"სიტუაცია უკვე ვადამდელი არჩევნებისკენ მიდის" -  რა პროგნოზებს აკეთებენ ექსპერტები

ჩემი აზრით, დღეს სიტუაცია უკვე ვადამდელი არჩევნებისკენ მიდის. ოპოზიცია კი ისე გააკეთებს, რომ ხელისუფლებას „აიძულებს“ მოიმოქმედოს ის, რაც მას უნდა - ჩაატაროს ვადამდელი არჩევნები, - ასე აფასებს ექსპერტი ვახტანგ ძაბირაძე პროპორციული საარჩევნო სისტემის ჩავარდნის გამო რუსთაველის გამზირზე დაწყებულ საპროტესტო აქციას.

როგორც ექსპერტმა „ინტერპრესნიუსს“ განუცხადა, ოპოზიცია არჩევნებისთვის უნდა მოემზადოს, აქციები უნდა გამართოს, მაგრამ არა პერმანენტული და არა ისეთი მოთხოვნებით, რაზეც აპრიორი ცნობილია, რომ მას ხელისუფლება არ შეასრულებს. ვახტანგ ძაბირაძის თქმით, ოპოზიციამ მოსახლეობაში გამარჯვების რწმენა უნდა ჩანერგოს.

„საზოგადოებაში მუხტი არსებობს, მაგრამ ეს მუხტი რომ მოქმედებაში მოვიდეს, მას სხვა დეტონატორი სჭირდება და არა ის, რაზედაც დღეს მიდის საუბარი.

ამ 30 წლის განმავლობაში ყოველთვის იყო პრობლემა, შეცვლის თაობაზე. დღეს, მოსახლეობისა და საზოგადოების მხრიდან „ქართული ოცნების“ მიმართ არ არის ის დამოკიდებულება, როგორიც იყო 2011 წელს „ნაციონალური მოძრაობისადმი“, აგრესიული და მკვეთრად უარყოფითი. მაშინაც კი საარჩევნო სისტემა ძალაში დატოვა „ნაციონალურმა მოძრაობამ“.

ერთადერთი შემთხვევა იყო 1990 წელს, როდესაც პირველი მრავალპარტიული არჩევნები ტარდებოდა და მაშინ იყო პატარა აქცია. ისიც კაცმა არ იცის, რატომ იყო აქცია, იმიტომ, რომ თითქმის ყველაფერი შეთანხმებული იყო და აქცია მაინც გაიმართა.

ამიტომ, ამის მოლოდინი თუ აქვს ოპოზიციას, ცდება. ხელისუფლება რაც არის ვხედავთ, მაგრამ ეს ოპოზიციაც არ ვიცი, რა არის. თუ არ იფიქრებს ოპოზიცია, არჩევნებს წააგებს. აანონსებენ პერმანენტულ აქციებს, ამას ვერ გაქაჩავენ. 2009 წელს რუსთაველის გამზირი გადაკეტილი იყო და კარვებით იყო გადაჭედილი, რამაც შედეგი არ მოიტანა. ამ პროტეტს არ ექნება ის რეზულტატი“, - განაცხადა ვახტანგ ძაბირაძემ.

პოლიტილოგ რამაზ საყვარელიძის განცხადებით, არ არის გამორიცხული ბიძინა ივანიშვილს და „ქართულ ოცნებას“ საზოგადოებამ სიტყვის გატეხვა არ აპატიოს.

როგორც საყვარელიძემ „ინტერპრესნიუსთან“ საუბრისას აღნიშნა, „ქართული ოცნებისთვის“ უმრავლესობიდან წევრების გასვლა შეიძლება უფრო დიდი დარტყმაა, ვიდრე საზოგადოების პროტესტი რუსთაველზე და მათი რაოდენობის გაორმაგება.

„გარდა საზოგადოების პროტესტისა, საკმაოდ მნიშვნელოვანმა ნაწილმა დატოვა უმრავლესობა. ეს ნაბიჯი მათი მხრიდან შეიძლება უფრო დიდი დარტყმაა უმრავლესობისთვის და გამოსაფხიზლებელიც, ვიდრე რაოდენობის გაორმაგება რუსთაველზე. მათი მხრიდან უმრავლესობის დატოვებისკენ გადადგმული ნაბიჯი გვაფიქრებინებს, რომ ისინი არ იყვნენ საქმის კურსში და სწორედ ჩავარდნაზე გამოხატეს რეაქცია. ნიშანდობლივი და საყურადღებოა, რომ მათ რეაქცია სწორედ იმაზე გამოხატეს, რომ შეპირებული სიტყვა უნდა შესრულდეს და ასეთივე რეაქცია ექნება მოსახლეობის დიდ ნაწილს. სიტყვის გატეხვის ფაქტი არის მიუღებელი. არ არის გამორიცხული უმრავლესობას სიტყვის გატეხვა არ აპატიონ, გააჩნია, პროცესები როგორ წავა“, - განაცხადა საყვარელიძემ.

რაც შეეხება არსებული სიტუაციიდან გამოსავალს, როგორც საყვარელიძე აცხადებს, ყველა მხარისთვის მომგებიანი პროპორციულ სისტემაზე გადასვლასთან დაკავშირებით საკონსტიტუციო ცვლილებების პროექტის სახეცვლილი ვარიანტის კენჭისყრაა, თუმცა, კონსტიტუციური ცვლილების სულისკვეთება იგივე უნდა დარჩეს.

„თუკი ვადამდელი საპარლამენტო არჩევნების მიმართულებით წავიდა პროცესი, მაშინ დღეს არსებული კანონით რომ არ ჩატარდეს, რასაც რეალურად რუსთაველზე აპროტესტებენ, მაშინ კონსტიტუციაში ცვლილება უნდა შევიდეს, რაც იგივე პრობლემას დაეჯახება პარლამენტში მაჟორიტარების მხრიდან, რასაც უკვე დაეჯახა. ეს მიმართულება, მგონი, ჩიხის შემცველია. ვფიქრობ, ყველაზე მომგებიანი ქვეყნისთვის, ხელისუფლებისთვის და ოპოზიციისთვის იქნება ის, რომ არსებულ პროექტს მიეცეს ახალი რედაქცია, რომლის სულისკვეთება ძველი დარჩება და ხელახლა გავიდეს პარლამენტში კენჭისყრაზე. შეიძლება გაკეთდეს მცირე ცვლილებები ისეთი, რომელსაც კანონი აიტანს ხელმორედ გასატანად. როგორც ჩანს, ამაზეც არის ლაპარაკი ირაკლი კობახიძის რეაქციიდან გამომდინარე. თუკი ხელმეორედ გატანაზე მიდგება საქმე, მგონია, რომ სიტუაცია შეიძლება ჩაწყნარდეს“, - განაცხადა საყვარელიძემ.

ახლა არის აბსოლუტურად აფექტური სიტუაცია, არც ერთმა მხარემ არ იცის რაშია გამოსავალი, არავის აქვს გამოსავლის ფორმულა, მიმდინარეობს შუბლებით შეჯახება მორევაზე. დღეს ვართ პოლიტიკურ რინგზე, სადაც ლოგიკა არის გათიშული და ყველა იყურება პოლიტიკურ კუნთებზე, - ასე შეაფასა ექსპერტმა გია ხუხაშვილმა განვითარებული მოვლენები.

როგორც გია ხუხაშვილმა „ინტერპრესნიუსს“ განუცხადა, როცა კუნთებით იწყება ბრძოლა, ზარალდება სახელმწიფო.

„ვინ მოერევა, მე ამაზე კომენტარს არ გავაკეთებ. მოლაპარაკების ცივილიზებული სივრცე ხელისუფლებამ წაართვა პოლიტელიტას. ხელი მოკიდეს და რინგზე შეაგდეს, იჭიდავეო უთხრეს და რა უნდა ქნას პოლიტიკურმა ელიტამ? ხელისუფლებამ თავისივე გადაფურთხებული ალოკა. ყველა არის შოკირებული. არა მგონია, რომ ოპოზიციას ჰქონდეს კონკრეტული გეგმა რა სურს. შოკირებული ვარ და მეც ვერ ვხედავ გამოსავალს, ჩიხში ვართ, როცა კონსენსუსის ძიების სივრცე, ველიც აღარ დატოვა ხელისუფლებამ. წარმოუდგენელი რაღაც ჩაიდინა. დადო საჯარო პირობა და ადგა და საკუთარი წინადადება ჩააგო. ის, რომ ჯოხი ბერაიაზე გადავტეხოთ, არასერიოზულია. ბიძინა ივანიშვილმა პოლიტიკურ ეთიკას ფასი დაუკარგა. მან თქვა, რომ ყველაფერი „მოსულა“, შემიძლია ნებისმიერი რამ შეგპირდეთ, შემდეგ არ გავაკეთო და ის ვირეშმაკული თამაში, რომ მაჟორიტარების გამო მოხდა და თვითონ ძალიან წუხს, ამის არავის სჯერა! ფაქტობრივად, ეს ფორმდება ასე, რომ იმდენად ეშინია ძალაუფლების დაკარგვის, ყველაფერზე წამსვლელია, ეს არის პრობლემა. მისი სიტყვის ფასი არის უკვე ნული. დახშულ სამყაროში ცხოვრობს, სადაც ვერ ხვდება ვერაფერს ან თუ ხვდება და ამას აკეთებს, ეს არის აბსოლუტური ცინიზმი. ის ფიქრობს, რომ ამ საზოგადოებას რასაც მინდა იმას „შევაჭმევ“. ვეტყვი, რომ 2X 2= 5-ს და ამას წიხლით შევაჭმევ. ეს სახიფათოა ქვეყნისთვის“, - განაცხადა ხუხაშვილმა.

როგორც მან თქვა, ამ დროისთვის საგზაო რუკა და ფორმულა, რომელიც ქვეყანას ამ კრიზისიდან გამოიყვანს, არ არსებობს.

„ზოგადად არ ვარ ქუჩით რაღაც საკითხების გადაწყვეტის მომხრე, მაგრამ დღეს მე სივრცეს მოლაპარაკებებისთვის, კონსენსუსის ძიებისთვის ვერ ვხედავ. შენ რომ მოლაპარაკებებზე დაჯდე, ხომ უნდა ენდო მეორე მხარეს?! ხელისუფალმა, ერთმა ადამიანმა შეიყვანა ქვეყანა აბსოლუტურ პოლიტიკურ ჩიხში, დაუკარგა სიტყვას ფასი. ანუ ფაქტობრივად რომც მოიძებნოს ფორმულა, ადამიანი, რომელიც უხეშად არღვეს თავის სიტყვას, აღარ არის სანდო რაზე უნდა ესაუბრო. მე არ მინდა რომ ქუჩით გადაწყდეს პრობლემები, მაგრამ გამომდინარე იქიდან, რომ ჯერჯერობით გადაწყვეტის ფორმულას ვერ ვხედავ, შემიძლია ვიფიქრო, რომ ტემპერატურა ისე არ გახურდეს, რომ კონტროლიდან გამოვიდეს“, - აღნიშნა ხუხაშვილმა.

მისივე თქმით, როცა ხელისუფლება საზოგადოებაზე ფიქრობს, რომ გამოვლენ, დაიღლებიან და წავლენ, მისი გაკარება ძალაუფლებასთან სახიფათოა.