მარნეულელი ქალის ჯანმრთელობა მკვეთრად გაუმჯობესდა, კლინიკას დღეს დატოვებენ ახალშობილები - ლევან რატიანი პაციენტებზე

თბილისის სახელმწიფო სამედიცინო უნივერსიტეტის პირველი საუნივერსიტეტო კლინიკის დირექტორის, ლევან რატიანის განცხადებით, კორონავირუსით ინფიცირებული მარნეულელი ქალის ჯანმრთელობის მდგომარეობა მკვეთრად გაუმჯობესდა და მართვითი სუნთქვის აპარატიდან მოიხსნა.

როგორც რატიანმა ჟურნალისტებს განუცხადა, მათთან ამ ეტაპზე სულ 69 პაციენტი იმყოფება, მათ შორის 22 არის კორონავირუსით ინფიცირებული.

„რაც შეეხება პაციენტების მდგომარებას, ყველაზე კრიტიკული პაციენტი, არა მძიმე, არამედ კრიტიკული, იყო გადმოყვანილი ჩვენს კლინიკაში ბოლნისიდან, მარნეულის წითელი ზონიდან, პაციენტი იმყოფებოდა მართვით სუნთქვაზე, დადასტურებული კოვიდინფექციით. კლინიკურად ანამნეზური მდგომარებით სახეზე იყო მიოკარდიუმის გადატანილი ინფარქტი, ავტოკორონარული შუნტირება, შაქრიანი დიაბეტი, გულის უკმარისობა. მოთავსებული იყო კლინიკური მედიცინის დეპარტამენტში, ფასდებოდა ექიმების მიერ როგორც უკიდურესად მძიმე. ახლა მდგომარეობა სტაბილურია, მკვეთრი დადებითი დინამიკაა, მოხსნილია აპარატურული სუნთქვიდან, კონტაქური და ადეკვატურია, რამდენიმე საათი დაყოვნდება კრიტიკული მედიცინის ცენტრში და ჩამოვა თერაპიის განყოფილებაში“, - განაცხადა ლევან რატიანმა.

ბოლნისის მუნიციპალიტეტის ქვემო ბოლნისიდან პირველ საუნივერსიტეტო კლინიკაში არიან გადაყვანილნი ასევე 19 წლის გოგო და დედამისი, რომლებსაც კორონავირუსი დაუდასტურდათ. როგორც ქვემო ქართლში სახელმწიფო რწმუნებულმა, შოთა რეხვიაშვილმა ჟურნალისტებს განუცხადა, 19 წლის გოგო ფეხმძიმედაა.

„საველე ჰოსპიტალში 31 მარტის მდგომარეობით 2 ადამიანის დასკვნას ელოდებოდნენ. საერთო ჯამში, საველე ჰოსპიტალში 17 ადამიანია მოთავსებული. გუშინ, 38 გრადუსი ტემპერატურით იყვნენ დედა-შვილი, ქალბატონები ბოლნისის მუნიციპალიტეტის ქვემო ბოლნისიდან, რომელთაც დღეს სამწუხაროდ, კორონავირუსი დაუდასტურდათ. 19 წლის ქალი ორსულია. ისინი პირველ საუნივერსიტეტო კლინიკაში გადაიყვანეს“, - აღნიშნავს რეხვიაშვილი.

პირველი საუნივერსიტეტო კლინიკის დირექტორის, ლევან რატიანის განცხადებით, ახალშობილები მის კლინიკას დღეს დატოვებენ. რაც შეეხება ორსულებს, როგორც რატიანმა ჟურნალისტებს განუცხადა, მათი ჯანმრთელობის მდგომარეობა სტაბილურია.

„ახალშობილების მდგომარეობა ამ ეტაპზე სტაბილურად მათ ჩაუტარდათ განმეორებით ტესტირება და მივიღეთ ისევ ანტიგენ-ანტისხეულები უარყოფითი, ამიტომ ასეთი პაციენტები დღეს დატოვებენ კლინიკას. რაც შეეხება ორსულს გვყავს ორი ორსული ქალბატონი. მათი მდგომარეობა სტაბილურია, როგორც დედის, ისე ნაყოფის“,- განაცხადა რატიანმა.

ცნობისთვის, საქართველოში კორონავირუსით ინფიცირების შემთხვევათა რაოდენობა 130-მდე გაიზარდა. კარანტინის რეჟიმშია 5437 ადამიანი, ხოლო სტაციონარში მეთვალყურეობის ქვეშ - 260 პირი. ინფიცირებული 130 ადამიანიდან 26 გამოჯანმრთელებულია.