ხვიჩა კვარაცხელიასა და გიორგი ჩაკვეტაძის ემოციური მიმართვა თანაგუნდელებს და შვილის წერილი თორნიკე ოქრიაშვილს - "მამა, დღეს უნდა მოიგოთ"

დამოუკიდებელი საქართველოს ისტორიაში საფეხბურთო თვალსაზრისით დღეს ყველაზე მნიშვნელოვანი დღეა. დინამო არენაზე ერთა ლიგის ფინალური მატჩი გაიმართება, სადაც საქართველოს ეროვნული საფეხბურთო ნაკრები ჩრდილოეთ მაკედონიის ეროვნულ გუნდს დაუპირისპირდება.

გამარჯვების შემთხვევაში საქართველო პირველად იასპარეზებს ევროპის ჩემპიონატზე. აღსანიშნავია, რომ ამ მატჩს ჩვენი გუნდი მნიშვნელოვანი დანაკლისით ხვდება. ტრავმის გამო ვერ ითამაშებს გიორგი ჩაკვეტაძე და ასევე, თამაშს ვერ შეძლებს ხვიჩა კვარაცხელია, რომელსაც კორონავირუსი დაუდასტურდა.

ისინი თანაგუნდელებს სოციალურ ქსელებში გამოქვეყნებული პოსტებით ამხნევებენ.

"მიდით ბიჭებო, ასახელეთ ჩვენი ქვეყანა. წინ დიდი გამარჯვებისკენ", - წერს ხვიჩა კვარაცხელია.

"წარმატებები ძმებო, დღეს დიდი გამარჯვების დღეა", - ეს კი გიორგი ჩაკვეტაძის მიერ "ინსტაგრამზე" გამოქვეყნებული გამახნევებელი მესიჯია.

გულშემატკივრები მთელი დღის განმავლობაში ცდილობენ თავიანთი მხარდაჭერა გამოხატონ ნაკრების ფეხბურთელების მიმართ და მოტივაცია კიდევ უფრო აუმაღლონ. ქვეყნდება არაერთი გამამხნევებელი პოსტი. განსაკუთრებული პოპულარობით თორნიკე ოქრიაშვილისა და მისი შვილის მიმოწერა სარგებლობს და აღნიშნული სქრინი სოცქსელებში ვირუსულად ვრცელდება.

"მამა, დღეს უნდა მოიგოთ", - წერს შვილი თორნიკეს.

მატჩი კორონავირუსის პანდემიის გამო გულშემატკივრის გარეშე გაიმართება. საფეხბურთო დაპირისპირება 21:00 საათზე გაიმართება. შეხვედრის რეპორტაჟს საქართველოს პირველი არხი შემოგთავაზებთ.