რა ხდება უხანში ორთვიანი კარანტინის შემდეგ? - ქალაქი თანდათან ნორმალურ ცხოვრებას უბრუნდება

ჩინეთის ქალაქ უხანში, სადაც ახალი კორონავირუსის პირველი შემთხვევა დაფიქსირდა, 23 იანვრიდან კარანტინია გამოცხადებული - 16 მილიონიან ქალაქში ადამიანები უკვე ორ თვეზე მეტია სახლებში არიან გამოკეტილნი. თუმცა, ბოლო დღეებში ვითარება თანდათან პოზიტიურად იცვლება. როგორც ჩინეთის ოფიციალური პირები ამბობენ, ქვეყანამ კორონავირუსი დაამარცხა. ამაზე ისიც მეტყველებს, რომ ბოლო ხუთი დღის განმავლობაში ჩინეთში ვირუსის შიდა გადადების ფაქტი არ დაფიქსირებულა.

მსოფლიოში ახალი ტიპის კორონავირუსი, COVID-19 სწორედ უხანიდან გავრცელდა. ვირუსით ჩინეთში, ბოლო მონაცემებით, 81 218 ადამიანი დაინფიცირდა, რომელთა შორისაც 3 281 გარდაიცვალა, ქვეყანას 73 650 გამოჯანმრთელებული ჰყავს და ამ ეტაპზე ვირუსის მხოლოდ 4 287 აქტიური შემთხვევაა.

ახალი ინფიცირებულების რაოდენობა ყოველდღე იკლებს. სწორედ ასეთი ტენდენციის გამო, უხანში უკვე დახურეს სპეციალურად კორონავირუსით დაავადებულთა სამკურნალოდ გახსნილი საავადმყოფოები, რადგანაც მათი საჭიროება აღარ არსებობდა.

თუ ეს ტენდენცია გაგრძელდა, ოფიციალური პირები გეგმავენ, რომ უხანში კარანტინი 8 აპრილს გააუქმონ, მანამდე კი ადამიანები ეტაპობრივად უბრუნდებიან ძველ ცხოვრებას და ზოგიერთი შეზღუდვები იხსნება.

როგორც ბრიტანული გამოცემა the guardian წერს, ორშაბათს ადამიანთა მცირე ჯგუფებს უკვე შეეძლოთ ქუჩაში ერთად გამოსვლა და მთელი ამ დროის განმავლობაში პირველად, ერთად სეირნობა.

ასევე, გასულ შაბათ-კვირას ქალაქში პირველი მატარებელი ჩავიდა, რომლითაც ჩინეთის სხვა ქალაქებში დარჩენილი უხანის მკვიდრნი დაბრუნდნენ.

კვირას ადგილობრივი ხელისუფლების წარმომადგენლებმა უხანის მაცხოვრებლებს უთხრეს, რომ შეუძლიათ სამსახურებში დაბრუნება, თუ არ აქვთ მაღალი ტემპერატურა და აქვთ შესაბამისი ჯანმრთელობის დამადასტურებელი მოწმობა, სადაც მითითებულია მათი ვირუსული მდგომარეობის სტატუსი.

ოფიციალური პირების განცხადებით, ქალაქი თანდათან გაიხსნება და ეტაპობრივად დაუბრუნდება ძველ ცხოვრებას, განახლდება საზოგადოებრივი ტრანსპორტის მუშაობაც.

იმ ადამიანებს, რომლებიც უხანის მაცხოვრებლები არ იყვნენ, თუმცა მკაცრი კარანტინის გამოცხადების შემდეგ ქალაქში ჩარჩნენ, აძლევენ ქალაქის დატოვების უფლებას. თუმცა, იმ შემთხვევაში, თუ მათი ვირუსული მდგომარეობის შესახებ ცნობილია და აქვთ შესაბამისი ცნობა, რომ ინფიცირებულები არ არიან.

ამ დროისთვის კორონავირუსი მსოფლიოს 194 ქვეყანაშია გამოვლენილი. ვირუსით გლობალური მასშტაბით, 424 202 ადამიანი დაინფიცირდა, 18 934 გარდაიცვალა, ხოლო 109 200 გამოჯანმრთელდა.