კლანური დაპირისპირება აფხაზ "პოლიტიკოსებს" შორის და პანდემიის ფონზე გამძაფრებული ეკონომიკური კრიზისი - აფხაზეთი სოციალური აფეთქების ზღვარზეა

1-ელი აგვისტო არის თარიღი, რომელსაც ოკუპირებული აფხაზეთის ე.წ. ხელისუფლება ფსოუს საზღვრის გახსნის დღედ ასახელებს. თუმცა. ბჟანია-ანქვაბის გუნდის ცნობით, ისინი გზის გახსნას ეტაპობრივად აპირებენ. ბოლო ხანებში, “ოფიციალური ინფორმაციით” აფხაზეთში კოვიდ-19-ის 55 შემთხვევა დაფიქსირდა, რაც ადგილობრივი მედიის და მოსახლეობის ინფორმაციით, რეალობისგან შორს არის და სინამდვილეში ბევრად მეტია, რადგან დღეს, მხოლოდ ერთ დღეში, 7 შემთხვევა გამოვლინდა.

“საოცარ პირობებს გვთავაზობს მეგობარი აფხაზეთი - 3 დღით ადრე უნდა გვქონდეს გაკეთებული კოვიდის ანალიზი და იქ ჩასვლისას, ორკვირიანი კარანტინის გავლა გვიწევს, ოღონდ პირობების დაზუსტებისგან თავს შევიკავებ. ამიტომ, ალბათ ისევ ადგილობრივი საკურორტო ზონების ათვისებას გირჩევთ, ეწვიეთ სოჭს, სადაც გარემოც მოწესრიგებულია და უსაფრთხოების ზომებიც დაცული", - ამბობს რუსეთის ერთ-ერთი მცხოვრები თავის ვიდეო მიმართვაში, რომელსაც აფხაზი პუბლიცისტი, დავით დასანია ვრცელებს.

ასეთმა განწყობებმა აფხაზების აღშფოთება გამოიწვია, რადგან მათი თქმით, ტურისტული სეზონის თუნდაც დაგვიანებით გახსნა, მათი გადარჩენის ერთადერთი საშუალება იყო. რუსული გამოცემა Ореанда-Новости-ს ცნობით, აფხაზეთი სოციალური აფეთქების ზღვარზეა.

“მათ კორონასა და შიმშილით სიკვდილს შორის უწევთ არჩევანის გაკეთება. ის ადამიანებიც კი, რომლებსაც რუსეთის მოქალაქეობა აქვთ, სხვადასხვა მიზეზის გამო, ვერ იღებენ რუსულ პენსიასა და დახმარებას ბანკიდან. ზოგჯერ ბანკის ადმინისტრაცია ამბობს, რომ არ აქვს ფული, არ გადმორიცხულა, იყო შემთხვევები, როდესაც ითქვა, რომ თანხა თავად ბანკის თანამშრომლებმა მიითვისეს. ვითარება ძალიან მძიმეა,” – წერს გამოცემა.

მოსახლეობის ნაწილი ამ მოსაზრებას ეთანხმება. გამოცემა abkhaz-auto.ru-ს სტატიის კომენტარებში წერენ, რომ თუ გზა არ გაიხსნა, კრიზისი უმართავი გახდება, მით უფრო, რომ ჩავარდნილი ტურიზმის ფონზე, ბჟანია-ანქვაბის გუნდმა, “ძალოვანი უყწებების” რეორგანიზაცია დაიწყო, რასაც ე.წ. შს სამინისტროსა და "პრეზიდენტის ადმინისტრაციის" თანამშრომლებს შორის ფიზიკური დაპირისპირება მოჰყვა.

“საყოფაცხოვრებო ჩხუბის” მიზეზები კვლავ გაურვეველია” - წერს ინტერნეტგამოცემა abkhaz-auto.ru.

"სამსახურში სახელმწიფო დაცვის უფროსის მოადგილეს, პოლკოვნიკ, რუსლან იზმაილოვს სცემეს. ის 2016 წელს, რაულ ხაჯიმბას პრეზიდენტობის დროს დაინიშნა. ახლა კი, პოლიტიკური ცვლილებების შემდეგ, მის ადგილს სხვა უმიზნებდა, იზმაილოვი არ თმობდა, რის გამოც მას სცემეს.” - წერენ აფხაზები.

“პრეზიდენტის” პრესმდივნის, მარიანა კვიცინიას განცხადებით, ე.წ. ადმინისტრაციის წარმომადგენელთა არა ფიზიკური, არამედ სიტყვიერი დაპირისპირება მოხდა.

ინტერნეტგამოცემა АБХАЗИЯ-ЦЕНТР-ის ცნობით კი, “შსს-ს სისტემაში" უცნაური ამბები ხდება. გაგრის რაიონის განყოფილების უფროსი დმიტრი აჟიბა თანამშრომლებმა სასტიკად სცემეს, რის შემდეგაც, ვითარება მასშტაბურ დაპირისპირებაში გადაიზარდა.

გამოცემის ცნობით, ამის შემდეგ, ისინი საქმის გასარჩევად, სოხუმში, ე.წ. შს მინისტრის მოადგილემ, რაშ წვიჟბამ დაიბარა, მასა და თანამშრომლებს შორის კამათს შეხლა-შემოხლა მოჰყვა, როგორც ჩანს, წვიჟბა მათ მუშტებით გაუსწორდა და პასუხიც მიიღო. პოსტის ავტორის ცნობით, ჩხუბი, გაგრაში ОМОН –სა შს თამამშრომლებს შორის მომხდარის გაგრძელებაა და მომხდარში მონაწილე ყველა თანამშრომელი გათავისუფლებულია.

“რაც ახლა შსს-ში ხდება, გარდაუვალი იყო, რადგან ბჟანია-ანქვაბის გუნდი ცდილობს, შედარებით გაუსვრელი და წესიერი წარსულის მქონე ადმიანები მოიყვანოს. ძველები კი, ყველაფერს ეჭიდებიან და თანამდებობებს არ თმობენ. ეს ყველაფერი ძალიან ჰგავს ჯუნგლების კანონს, სადაც ვინც ძლიერია, იმარჯვებს", - წერს ადგილობრივი ვერკა ფირცხალავა.

ზოგის თქმით, ყველა ხელისუფლების დროს ასე იყო, მაგრამ ახლა დაპირისპირებაში "მაღალი თანამდებობის პირებიც" არიან გარეულნი.

“მთავარია, ის მილიციელები გაყარონ, ვინც ხან დამნაშავეებს იჭერდა, ხან ნარკოტიკს პირდაპირ განყოფილებიდან ყიდდა, ან ტურისტის დასაყაჩაღებლად იარაღს აქირავებდა და ქურდებს წილში ეჯდა. გვყავს ისეთები, ვინც წილების სანაცვლოდ, სხვადასხვა ბიზნესს მფარველობდა", – წერს ვალენტინა ახვლედიანი.

"ახლანდელმა ხელისუფლებამ ფაქტობრივად ხელი არ ახლო სხვადასხვა უწყებაში დაბრუნებულ ძველ გუნდს... ისეთი განცდა მაქვს, თითქოს სადაც ჭაობში ჩავცვივდით, რომელსაც ნებისმიერ დროს შეიძლება ხუფი მოარგონ და დაგვასვენონ, მაგრამ გარშემო არავინაა და ამის გაკეთებას თავად ვცდილობთ. ხომ ყველამ იცის, რომ ძალოვანი უწყებების წარმომადგენლები წლებია ნარკორეალიზატორებს მფარველობენ, მაგრამ არავინ ამბობს. მეტიც, არც ესენი აპირებენ ხელი ახლონ. ასე მეგონა, სიბნელიდან გამოვიდოდით და პირიქით, უფრო ღრმად შევდივართ", - წერს გარი გიცბა.

“ერთმანეთს დაასიეს და ახლა დარღვევებისთვის ათავისუფლებენ. ძალიან კრეატიული მეთოდია გამოსახშირად...” - მიაჩნია სერგეი პიროგს.