არის თუ არა გადატვირთული თბილისის კლინიკები ვირუსიანი პაციენტების გამო?

მოსახლეობის ნაწილი ვირუსების სეზონზე საავადმყოფოების გადატვირთულობის გამო წუხს. რამდენიმე მშობელმა სოციალურ ქსელში დაწერა, რომ თბილისში იაშვილისა და ციციშვილის კლინიკებში პალატები გადატენილია.

ერთ-ერთმა დედამ, რომელსაც შვილი ვირუსით ჰყავს ავად, "ფეისბუქზე" ერთ-ერთ ჯგუფში დაწერა:

"იაშვილში მიყვანილი ბავშვი არ მიიღეს 39 სიცხით, ადგილი არაა და სახლში უმკურნალეთო... წავედი ციციშვილში და სასწრაფოდ დასაწვენიაო, დაგვტოვეს და დაიწყო კოშმარი - გადატენილია პალატები და ორი სიცხის საზომი აქვთ, მოკლედ წყვეტაა... ინჰალატორს გუშინდელის მერე ველოდები და ძლივს მეღირსა ესეც ერთია, ეხლა შემოდის ექთანი და გადასხმის დასადგმელი არ გვაქვს და ორივე ბავშვს (გვერდზე მწოლიარეს) ერთად დავუდგათო" - წერს მშობელი.

არის თუ არა გადატვირთულობის პრობლემა თბილისისი საავადმყოფოებში, ამის შესახებ "ინტერპრესნიუსი" რამდენიმე კლინიკას ესაუბრა. როგორც იაშვილის კლინიკის დირექტორმა ივანე ჩხაიძემ განაცხადა, იაშვილის კლინიკაში ვირუსით დაავადებული პაციენტების მიმართვიანობა მართლაც გაზრდილია.

რაც შეეხება გავრცელებულ ინფორმაციას იმის თაობაზე, რომ იაშვილის კლინიკას პაციენტებისთვის საკმარისი ადგილები არ აქვს და მათ კლინიკის დერეფნებში ემსახურებიან, კლინიკის დირექტორმა განაცხადა, რომ ეს სიმართლეს არ შეესაბამება.

"სამწუხაროდ, იანვრის პირველი ათი დღე არ გამოირჩევა პაციენტების ნაკადის კლებით, პირიქით, ორი დღის მონაცემებით, ეს ნაკადი უფრო გაზრდილია დეკემბრის ბოლო ათ დღესთან შედარებით.

ამ შემთხვევაში ჩვენ ყურადღებას ვაქცევთ გაფრთხილებებს, რაც არის მშობლისთვის აუცილებელი, ვინაიდან გრიპი თავისი მიმდინარეობით საშიში დაავადებაა და მას სერიოზული გართულებები გააჩნია, როგორიც არის ფილტვების ანთება.

ძალიან მნიშვნელოვანია ტემპერატურის კონტროლი და ექიმთან დროული მიმართვიანობა" - განაცხადა ივანე ჩხაიძემ.

„ინტერპრესნიუსი“ კიდევ ერთი კლინიკის, ციციშვილის სახელობის საავადმყოფოს დირექტორს დავით რეხვიაშვილს ესაუბრა, რომლის თქმითაც, კლინიკაში ვირუსით დაავადებული პაციენტების მიმართვიანობამ იკლო.

„ამ დროისთვის მომართვიანობა არის ოდნავ შემცირებული, გართულებები პრაქტიკულად არ შეგვხვედრია. გართულებები, რომელმაც ბავშვებს შეიძლება შეუქმნას პრობლემები, ძალიან იშვიათია და პრაქტიკულად არ შეგვხვედრია" - განაცხადა დავით რეხვიაშვილმა.

მისივე თქმით, კლინიკისთვის მიმართვიანობის გაზრდას სკოლებში და ბაღებში არდადეგების დასრულების შემდეგ ელოდებიან.