"მანქანით მოვიდნენ, მე დავიმალე... მალე მოდით რა" - რაზე ესაუბრა იაკობ ბრეგვაძე 112-ი ოპერატორს შემთხვევის ღამეს

შაქარაშვილის საქმის ერთ-ერთი მოწმე, ფოტოგრაფი იაკობ შაქარაშვილი ერთადერთი იყო, ვინც შემთხვევის ღამეს 112-ში დარეკა და მცხეთაში დაწყებული ჩხუბის შესახებ შეატყობინა სამართალდამცავ უწყებას.

დღეს შინაგან საქმეთა სამინისტრომ სპეციალური ბრიფინგი გამართა, სადაც საქმის მიმდინარეობაზე ისაუბრა და ამასთან, გამოაქვეყნა სატელეფონო ჩანაწერი, რომელშიც ისმის, როგორ რეკავს ბრეგვაძე 112-ში და დახმარებას ითხოვს.

"მცხეთაში ვარ, მალე რომ მოხვიდეთ შეიძლება? რაღაც ადგილია, "ქებაბ ჰაუსი". ჩხუბი მოხდა და მალე მოდით რა. ალბათ, ათი ადამიანი ჩხუბობს. მანქანით მოვიდნენ და მე დავიმალე, აზრი არ ჰქონდა ჩავრეულიყავი... რკინის რაღაცა ეჭირათ... მალე მოდით, მანქანით არიან და შეიძლება წავიდნენ" - ამბობს იაკობ ბრეგვაძე სატელეფონო ჩანაწერში.

მოგვიანებით, მას ოპერატორი ურეკავს და ეუბნება, რომ პოლიცია მის ადგილმდებარეობას ვერ ადგენს და მისამართის დაზუსტებას სთხოვს:

"არაგვის ხიდი ხომ იცით? ზუსტად არაგვის ხიდზეა. დამირეკა პოლიციამ და მოვა რო? ტიპები არიან არაგვის ხიდზე, არიან იდეაში დამნაშავეები, იმიტომ რომ მანქანიდან გადმოვიდნენ და დაგვაყარეს. წესით დაშავებულებიც არიან... რავი რა, პროსტა მოდით" - ამბობს ბრეგვაძე ჩანაწერში.

თუმცა მალევე, ის ოპერატორს ეუბნება რომ მისვლას აზრი არ აქვს, რადგან ჩხუბი დასრულდა:

"ერთი წუთით, შეგიძლიათ გააუქმოთ? აღარ არის ჩხუბი, მორჩა ყველაფერი, დაიშალა ყველა და წავიდნენ. რაღა აზრი აქვს ახლა რომ მოხვიდეთ, მე დამიჭერთ თუ რას იზამთ? უბრალოდ, გააუქმეთ" - ამბობს შაქარაშვილის საქმის მოწმე ფოტოგრაფი სატელეფონო ჩანაწერში.