"ბატონ ირაკლის ერთხელ შევხვდი დერეფანში... ერთხელ ვნახე ვაკის პარკში, გაწვიმდა და ქოლგით დამეხმარა" - გიული ალასანია ღარიბაშვილს პასუხობს

საქართველოს ყოფილი პრეზიდენტის მიხეილ სააკაშვილის დედა გიული ალასანია იხსენებს, რომ ირაკლი ღარიბაშვილს ერთხელ შეხვდა.

ამის შესახებ მან "ტვ პირველის" ეთერში განაცხადა.

როგორც მან აღნიშნა, "ქართუს" მაშინდელ ხელმძღვანელს დერეფანში შეხვდა და მათი ურთიერთობა მხოლოდ ხელის ჩამორთმევითა და მადლობით შემოიფარგლა.

"ბატონ ირაკლის ერთხელ შევხვდი დერეფანში, ხელი ჩამოვართვი და მადლობა ვუთხარი. სხვათაშორის ის მაშინ იმსახურება ამ მადლობას. ეს იყო 2004-2005 წელს. ეს ეხებოდა ჩვენს ფესტივალს. საერთოდ, მერე მახსოვს ბატონი ირაკლი ჩვენს კონცერტებს ესწრებოდა და ძალიან კმაყოფილიც იყო ხოლმე. გაგიკვირდებათ და მესიამოვნა კიდეც ეს თემა, რომ წამოტივტივდა, კარგი საქმეები გამახსენდა, რომელიც ერთად ვაკეთეთ. არა მარტო ბატონ ირაკლისთან, ამ პროექტში ბევრი ადამიანი იყო ჩართული... ერთხელ მახსოვს კიდევ, ვაკის პარკში კონცერტი ტარდებოდა, გაწვიმდა და ბატონი ირაკლი ქოლგით დამეხმარა" - აღნიშნა ალასანიამ.

ექსპრეზიდენტის დედამ ასევე გაიხსენა ბიძინა ივანიშვილთან პირველი შეხვედრა.

"ერთხელ შევხვდი ბატონ ბიძინას. კონსერვატორიაში რაღაც ხდებოდა. შევირბინე ერთი წუთით და ვიღაცამ მითხრა, ეს არის ბიძინა ივანიშვილო და ვთხოვე, გაეცნოთ. ჩემი უკანასკნელი კონტაქტი ფონდთან იყო 2012 წელს" - აღნიშნა ალასანიამ.

ცნობისთვის, პრემიერმა ფარულ ჩანაწერებზე საუბრისას განმარტა, რას ნიშნავს ბერა ივანიშვილის მიერ მისთვის ნათქვამი ფრაზა "მინისტრები დაგირეკავენ". მისი განცხადებით, "ნაციონალური მოძრაობის“ მმართველობის დროს, მას, როგორც "ქართუ ფონდის" დირექტორს მინისტრებთან კონტაქტი ხშირად უწევდა.

"საუბარი იყო იმაზე, რატომ ახსენებდა ბერა ივანიშვილი ჩემთან საუბარში, რომ მინისტრები დამირეკავდნენ. მე 8 წლის განმავლობაში ვხელმძღვანელობდი ბიძინა ივანიშვილის საქველმოქმედო ფონდს და წლის განმავლობაში 200-მილიონიანი პროექტები გვქონდა.

ბუნებრივია, მიწევდა ურთიერთობა და პირდაპირი კომუნიკაცია მთავრობის უწყებებთან, მათ შორის მინისტრებთან. მქონდა არაერთი შეხვედრა კულტურის მინისტრ ბატონ რურუასთან, თბილისის მერთან. მიხეილ სააკაშვილის მეუღლესთან, ქალბატონ სანდრასთან გვქონდა არაერთი მოლაპარაკება და მათი თხოვნების მოსმენა გვიწევდა. პრეზიდენტის დედა გიული ალასანია ჩვენი ხშირი სტუმარი იყო და „ქართუ ფონდში“ გვსტუმრობდა, აქედან გამომდინარე პასუხი ნათელია.

საუბარი ასევე იყო იმაზე, თითქოს ეს ჩანაწერები 2017 წელს იყო გაკეთებული, 2017 წელს ვიყავი ბიზნესში, პოლიტიკა დავტოვე 2015 წლის დეკემბერში, მას შემდეგ 4 წელი არ ვყოფილვარ საჯარო პოლიტიკაში და ეს არგუმენტიც არის აბსოლუტურად საფუძველს მოკლებული“, - განაცხადა ირაკლი ღარიბაშვილმა.