როგორ მკურნალობენ ინფექციურ საავადმყოფოში კორონავირუსით დაავადებულებს

კორონავირუსით ინფიცირებული საქართველოს მოქალაქეების შესახებ ინფორმაცია ყოველდღიურად იცვლება. ამ ეტაპზე ქვეყანაში ვირუსით დაავადებული 9 ადამიანია, რომლებიც ბოქსირებულ პალატებში ინფექციურ საავადმყოფოში გადიან მკურნალობას.

ამ ეტაპზე არ არსებობს პრეპარატი, რომელიც უშულოდ კორონავირუსით დაინფიცირებული ადამიანებისთვის გამოიყენება, თუმცა, მეცნიერები როგორც ამ საკითხზე, ასევე სპეციალური ვაქცინის შექმნაზეც მუშაობენ.

რა პრეპარატებით მკურნალობენ კორონავირუსით დაინფიცირებულ პაციენტებს - ამ თემაზე AMBEBI.GE-მ კითხვები ინფექციური საავადმყოფოს გენერალურ დირექტორს თენგიზ ცერცვაძეს დაუსვა:

- ბატონო თენგიზ, კორონავირუსით ინფიცირებული პაციენტების მკურნალობა რომელი პრეპარატებით მიმდინარეობს?

- მოგეხსენებათ, ამ ეტაპზე არ არსებობს სპეციფიკური პრეპარატი კორონავირუსის სამკურნალოდ, მაგრამ არსებობს სიმპტომური და დამხმარე თერაპია, იმის მიხედვით, კონკრეტულ ავადმყოფს კონკრეტულ სტადიაზე რა დაზიანებები აქვს და რისი მკურნალობა სჭირდება.

მაგალითად, თუ აქვს პნევმონია, სეფსისი ან ეჭვი გვაქვს ბაქტერიულ ინფექციაზე ანტიბიოტიკებით ვმკურნალობთ. მაღალ ტემპერატურაზე - სიცხის დამწევი საშუალებებით. თუ საჭიროა ინფუზიური თერაპია უტარდებათ, გადასხმებით, მაგრამ შეზღუდულად, რადგან ამ დროს არ შეიძლება მასიური ინფუზიოთერაპია (გადასხმა).

- ხომ არ შეიქმნება ბაზარზე პრეპარატების დეფიციტი?

- არა, რადგან ამ ეტაპზე 9 პაციენტს ვმკურნალობთ და რამდენი უნდა დაინფიცირდეს, რომ დეფიციტი გაჩნდეს?! თან ეს პრეპარატები გამოიყენება ათასობით სხვა ავადმყოფებისთვისაც.

- რამდენად ემორჩილება დაავადება ამ პრეპარატებს?

- ზოგჯერ ემორჩილება და ზოგჯერ ნაკლებად. ჩვენი პაციენტების შემთხვევაში 8 კარგად გრძნობს თავს და ერთია შედარებით მძიმედ. ჯერჯერობით გაუმჯობესებას ვერ მივაღწიეთ, მაგრამ არც გაუარესება გვაქვს. მას მაღალი ტემპერატურა აქვს 38.5-39 გრადუსი, მდგომარეობა სერიოზულია.

- სხვადასხვა წყაროებით ცნობილია, რომ შუახნის ადამიანებში არ მიმდინარეობს რთულად ვირუსი, თუ არ აქვთ თანმხლები ქრონიკული დაავადებები. ქართველი პაციენტი, რომელიც მძიმედ არის, 44 წლისაა. რამ გამოიწვია მისი მდგომარეობის დამძიმება?

- ალბათ გარკვეულწილად დაგვიანებულმა მომართვამ - როგორც იცით, ეს კაცი სამი დღე სიცხიანი სახლში იყო. როდესაც ვამბობთ, რომ შუახნის ასაკის ადამიანებში არ მიმდინარეობს რთულად, ამას პროცენტულობიდან გამომდინარე ვამბობთ.

მაგალითად, 80 წელს ზევით ადამიანებში 15 პროცენტია სიკვდილიანობა და 50 წელს ქვევით 0.6 პროცენტი. მაგრამ ეს არ ნიშნავს, რომ ცალკეულ შემთხვევებში ახალგაზრდებში არ მიმდინარეობს რთულად. მაგალითად, ჩინელი ექიმი, რომელმაც ეს ვირუსი პირველად აღმოაჩინა და საბოლოოდ თავად დაავადდა, 32 წლის იყო და გარდაიცვალა. ასევე ჩინეთის საავადმყოფოს მთავარი ექიმიც 42 წლის იყო და გარდაიცვალა.

როდესაც ვამბობთ, რომ ასაკოვნებში რთულად მიმდინარეობს, ვგულისხმობთ უფრო მაღალ პროცენტს, თორემ ახალგაზრდები დაზღვეულები სულაც არ არიან.

ჩვენი 44 წლის პაციენტი კრიტიკული არ არის, მძიმე სხვა არის და კრიტიკული სხვა. ჯერჯერობით მის სიცოცხლეს საფრთხე არ ემუქრება.

- რამდენად მართალია, მითი, რომ კორონავირუსი ორსულებსა და ბავშვებს არ ეკარებათ.

- ეს მითი არ არის. ბავშვებზე სიმართლეა და ორსულებზე ვერ გეტყვით. 15 წელს ქვევით ერთეული შემთხვევებია ავადმყოფობის და 0.2 პროცენტია მხოლოდ სიკვდილიანობის. ბავშვებში ნამდვილად ერთეული შემთხვევებია. არ ეკარება ვერ ვიტყოდი, მაგრამ ძალიან მცირეა დაავადების ალბათობა. ორსულების შესახებ ნამდვილად არ არსებობს დაზუსტებული ინფორმაცია.