"ეს ეძღვნებოდა რუსოს და მაიას... ბედნიერები ვიყავით, რომ უყურებდნენ ბავშვს, რომელიც ოთხი წელია არ უნახავთ" - ნინო დარასელის 11 წლის შვილმა ტელემაყურებელი მოხიბლა

ჟურნალისტის, ონლაინ ჟურნალ AT.GE-ის დამფუძნებლის ნინო დარასელის უმცროსი ქალიშვილის სატელევიზიო გამოსვლამ ქართული საზოგადოება გააოცა. 11 წლის მარიტა ბერიძე "იმედზე" "პატარების დიდ შოუში" გამოჩნდა, ვიოლინოზე დაუკრა და ცნობილი სიმღერა Moon River შეასრულა.

ნინო დარასელი ამბობს, რომ ცდილობს მარიტა კონკურსებსა და გადაცემებს მოარიდოს, თუმცა გოგონასთვის სცენა მთელი სამყაროა. სხვათა შორის, მარიტას დებიუტი პირველად ლანა ღოღობერიძის ფილმში "ოქროს ძაფი" შედგა.

- მარიტა პანდემიის დაწყებამდე ბევრ წრეზე დადიოდა, მათ შორის სიმღერაზეც, სწორედ იქიდან დაგვიკავშირდნენ და გადაცემაში მონაწილეობა შემოგვთავაზეს. ძალიან აქტიური ბავშვია, ნატო მეტონიძის სტუდიაში შეეჩვია სცენაზე დგომას. მე მის ასაკში ძალიან მეშინოდა, მარიტამ კი გადაცემაში მისვლამდე რეპერტუარიც თავად შეარჩია და ისწავლა. სამწუხაროდ, ერთი წელია პანდემიის გამო ვიოლინოზეც ვეღარ დადის. გადაცემისთვის მზადებისას ერთადერთი ჩემი ჩართულობა ის იყო, რომ ჩემ მეგობარს, თიკო კვინიკაძეს ვთხოვე, მისთვის კაბა შეეკერა.

- გადაცემიდან ჩანდა, რომ მარიტას მამასთან განსაკუთრებული ურთიერთობა აქვს...

- ჩემი და ნიკას უფროსი შვილი ზაზუკა 27 წლისაა და მასთან ერთად როგორც და-ძმა ისე გავიზარდეთ. მარიტასთან უკვე დედა და მამა ვართ, დიდ დროს ვატარებთ მასთან. ხომ ამბობენ, რომ მამებს გოგონებთან განსაკუთრებული ურთიერთობა აქვთო, ნიკა და ზაზუკა ახლო მეგობრები არიან, ტოლებს გვანან, აი, მარიტასთან ურთიერთობისას კი ვერ გაიგებ რომელია დიდი, რადგან მარიტა აკონტროლებს ნიკას.

- მარიტამ გადაცემაში თქვა, დილას ექვს საათზე ვიღვიძებ და დედას ფანქეიქებს ვუცხობო...

- მართალია, დილას ექვს საათზე დგება, მაღვიძარა აქვს დაყენებული. ოღონდ ამ ყველაფერს თავისი ინიციატივით აკეთებს. დედა ჩემს მიმართ ძალიან მკაცრი იყო, მაგრამ მე ასეთი არ ვარ. მარიტა ადრე იმიტომ დგება, რომ შემდეგ გაკვეთილზე არ დააგვიანდეს. თვითონ არის პასუხიმგებლიანი ბავშვი. თავად მონაწილეობს ყველა კონკურსში, როდესაც იგებს სადმე კასტინგია, მთხოვს რომ მისი მონაცემები გავაგზავნო. ამ დროს მე მაინც მერიდება ხოლმე.

- პანდემიამ როგორ იმოქმედა მასზე?

- რაღაცნაირად ერგება ყველაფერს. ახლა მისი გატაცება კულინარიაა. სულ რაღაცას აცხობს, ექსპერიმენტებით არის დაკავებული. საერთოდ განსხვავებული თაობაა, მის მეგობრებსაც რომ ვუყურებ, ყველა ასეა. მარიტა ტანვარჯიშზეც დადის, მღერის. რაც სახლშია, ახლა სიმღერას "იუთუბიდან" სწავლობს, ონლაინ ვარჯიშებს აკეთებს, თუმცა მაინც ვიტყვი, რომ ბავშვები პანდემიამ სერიოზულად დააზიანა.

- "ტიკ ტოკით" ყოფილა გატაცებული... რამდენად აკონტროლებთ მის აქტივობას სოციალურ ქსელში?

- რაღაც ეტაპზე ვაკონტროლებ, მაგრამ ჩემზე მეტად წინწასულია ტექნოლოგიებში. "ტიკტოკისთვის" ვიდეოს გადაღებას მთხოვს ხოლმე რომ მეც ვიცეკვო, მერე ამბობს, რომ არ გამომდის და მე ძალიან შეურაცხყოფილი ვრჩები. ვერ ავყევი "ტიკ ტოკის" რიტმს, ის კი "ტიკ ტოკის" თაობაა.

- მსახიობობაზე ოცნებობს...

- ორი წლის წინ მარიტა ლანა ღოღობერიძემ ფილმში გადაიღო, სადაც მოსახვედრად ასევე ძალიან დიდი კასტინგი გაიარა. ნაცნობობით არ მომხდარა, ჩემმა მეგობარმა მიიყვანა კასტინგზე, ქალბატონ ლანას არც ვიცნობდი, იმ დროს ფეხი მქონდა მოტეხილი და ვიწექი. მარიტამ ჯერ კიდევ არ იცის რა ბედნიერება ხვდა წილად. მის ერთ ბებიას ფილმში ნანა ჯორჯაძე თამაშობდა და მეორე ბებიას გურანდა გაბუნია. ფილმში ასევე თამაშობდნენ ზურაბ ყიფშიძე, თემიკო ჭიჭინაძე. მარიტას ძალიან მოეწონა გადაღების პროცესი.

- ბევრჯერ ახსენეთ, რომ ცდილობთ მის გვერდით არ გამოჩნდეთ, რადგან არ დააბრალონ რომ დედის გამო მიიღეს სადმე...

- დიახ, მაინც ვერიდები. ხომ იცით, ბევრმა შეიძლება იფიქროს, რადგან ჩემი შვილია იმიტომ მონაწილეობს. არ მიყვარს კონკურსები, მაგრამ მარიტა საერთოდ არ ღელავს. სადაც შეჯიბრია სულ ვარიდებ, მაგრამ თავად მიდის. ის რაც მე სტრესი მგონია, ამ თაობისთვის აშკარად სხვანაირადაა. მარიტამ იცის, რომ ნებისმიერი შედეგის მიუხედავად არც მე და არც ნიკას პრობლემა არ გვექნება. ამ გადაცემაზე ჩემმა შვილმა ზაზუკამ ისე ინერვიულა, ჩაწერაზე ვერ წამოვიდა, შემდეგ ტელევიზორში რომ ნახა, ბევრი ვიტირე და ბოლოს გამოვრთეო.

თან ეს ყველაფერი ეძღვნებოდა რუსოს და მაიას, იმიტომ რომ რამდენიმე არხის ყურების საშუალება აქვთ ციხეში. ბედნიერები ვიყავით, რადგან ვიცოდით, რომ უყურებდნენ ბავშვს, რომელიც ოთხი წელია არ უნახავთ... არადა, მარიტა რუსოს გაზრდილია...