"ვეღარ გაუძლო გულმა, ბევრის გადამტანმა გულმა..." - პარლამენტის ყოფილი წევრი ბიძინა გუჯაბიძე გარდაიცვალა

საქართველოს პარლამენტის ყოფილი წევრი ბიძინა გუჯაბიძე გარდაიცვალა. არსებული ინფორმაციით, პარლამენტის ყოფილი წევრი დღეს, გულის შეტევით დაიღუპა. ინფორმაცია, მისი გარდაცვალების შესახებ, ოჯახის წევრებმა დაგვიდასტურეს.

ყოფილი დეპუტატის გარდაცვალებას სოციალურ ქსელში ოჯახის ახლობელი ეხმაურება, ნინიკო მშვიდობაძე ბიძინა გუჯაბიძის მეუღლეს, მაკა სახურიას მიმართავს:

"მაკა სახურია, არ შემიძლია რაიმე ვთქვა... ყველა სიტყვამ აზრი დაკარგა. ან როგორ განუგეშო, ან როგორ შევძლო...ვერ დამიჯერებია. არც მინდა მჯეროდეს. ავი სიზმარი მგონია და არ მსურს გამოფხიზლება. მარტო შენ კი არა, ყველას დაგვაკლდა, მე თუ მკითხავ, საქართველოს დააკლდა.კიდევ ერთი ალალი, გულმართალი, ერთგული კაცი წავიდა იმქვეყნად. ზეციურ საქართველოში გადაინაცვლა. ვეღარ გაუძლო გულმა, ბევრის მნახველმა, ბევრის გადამტანმა გულმა... დიდი ხნის წინ ერთ-ერთ ადგილობრივ გაზეთში თქვენჯ სიყვარულის ისტორიას ვკითხულობდი. შენი ფრაზა მახსოვს მისი მისამართით ნათქვამი: მე მაშინ უკვე მიყვარდა... მე თქვენი სიყვარული შევიყვარე, შევიყვარე მთელი არსებით და ახლაც მიყვარს... ცხოვრებაში პირველადაა, როცა არ ვიცი რა დავწერო. ყოველ ახალ და საინტერესო ამბავს მიზიარებდა ხოლმე... ახლა კი... ბიძინა გუჯაბიძე ნათელში გამყოფოთ უფალმა, საქართველოს ერთგულო მამულიშვილო... პ. ს. რა სიმბოლურია ახლა ეს ლექსი, მაკო..."

ბიძინა გუჯაბიძე 1956 წლის 24 თებერვალს დაიბადა, იყო 2004 და 2012 წლების, ორი მოწვევის პარლამენტის წევრი.