საქართველოში კორონავირუსით მე-11 პაციენტი გარდაიცვალა

საქართველოში კორონავირუსით ინფიცირებული მეთერთმეტე პაციენტი გარდაიცვალა.

ამის შესახებ ინფორმაცია მთავრობის მიერ შექმნილ სპეციალურ ვებ-გვერდზე stopcov.ge-ზე არის განთავსებული.

პაციენტს ბათუმის "მედალფაში" მკურნალობდნენ. კორონავირუსით გარდაცვლილი მამაკაცი 81 წლის იყო. მამაკაცი ე.წ. ქობულეთის კლასტერს უკავშირდება. ექიმების ინფორმაციით, ბოლო რამდენიმე დღე მისი მდგომარეობა კრიტიკული იყო.

მის გარდაცვალებამდე კორონავირუსმა 81 წლის მამაკაცის ცოლი იმსხვერპლა.

საქართველოში ამ დროისთვის კორონავირუსით ინფიცირების 638 შემთხვევაა დადასტურებული, აქედან 317 გამოჯანმრთელებულია, ხოლო 11 გარდაიცვალა. ამასთან, უცხოეთიდან სამკურნალოდ გადმოყვანილია საქართველოს 3 მოქალაქე.

ამასთან, კარანტინის რეჟიმშია 4769 ადამიანი, ხოლო სტაციონარში მეთვალყურეობის ქვეშ - 414 პირი.