"ფეხით უვლია 3-4 საათი... პოლიციამ სათვალთვალო კამერების მეშვეობით ერთ-ერთ გაჩერებაზე მიაკვლია" - რას ჰყვება დაკარგული მოზარდის დედა

პოლიციამ დაკარგული 14 წლის ლუკა კოპალიანი ყაზბეგის გამზირზე, ერთ-ერთ გაჩერებაზე იპოვა. როგორც მოზარდის დედა, ქეთი თიკანაშვილი AMBEBI.GE-სთან საუბარში ამბობს, სამართალდამცველებმა გაუჩინარებულ ბავშვს ქუჩის სათვალთვალო კამერების მეშვეობით მიაკვლიეს.

"სახლში ვიყავით ყველანი. ბავშვი ეზოში გავიდა და წამებში გაუჩინარდა. ფეხით უვლია 3-4 საათი ორთაჭალიდან - ყაზბეგის გამზირამდე. შსს-ს წარმომადგენლებმა ამოიღეს კამერის ჩანაწერები და ერთ-ერთ გაჩერებაზე მიაკვლიეს. მადლობას ვუხდი მათ ყურადღებისთვის... ბავშვს არანაირი აღელვება არ ეტყობა. თავს კარგად გრძნობს, მაგრამ ფსიქოლოგებს მაინც ჩავრთავ", - ამბობს ლუკას დედა.

ცნობისთვის, არასრულწლოვანი რამდენიმე საათის წინ საცხოვრებელი ბინის მიმდებარე ტერიტორიიდან გაუჩინარდა, კერძოდ, ორთაჭალაში არსებული გორგასლის ქუჩიდან. ლუკა 14 წლის, აუტისტური სპექტრის მქონე მოზარდია.