"ეს მეორედ დაბადებაა ჩემთვის..." - რას ამბობს გურჯაანელი მებაღე, რომლის 6 000 ძირი ტიტა უცნობმა ადამიანებმა "გამოისყიდეს"

გურჯაანელ კაკო ჯეირანაშვილს, რომელიც საკუთარი ბაღის ტიტების რეალიზაციას კორონავირუსის პანდემიის გამო ვეღარ ახერხებდა, უცნობმა ადამიანებმა სრულად ჩაურიცხეს ის თანხა, რასაც მეყვავილე მცენარეების გაყიდვით მიიღებდა.

6 000-მდე ძირი ტიტა 63 წლის მებაღეს თბილისში, ნავთლუღის ბაზარში უნდა ჩაებარებინა, თუმცა კორონავირუსის გავრცელების საფრთხის გამო, ბაზარი დაიხურა და ტიტები ადრესატის, კაკო პაპა კი - შემოსავლის გარეშე დარჩა. ერთმა სტატიამ და სოციალურ ქსელში დაწყებულმა საქველმოქმედო აქციამ კი მცირე მეწარმეს სრულად აუნაზღაურა დაკარგული თანხა.

"პალიტრანიუსის" გადაცემა "საღამოს ნიუსრუმი" კაკო ჯეირანაშვილს სოფელ კოლაგში, საკუთარ ბაღში ესტუმრა.

VIDEO: სიკეთის ბაღად ქცეული ტიტების ბაღი - სპეციალური რეპორტაჟი გურჯაანიდან

"ეს მსოფლიო უბედურება რომ გაჩნდა, კორონავირუსი, ყველაფერი დაიკეტა, ბაზრებიც, სადაც მე ჩამქონდა ეს ყვავილები... ნერვიულობის მეტი ამ სილამაზეს არაფერია მოუტანია - ყოველ დილას გამოვიდოდი, დავხედავდი, მოვწევდი ერთ "პაჩკა" სიგარეტს ნერვიულობისგან, შევიდოდი... საღამოს გამოვიდოდი, დავხედავდი, მოვწევდი ერთ "პაჩკა" სიგარეტს, შევიდოდი...

ჩემო ლამაზებო ჩემო კარგებო, ბევრჯერ მითქვამს ამ ყვავილებისთვის. აბა, ვინ არ ეტყვის ამ სილამაზეს ჩემო კარგოო?!" - ამბობს კაკო ჯეირანაშვილი.

მისი ოჯახის წევრების თქმით, ყველაზე მეტად იმაზე ნერვიულობდნენ, რომ მებაღე დანაკარგს ძალიან განიცდიდა, არადა მას ცოტა ხნის წინ ინსულტი აქვს გადატანილი და ამის ძალიან ეშინოდათ.

"ვის რა საშუალება ჰქონდა - ზოგმა 2 ლარი, ზოგმა ათი ლარი, 100 და 150 ლარიც ჩამირიცხეს... უნდოდათ დამხმარებოდნენ ფინანსურად. ერთი თეთრიც და 150 ლარიც ვინც ჩამირიცხა, ყველასი მადლობელი ვარ, ეს არის მეორედ დაბადება ჩემთვის... დიდ მადლობას მოვახსენებ ყველას, ღმერთი შეეწიოს ყველას და თქვენც ხალხო, ნუ გეშინიათ, დავამარცხებთ კორონას!" - ამბობს გურჯაანელი მებაღე.

იქ, სადაც სიკეთეა - ბედნიერებაცაა. ეს ამბავიც სიკეთის ისტორია. ახლა კაკო ჯეირანაშვილი ბედნიერია და მხოლოდ ერრთი რამ სურს: უხილავ მტერთან ბრძოლაში მსოფლიოს ამბავსაც ისეთივე კეთილი დასასრული ჰქონდეს, როგორც ამ გაზაფხულზე მისი ტიტების ისტორიას...