ასე ვთქვათ, ტექტონიკური ძვრები დაიწყო ქართულ პოლიტიკაში და ამომრჩეველშიც და დაველოდოთ, შეიქმნება თუ არა კიდევ ერთი პოლიტიკური სიმძიმის ცენტრი იგივე მარგველაშვილის ხელმძღვანელობით. საერთოდ, როცა ცარიელია სივრცე და როცა არის მოთხოვნა სიახლეზე, მიწოდებაც ხდება ხოლმე, პოლიტიკაც ამ ლოგიკას მიჰყვება“.

ვახტანგ ძაბირაძე:

"გიორგი გახარია დამოუკიდებლად თუ ჩამოაყალიბებს რაიმე პოლიტიკურ ორგანიზაციას, მას აქვს შანსი, რომ 1%-იანი ბარიერის შემთხვევაში გარკვეული ხმების რაოდენობა მიიღოს, შესაძლოა 5%-მდეც აწიოს, გააჩნია, როდის იქნება არჩევნები და როგორ იმუშავებს. უფრო მეტი შანსი და პოლიტიკური კაპიტალი აქვს გახარიას, მაგრამ ის კაპიტალი უფრო მეტზე არ ჰყოფნის. მას თუ პრეტენზია აქვს შექმნას მესამე ცენტრი, აუცილებელია, თავისი პოლიტიკური კაპიტალი გაზარდოს, რაც თავისთავად ვერ გაიზრდება. გახარია-კალაძე-კვირიკაშვილი თუ ტრიუმვირატს შექმნიან, ეს იქნება დანარჩენი ორი პოლიტიკური ძალის სერიოზული, თანაზომადი პოლიტიკური ძალა. სამივეს ცალ-ცალკე აქვს პოლიტიკური კაპიტალი და, რაც მთავარია, მათი ელექტორატი არის ურთიერთთავსებადი. ასეთი პოლიტიკური ძალის ჩამოსაყალიბებლად, ამ შემთხვევაში, მათ ივანიშვილის არც პოლიტიკური კაპიტალი დასჭირდებათ და არც - ფინანსური, სრულიად საკმარისი იქნება. არ ვიცი, რა ხდება კულუარებში, ვისი პროექტი შეიძლება იყოს, ან რა მიზნები აქვს გახარიას, მაგრამ მათ ექნებათ საკმარისი პოლიტიკური კაპიტალი, რასაც ჩათვლიან, ის პოლიტიკა რომ აწარმოონ. ვის დაურეკავს გახარია - ივანიშვილს, ბრიუსელს, მოსკოვს, თუ ვაშინგტონს, ეს მალე გამოჩნდება“.

ნიკოლოზ მეტრეველი:

"გიორგი გახარის შეუძლია და ვფიქრობ, ვალდებულიცაა სტაგნაციაში მყოფ ოპოზოციაში ალტერნატიული ფართო პოლიტიკური მოძრაობა შექმნას. აქ, როგორც ნებისმიერ სხვა სფეროში, კადრების და არა მხოლოდ ფინანსების საკითხი იქნება გადამწყვეტი. მისი დამოუკიდებელი პოლიტიკური დებიუტი აუცილებელია ახალი მაღალი რეპუტაციისა და კომპეტენციის მქონე ადამიანებისა ერთობით დაიწყოს. ეს მხოლოდ მოლოდინი არ არის, ეს ქართული საზოგადოების ძალიან დიდი ნაწილის და საქართველოს მოკავშირეების მოთხოვნაა. ის თუ რამდენად არიან ბატონი გიორგი და მისი თანამოაზრეები მზად ამ მისიისთვის, ამას უხლოესი მომავალი გვიჩვენებს. წინასწარ რთულია ამაზე საუბარი, თუმცა ამ ეტაპზე ნამდვილად არ მაქვს არავითარი საფუძველი, რომ ვიფიქრო ბიძინა ივანიშვილის და გიორგი გახარიას ალიანსზე. როდესაც გიორგი გახარია ისაუბრებს თავის გეგმებზე, შემდეგ უფრო დეტალურად შევძლებთ სიტუაციის შეფასებას“.