"ჩვენ ვერ ვიცავთ არასრულწლოვნებს აზარტული თამაშებისგან, მოთამაშეთა რაოდენობამ ნახევარ მილიონს გადააჭარბა" - ლევან გოგიჩაიშვილი

ჩვენ ვერ ვიცავთ არასრულწლოვნებს, რომ აზარტული და მომგებიანი თამაშებისგან თავი შეიკავონ, - ამის შესახებ დამოუკიდებელმა დეპუტატმა ლევან გოგიჩაიშვილმა დღეს გედევან ფოფხაძესთან ერთად გამართულ ბრიფინგზე განაცხადა. დეპუტატი სახელმწიფოს უმოქმედობაში სდებს ბრალს და აცხადებს, რომ ის არაფერს აკეთებს იმისთვის, რომ კანონი აღასრულოს. მისივე თქმით, მოთამაშეთა საერთო რაოდენობამ საქართველოში, არაოფიციალური მონაცემებით, ნახევარ მილიონს გადააჭარბა.

მისივე თქმით, დამოუკიდებელი დეპუტატები საპარლამენტო უმრავლესობას და საზოგადოებას პრობლემის მოსაგვარებლად კანონპროექტების პაკეტს სთავაზობენ. ლევან გოგიჩაიშვილი ამბობს, რომ 9 თვის წინ, პარლამენტში ამ საკითხზე კანონპროექტის ჩაგდება "ქართული ოცნების" ცალკეული წევრების ინტერესებს უკავშირდება.

„მეორე საფრთხე, რაც ამ ბიზნესმა შექმნა ქვეყანაში არის ფულის გათეთრების რისკი. დღევანდელი სისტემა იძლევა საშუალებას, რომ ადამიანმა ამ კომპანიების სერვისების გამოყენებისას შეძლოს ძალიან დიდი თანხის გათეთრება. დამოუკიდებელმა დეპუტატებმა გადავწყვიტეთ უმრავლესობას და საზოგადოებას შევთავაზოთ კანონპროექტის პაკეტი, რომელიც თავის თავში მოიცავს რამდენიმე კომპონენტს. პირველი კომპონენტი არის - რეკლამის აკრძალვა და მისი შეზღუდვა. ეს არის მნიშვნელოვანი იმისთვის, რომ დავარტყათ ტრენდს, რომ თამაში არის კარგი. ჩვენ ვფიქრობთ, რომ თამაში არის ძალიან ცუდი და სახელმწიფოს მოვუწოდებთ, რომ ეს ტრენდი ასახოს თამაშის რეკლამის აკრძალვაში", - განაცხადა ლევან გოგიჩაიშვილმა.

მისივე ინფორმაციით, არსებობს ასევე სუიციდის შემთხვევებიც, რომელიც თამაშთან არის დაკავშირებული.

დეპუტატის განმარტებით, მათ მიერ შემუშავებული კანონპროექტი „ქართულმა ოცნებამ“ ერთხელ უკვე ჩააგდო.

"იმიტომ ჩააგდო, რომ ის იყო დაინტერესებული აღნიშნული ბიზნესიდან შემოსავლებით და ბევრი ადამიანი, რომელიც ამ ბიზნესიდან იღებს მოგებას, მჭიდროდ არის დაკავშირებული „ქართული ოცნების“ სხვადასხვა წარმომადგენლებთან,"- განაცხადა ლევან გოგიჩაიშვილმა.

მისივე თქმით, 9 თვის წინ ჩაგდებულ კანონპროექტს ხელახლა დაარეგისტრირებენ. ლევან გოგიჩაიშვილის თქმით, რეკლამები უნდა აიკრძალოს ყველგან, მათ შორის ტელევიზიასა და ინტერნეტში.